28 ¹ Long yu God Yawe, mi singaut, yu strong bilong mi na yu noken lusim mi. Sapos yu no harim mi, bai mi bihainim husait ol i go insait long matmat. ² Harim krai na singaut bilong mi taim mi askim yu long helpim mi, taim mi hapim han bilong mi i go long ples holi bilong yu! ³ Noken rausim mi i go wantaim ol manmeri i no save mekim gutpela pasin na ol lain bilong mekim pasin nogut na husait i save toktok gut wantaim ol arapela lain tasol ol i gat pasin nogut insait long bel bilong ol. ⁴ Givim ol wanem samting pasin bilong ol i laikim long en na bekim ol les pasin bilong ol we i antap tumas. Bekim bek ol samting ol i bin mekim long ol pasin bilong ol na givim ol wanem samting ol bai i kisim. ⁵ Long wanem ol i no save gut long wok bilong God Yawe na ol wok em i bin mekim long han bilong em, em bai rausim ol i go daun na i no inap mekim ol i kamap gen. ⁶ Givim biknem long God Yawe long wanem em i harim askim bilong mi! ⁷ God Yawe em i strong bilong mi na ples hait bilong mi, bel bilong mi i bilip long em na em i save helpim mi. Olsem tasol bel bilong mi i save amamas moa na bai mi singim song na litimapim nem bilong em. ⁸ God Yawe em i strong bilong ol manmeri bilong em na em i ples hait bilong ol manmeri em i makim ol pinis. ⁹ Kisim ol manmeri bilong yu na blesim ol na kamap wasman bilong ol na lukautim ol oltaim.