22 ¹ God bilong mi, God bilong mi, bilong wanem na yu lusim mi? Bilong wanem yu i stap longwe long mi na yu no helpim mi na harim ol toktok mi mekim taim mi i pilim pen? ² God bilong mi, dei na nait mi krai long yu tasol yu i no save harim mi! ³ Tasol yu i stap holi, yu sindaun long sia king bilong yu na ol Israel i save litimapim yu. ⁴ Ol tumbuna bilong mipela i bilip long yu na yu bin helpim ol. ⁵ Ol i krai long yu na yu i bin helpim ol. Ol i bilip long yu na yu mekim ol i amamas. ⁶ Tasol mi olsem liklik snek bilong graun, i no olsem man na ol manmeri i save les long mi. ⁷ Ol manmeri i lukim mi na tanim het bilong ol long mi na tok pilai long mi. ⁸ Ol i tok, "Em i save bilip long God Yawe olsem na larim God Yawe i helpim em. Larim God i helpim em long wanem em i save amamas long em." ⁹ Yu makim mi taim mi stap long bel bilong mama yet na yu mekim mi i bilip long yu taim mi dring susu bilong mama yet. ¹⁰ Yu God bilong mi taim mi stap yet long bel bilong mama. ¹¹ Noken i stap longwe long mi long wanem hevi bai panim mi na i nogat wanpela man bai i helpim mi. ¹² Planti strongpela bulmakau bilong Basan i banisim mi. ¹³ Maus bilong ol i op bikpela olsem laion i singaut long kilim wel abus. ¹⁴ Mi kamap olsem wara na olgeta bun bilong mi i lusim ples bilong ol long bodi bilong mi. Lewa bilong mi i olsem kendol i lait na i pinis insait long bodi bilong mi. ¹⁵ Strong bilong mi i drai olsem liklik pot ol mekim long graun i malomalo na maus bilong mi i drai. Yu larim mi long dai na kamap das. ¹⁶ Ol dok na ol man bilong mekim ol pasin nogut i banisim mi na ol i brukim skin long han na lek bilong mi. ¹⁷ Olgeta bun long bodi bilong mi i kamap ples klia na ol i lukluk strong long mi. ¹⁸ Ol i skelim olgeta gutpela klos bilong mi namel long ol yet. ¹⁹ God Yawe, yu strong bilong mi, yu mas helpim mi hariap na noken i go longwe long mi. ²⁰ Helpim mi long ol man i laik kilim mi long bainat na helpim mi long ol man husait i kam olsem ol wel dok na i laik kilim mi. ²¹ Rausim mi long maus bilong laion na helpim mi long ol kom bilong wel bulmakau man. ²² Bai mi tokaut long nem bilong yu long ol brata bilong mi na bai ol i litimapim nem bilong yu namel long planti manmeri. ²³ Husait i pret long God Yawe i mas litimapim nem bilong em! Givim biknem long em, ol tumbuna manmeri bilong Jekop. Amamas long em yupela olgeta tumbuna manmeri bilong Israel! ²⁴ Em i no save les long ol man i save karim ol hevi bilong ol i kam long em. God Yawe i no save givim baksait long ol lain, taim ol i karim olgeta hevi bilong ol wantaim krai i go long em na em i harim ol. ²⁵ Bai mi litimapim nem bilong yu namel long planti lain manmeri. Bai mi soim sori bilong mi long ol dispela lain husait i save pret long yu. ²⁶ Na ol trangu lain bai i kaikai na bel bilong ol bai i pulap tru, ol husait i painim God Yawe bai i litimampim nem bilong em. Larim bel bilong yupela i ken i amamas na stap oltaim. ²⁷ Olgeta manmeri bilong graun bai i givim laip bilong ol i go long God Yawe na ol manmeri bilong olgeta kantri bai i brukim skru bilong ol long yu. ²⁸ God Yawe em dispela King bilong olgeta manmeri na em tasol bai i lukautim olgeta kantri bilong dispela graun. ²⁹ Ol manmeri i gat planti samting long dispela graun bai i amamas na bai olgeta bai brukim skru na lotu long em. Ol dispela lain bai i dai wanpela taim na ol bai kamap das klostu long em na ol dispela lain i no inap lukautim laip bilong ol. ³⁰ Ol lain manmeri i kam bai ol i lotu long em. Ol bai i tokim ol lain manmeri i kam bihain long Bikpela God Yawe. ³¹ Ol bai i kam toktok long ol stretpela pasin bilong em na ol bai tokim ol manmeri i no tanim bel yet long wanem samting em i bin mekim pinis!