5 ¹ Wanpela taim, Jisas i sanap long nambis bilong raun wara Genesaret, or arapela nem ol i kolim Galili na i autim tok long planti lain manmeri. ² Na Jisas i lukim tupela bot i stap arere long nambis. Ol man bilong pulim fis i lusim bot long hap na ol i go wasim umben bilong ol i stap. ³ Jisas i go kalap long wanpela bilong ol dispela bot, em i bilong Saimon. Na Jisas i askim em long pusim bot i go namel liklik, na em i sindaun long hap na i skulim ol manmeri. ⁴ Taim Jisas i pinis long skulim ol manmeri, em i tokim Saimon, " I go long dip ap na putim umben bilong yu i go daun long kisim fis." ⁵ Saimon i bekim tok bilong em, "Masta, mipela i wok hat tru long nait na mipela i no kisim wanpela fis. Tasol bai mi putim umben bilong mi i go daun long wara olsem yu tok." ⁶ Taim ol i mekim olsem, ol i kisim planti fis tru na umben i laik buruk. ⁷ Olsem na ol i singautim ol wanwok long arapela bot i kam helpim ol. Na tupela bot wantaim i pulap tru long fis na i laik sink. ⁸ Taim Saimon Pita i lukim dispela, em i pundaun long lek bilong Jisas na i tok, "Bikpela, yu mas lusim mi na i go, mi wanpela sin man tasol." ⁹ Long wanem, em wantaim ol poro bilong en i kirap nogut long wanem , em i mekim narakain samting. ¹⁰ Wankain olsem tu long tupela wanwok bilong en, Jems na Jon, tupela pikinini bilong Zebedi. Jisas i tokim Saimon, "Yu no ken pret, nau yu bai kisim ol man." ¹¹ Ol i pul i go long nambis, na ol i lusim bot na olgeta samting bilong ol na bihainim Jisas. ¹² Taim Jisas i stap long wanpela taun, wanpela man i gat sik lepra i pulap long skin bilong en i kam. Taim em i lukim Jisas, em i brukim skru, putim pes bilong en i go daun long graun na i askim Jisas, "Bikpela, sapos yu laik, yu ken mekim mi orait" ¹³ Na Jisas i putim han antap long em na i tok, "Mi ken oraitim sik bilong yu. Nau yu ken kamap orait." Wantu tasol sik lepra i lusim em. ¹⁴ Jisas i givim em strongpela tok. " Yu no ken tokim wanpela man long wanem samting i kamap long yu, tasol yu mas i go soim yu yet long ol prist. Na mekim ofa olsem lo bilong Moses i tok. Dispela em i olsem witnes long ol." ¹⁵ Tasol, tok i go nabaut long olgeta hap. Na planti manmeri i kam long Jisas long harim tok bilong en, na long em bai i oraitim sik bilong ol. ¹⁶ Tasol sampela taim Jisas i save lusim ol na i go long ples i nogat man na i prea. ¹⁷ Long wanpela taim Jisas i skulim ol manmeri, na long ap tu ol farisi na ol tisa bilong lo long ol ples bilong Galili na bilong Judia na bilong Jerusalem i sindaun i stap. Na pawa bilong God i pulap long em long oraitim ol sikman. ¹⁸ Sampela man i karim wanpela sik man, hap skin bilong en i dai pinis. Na ol i painim rot long kisim em i go klostu long Jisas. ¹⁹ Planti manmeri na ples i pas tru. Olsem na ol i kisim em i go antap long het bilong haus. Na ol i lusim em kam daun long rop wantaim bet bilong en, namel long ol manmeri klostu long lek bilong Jisas. ²⁰ Taim Jisas i lukim bilip bilong ol, na em i tok, "Wantok, mi lusim sin bilong yu." ²¹ Ol Farisi na ol save man bilong lo i stat long tingting planti long ol yet.Husait i dispela man na em i tok bilas long God? Husait man baksait long God bai inap long rausim sin bilong ol man? ²² Tasol Jisas i save pinis long tingting bilong ol, na em i tokim ol olsem, "Bilong wanem yupela i gat kainkain tingting long bel bilong yupela? ²³ Wanem em i isi long tokim, Mi lusim sin bilong yu o 'tokim, kirap na wokabaut?' ²⁴ Tasol bai yupela i save olsem, Pikinini Bilong Man em i gat namba long dispela graun long lusim sin bilong ol manmeri. Na em i tokim dispela sik man, 'Yu kirap, na kisim mat bilong yu na go long haus bilong yu."' ²⁵ Wantu dispela man i kirap, kisim bet bilong em na wokabaut litimapim nem bilong Bikpla. ²⁶ Olgeta manmeri i kirap nogut long dispela samting na ol i givim biknem long God. Ol i pulap wantaim wanpela kain samting na ol i tok, "Mipela i lukim narakain samting tru long dispela dei." ²⁷ Bihain long dispela, Jisas i lusim ol na i go. Em i lukim wanpela man bilong kisim takis nem bilong en Livai i sindaun long ples bilong kisim takis. Jisas i tokim em, "Bihainim mi." ²⁸ Livai i lusim olgeta samting na i kirap na bihainim em. ²⁹ Livai i mekim wanpela bikpela kaikai bilong Jisas long haus bilong en. Planti man bilong kisim takis na ol arapela man tu i stap na kaikai wantaim ol. ³⁰ Tasol ol Farisi na saveman bilong lo i toktok planti long disaipel bilong Jisas, na ol i tok, "Bilong wanem yupela i kaikai na dring wantaim ol man bilong kisim takis na ol sinman?" ³¹ Jisas i bekim tok bilong ol olsem, "Ol manmeri i no gat sik i no save go lukim dokta, tasol ol manmeri i gat sik tasol." ³² Olsem tasol, Mi no kam bilong singautim ol stretpela manmeri long tok sori long sin bilong ol, mi kam long ol sin manmeri." ³³ Na ol man i tok long Jisas, "Ol disaipel bilong Jon ol i save tambuim kaikai na i save prea, na ol disaipel bilong ol Farisi tu. Tasol ol disaipel bilong yu ol i save kaikai na drink." ³⁴ Na Jisas i bekim ol, "Sapos wanpela man i laik marit i stap wantaim ol poro bilong en, ol poro bilong en i ken tambuim kaikai, a? ³⁵ Tasol wanpela taim bai i kamap na dispela man bilong marit bai i go pinis na i no stap wantaim ol moa. Long dispela taim ol bai i tambuim kaikai." ³⁶ Jisas i mekim wanpela tok piksa long ol, "I nogat wanpela i save brukim liklik hap laplap bilong nupela klos na somapim antap long bruk bilong olpela klos. Sapos em i mekim olsem, dispela nupela klos bai i bruk. Na liklik hap laplap bilong nupela klos bai i no wankain olsem olpela klos. ³⁷ Na i nogat wanpela i save pulumapim nupela wain i go insait long olpela skin memek. Sapos em i mekim olsem, dispela nupela wain bai i brukim olpela skin na wain bai i kapsait na bai ol i bagarapim dispela skin memek. ³⁸ Nogat, nupela wain i mas i go insait long nupela skin meme. ³⁹ Na i no gat wanpela man i save drink pinis long olpela wain, em i save laikim nupela wain. Em i save tok, "Olpela wain em i gutpela moa."'