3 ¹ Long arapela de,Sabat Jisas i go insait long haus lotu bilong Juda gen, na wanpela man husait han bilong em i dai em i sindaun long dispela hap. ² Sampela man i putim ai sapos Jisas inap oraitim em long de Sabat. Dispela lain ol i painim wei long kotim em. ³ Jisas i tokim dispela han i dai man, "kirap na sanap namel long ol man." ⁴ Bihain em i askim ol manmeri, "Em i tambu long wokim gutpela long Sabat de, o givim bagarap; long sevim laip, o kilim i dai?" Tasol ol i stap isi. ⁵ Jisas i lukim ol wantaim belhat, na tu em i bel sori gen long ol long wanem, bel bilong ol i pas. Na em i tokim dispela man, "stretim han bilong yu i go aut". Dispela man em i stretim han, na Jisas i oraitim em. ⁶ Taim ol Farisi lukim dispela, ol i go hariap long ol lain bilong Herod na pasim tok long kilim Jisas. ⁷ Bihain long dispela, Jisas i go long nambis wantaim ol disaipel bilong em. Tasol planti lain manmeri long Galili na Judea, ⁸ long Jerusalem, Idumea na i go hapsait long Jordan na lain insait long Taia na Sidon ol i bihainim em. Planti lain ol i harim wanem samting Jisas i wokim na ol i kam long em. ⁹ Jisas i tokim ol disaipel long redim wanpela liklik bout long wanem planti manmeri i kam yet long lukim em, nogut ol bai paspas na pusim em. ¹⁰  Em i oraitim planti manmeri, na olgeta lain husait igat kainkain sik ol i pusim ol yet i kam long em, long wanem ol i ting long holim em. ¹¹  Taim ol spirit nogut i lukim em, ol i pundaun long ai bilong em, na ol singaut na tok, "Yu Pikinini man bilong God." ¹²  Tasol em i toktok strong long ol bai noken mekim em i kamap ples klia. ¹³  Em go antap long maunten na singautim ol lain em i bin laikim na ol i kam long em. ¹⁴  Long hap em i makim 12 pela man na em i kolim ol apostol, olsem na ol bai stap wantaim em, na em salim ol i go long autim gutnius, ¹⁵  na tu givim pawa long ol long rausim ol spirit nogut. ¹⁶  Em makim 12 pela apostol, long Simon em i givim nem, Pita; ¹⁷  Jems, pikinini man bilong Zebedi, John, brata bilong Jems (emi givim neim olsem Boaneges, em min olsem ol pikinini man bilong kilaud pairap); ¹⁸  na Andru, Pilip, Batelome, Matiu, Tomas, Jems, pikinini man bilong Alpeaus, Tadeus, Saimon husait ol i kolim Zilot, ¹⁹  na Judas Iskariot, man husait i givim Jisas long han bilong ol birua. ²⁰  Bihain em i go bek long haus, planti manmeri i bun gen olsem na ol planti tumas na ol no inap long kaikai bret. ²¹  Taim femili bilong em i harim dispela, ol i go aut long kisim em, na ol i tok, "Tingting bilong em mas ino orait". ²²  Na tu ol save man bilong raitim lo i kam long Jerusalem ol i tok, "Belsibal i stap insait long em na, long dispela hetman bilong spirit nogut em i save rausim ol spirit nogut". ²³  Jisas i singautim ol i kam long em na toktok long ol long tok bokis, "Olsem wanem Satan bai rausim Satan? ²⁴  Sapos wanpela Kingdom i buruk tupela hap na birua long em yet, dispela Kingdom bai ino nap sanap. ²⁵  Na sapos wanpela haus burukim em yet igo tupela hap, dispela haus bai i no nap sanap. ²⁶  Sapos Satan i kirap na birua wantaim em yet, em bai i no nap sanap, em bai pinis olgeta. ²⁷  Tasol wanpela man i no nap go insait long haus bilong strongpela man na stilim kago bilong em, em mas pasim leg han bilong dispela strongpela man pastaim. Na bihain em ken stilim kago bilong em long haus. ²⁸  Tru tumas mi tokim yupela stret, olgeta sin ol manmeri i mekim na tok bilas long God, em God bai lusim sin bilong ol. ²⁹  Tasol husait i tok bilas long Spirit Tambu, God bai ino nap lusim sin bilong ol; sin bai stap oltaim oltaim. ³⁰  Jisas i mekim dispela toktok long wanem, ol man tok 'em gat spirit nogut i stap long em'. ³¹  Mama na brata bilong em ol i kam na sanap autsait, na salim wanpela man na ol i singautim em long kam autsait. ³²  Planti manmeri ol i sindaun na raunim Jisas, na ol i tokim em, "Mama na brata bilong yu ol i stap autsait na ol i kam painim yu." ³³  Em i bekim ol, "Husait em mama na ol brata bilong mi?" ³⁴  Em i lukluk raun long ol lain husait ol i sindaun raunim em na tok, "Lukim, dispela em mama na ol brata bilong mi! ³⁵ Tru tumas husait i bihainim laik bilong God, dispela manmeri em i brata, susa na mama bilong mi."