56 ¹ Yu mas marimari long mi God, ol man i laik mekim nogut long mi. Long olgeta dei ol birua i save kam klostu long kilim mi i dai. ² Ol birua bilong mi i save painim mi long olgeta taim, ol i laik kilim mi i dai na ol i bihainim mi. ³ Taim mi pret long ol mi bai putim bilip bilong mi long yu. ⁴ God mi litimapim nem bilong yu long promis yu wokim long tok bilong yu. Mi putim bilip bilong mi long God na mi no pret long ol, ol man nating bai i no inap mekim wanpela samting long mi. ⁵ Olgeta taim ol i save tanim ol toktok mi save mekim na ol i save laik bagarapim mi. ⁶ Ol i save bung ol yet na ol i laik hait na luk stil long kilim mi i dai. ⁷ Noken larim ol i abrusim ol pasin nogut ol i wokim. Putim ol dispela man long belhat bilong yu, God Yawe. ⁸ Yu kauntim pinis ol hevi mi karim na yu putim ai wara bilong mi insait long botol bilong yu. Ating dispela i no i stap long buk bilong yu? ⁹ Ol birua bilong mi save go bek gen taim mi singaut long yu. Dispela pasin i save soim mi olsem God yu bilong mi. ¹⁰ God mi litimapim nem bilong yu long promis yu mekim long tok bilong yu. God Yawe mi litimapim nem bilong yu long promis yu mekim long tok bilong yu, ¹¹ long nem bilong God mi bilip na mi no inap pret long wonem samting ol man bai mekim long mi. ¹² Pasin bilong inapim promis mi mekim long yu i stap long han bilong mi, God bai mi givim tenkyu ofa igo long yu. ¹³ Yu bin helpim laip bilong mi taim ol i laik kilim mi i dai, yu hapim lek bilong mi taim mi laik pundaun olsem na mi save wokabaut long ai bilong God long lait bilong kisim laip.