44 ¹ Mipela i harim long yau bilong mipela, God Yawe, ol papa bilong mipela i bin tokim mipela long wanem wok yu bin mekim long dei bilong ol, long taim bipo. ² Yu rausim ol kantri long han bilong yu tasol yu putim ol lain bilong mipela, yu i bin bagarapim ol lain manmeri tasol yu putim ol manmeri bilong mipela long olgeta hap graun. ³ Ol i no kisim graun wantaim bainat bilong ol, i no wantaim strong bilong ol tasol long strong bilong han sut bilong yu na lait bilong pes bilong yu, long wanem yu i laikim ol. ⁴ God Yawe, yu King bilong mi, givim amamas long ol lain manmeri bilong Jekop. ⁵ Long yu tasol bai mipela i daunim ol birua bilong mipela, long nem bilong yu bai mipela krungutim ol i go daun, husait ol i birua long mipela. ⁶ Mi bai i no inap bilip long bunara na bainat bilong mi, ol dispela samting bai i no inap helpim mi. ⁷ Tasol yu bin helpim mipela long ol birua bilong mipela na givim sem long husait i no laikim mipela. ⁸ Long nem bilong God Yawe, mipela i apim nem bilong mipela yet na mipela bai tok tenkyu long nem bilong yu olgeta taim. Selah ⁹ Tasol nau yu i rausim mipela olgeta na givim baksait na yu i no save go wantaim ol ami bilong mipela. ¹⁰ Yu i mekim mipela givim baksait long birua na husait ol i belhat long mipela i bagarapim ol yet. ¹¹ Yu i mekim mipela olsem sipsip bilong kilim na tromoi mipela nambaut long namel long ol kantri. ¹² Yu i salim ol lain manmeri bilong yu nating, yu i no kisim planti moni samting taim yu mekim olsem. ¹³ Yu i larim ol lain bilong narapela kantri tok strong long mipela, lap na tok baksait long mipela. ¹⁴ Yu i larim ol manmeri bilong narapela kantri i tok bilas long mipela na tanim het long mipela. ¹⁵ Olgeta dei, i sem bilong mi i stap wantaim mi na mi i pilim bikpela sem tru. ¹⁶ Long wanem, tok bilong ol narapela husait save i tok strong long mi na tok bilas long mi, long wanem ol birua na ol lain bilong pait bek i daunim mi. ¹⁷ Olgeta dispela samting i kamap long mipela, tasol mipela i no lus tingting long yu o mekim giaman toktok long tok promis bilong yu. ¹⁸ Bel bilong mipela i no lusim yu na wokabaut bilong mipela i no go longwe long yu. ¹⁹ Yu i larim mipela long ples bilong ol wel abus i save stap na mekim mipela pret long dai. ²⁰ Sapos mipela i lus tingting long nem bilong God Yawe bilong mipela o tromoi han bilong mipela long ol arapela god, ²¹ ating God bai i no inap painim aut long dispela? Long wanem em i save long hait tingting bilong mipela. ²² Tru tumas, long nem bilong yu ol i kilim mipela long olgeta dei, mipela i kamap olsem ol sipsip bilong kaikai. ²³ Kirap, bilong wanem yu i slip, Bikpela? Kirap, yu noken lusim mipela olgeta. ²⁴ Bilong wanem yu i haitim pes bilong yu na lus tingting long sore na bagarap bilong mipela? ²⁵ Long wanem mipela i tanim kamap das na bodi bilong mipela i pas long graun. ²⁶ Kirap long helpim mipela na kisim bek mipela long tok promis bilong stretpela pasin bilong yu.