101 ¹ Bai mi singsing long promis bilong i stap tru na long stretpela kot bilong yu. God Yawe, bai mi singsing na litimapim yu. ² Bai mi wokabaut long rot bilong gutpela na stretpela pasin insait long haus bilong mi. Wanem taim bai yu kam long mi? ³ Mi bai i no inap larim pasin nogut i kamap long ai bilong mi. Mi i save les long ol pasin nogut olsem na ol bai i no inap pas long mi. ⁴ Ol manmeri bilong mekim giaman pasin bai i lusim mi. Mi i no inap larim ol i kam klostu long mi. ⁵ Mi bai bagarapim husat ol i hait na bagarapim narapela manmeri. Mi bai i no inap stap wantaim ol manmeri bilong apim ol yet na paitim bros bilong ol. ⁶ Mi bai lukluk i go long ol manmeri i bihainim tok bilong mi na larim ol i sindaun long sait bilong mi. Ol husat i bihainim gutpela na stretpela pasin bilong mi, ol bai i mekim wok bilong mi. ⁷ Ol manmeri bilong mekim giaman tok bai i no inap stap insait long haus bilong mi. Ai bilong mi bai i les long lukim ol. ⁸ Monin i kam na monin i go, bai mi bagarapim olgeta man bilong mekim pasin nogut long graun na bai mi rausim ol long biktaun bilong God Yawe.