35 ¹ God Yawe, yu mas bagarapim ol man i bagarapim mi na pait wantaim ol man husait i pait wantaim mi. ² Kisim ol klos pait bilong yu na palang na yu kam helpim mi. ³ Kisim spia na tamiok bilong pait na pait wantaim ol lain i ronim mi."Yu tokim mi, "Mi helpim bilong yu." ⁴ Ol lain i painim mi bai sem na lusim na ol lain husait i mekim tingting long bagarapim mi bai go bek na lus tingting. ⁵ Bai ensel bilong God Yawe i rausim ol olsem ol hap pipia bilong gras win i save rausim. ⁶ Taim ensel bilong God Yawe i ronim ol bai rot bilong ol i kamap tudak wel na bagarap tru. ⁷ I nogat wanpela as bilong ol i putim umben bilong kisim mi na tu i no gat as bilong ol digim hul bilong trepim mi. ⁸ Larim bagarap i kam long ol i mekim ol kirap nogut. Larim umben bilong ol yet i kisim ol na tu pundaun long hul ol i bin digim na kisim bagarap. ⁹ Tasol bai mi amamas tru insait long God Yawe na amamas long em i kisim bek mi. ¹⁰ Wantaim olgeta strong bilong mi, mi inap tok, "God Yawe, husait em i wankain long yu, inap long helpim ol man i stap long hevi long han bilong ol man i gat moa strong na long han bilong ol man i laik pulim samting bilong ol lain i no gat samting? ¹¹ Ol man i no mekim ol stretpela toktok na sutim ol tok giaman long mi. ¹² Ol i bekim bek nogut long ol gutpela pasin bilong mi na mi pilim sori tru. ¹³ Tasol taim ol i sik, mi putim ol brukbruk klos na putim het i go daun na beten long yu i helpim ol. ¹⁴ Mi go wantaim bikpela bel sori olsem mi mekim long brata bilong mi na krai olsem mi krai long mama bilong mi. ¹⁵ Mi kirap nogut long lukim ol i bung amamas na mekim ol toktok bilong amamas taim mi pundaun. Oltaim ol i bruklain long mi. ¹⁶ Ol i belhat na kaikaim tit wantaim na tok bilas long mi. ¹⁷ Bikpela, longpela taim tru yu lukim mi inap. Helpim mi long ol bagarap ol i laik givim long mi olsem ol laion i laik bagarapim mi. ¹⁸ Na bai mi tok tenkyu long yu na litimapim nem bilong yu namel long ol manmeri ¹⁹ Yu no ken larim ol dispela birua i save giaman oltaim i amamas long ol samting ol mekim long mi na yu no ken larim ol i mekim ol pasin nogut ol i laik mekim. ²⁰ Long wonem ol i no mekim tok bilong kamapim wanbel namel long ol lain i stap gut long ples bilong yumi tasol ol i mekim ol giaman toktok long ol. ²¹ Ol i mekim ol tok nogut long mi na ol i tok, "Aha, Aha, ai bilong mipela yet i lukim pinis. ²² Bikpela God Yawe, yu yet yu lukim ol dispela samting pinis na yu no ken stap longwe long mi na tu yu no ken stap isi. ²³ Bikpela God bilong mi, redim yu yet na sanap na helpim mi long ol samting i laik kamap long mi. ²⁴ God Yawe, wantaim stretpela pasin bilong yu, yu helpim mi. Yu no ken larim ol i amamas long wonem samting nogut ol i mekim long mi. ²⁵ No ken larim ol i toktok long bel bilong ol yet na tok, " Aha, mipela i bagarapim em na kisim pinis wanem samting mipela i laikim. ²⁶ Ol man i save amamas long ol pen mi save kisim bai ol i sem na lus tingting. Bai sem i karamapim ol man i save apim ol yet na ol i no inap i stap gut. ²⁷ Larim ol manmeri i save laikim ol gutpela tok bilong mi i ken amamas na oltaim bai ol i tok, "Litimapim nem bilong God Yawe, em i save amamas long mekim gut long ol wokman bilong em." ²⁸ Na bai mi tokim ol long gutpela bilong yu na apim nem bilong yu long olgeta de.