24 ¹ Moning taim tru, long nambawan de bilong wik, ol meri i kisim ol marasin bilong givim gutpela smel ol i bin redim pinis,na ol i go long matmat. ² Ol i painim olsem ston ol i rausim pinis long dua bilong matmat, ³ na taim ol i go insait ol i no lukim bodi bilong Bikpela Jisas. ⁴ Samting i bin kamap olsem,taim ol meri i tingting planti i stap,wantu tasol tupela man wantaim longpela klos i lait tumas i sanap namel long ol. ⁵ Taim ol meri i lukim tupela,ol i pret tru na brukim skru na putim pes i go daun long graun,na tupela man i tok olsem, "Bilong wanem yupela i painim man i stap laip namel long ol dai man? ⁶ Dispela man yupela i painim em,em i no stap moa long hia.Em i kirap bek pinis,em i bin tokim yupela pinis taim em i stap yet wantaim yupela long Galili, ⁷ Tok i stap olsem, ol i mas kisim Pikinini bilong Man na givim i go long han bilong ol man nogut na bai ol i nilim em long diwai kros,tasol long namba tri dei bihain em bai i kirap bek gen." ⁸ Na ol meri i tingim gen dispela ol toktok Jisas i bin mekim, ⁹ na ol i lusim matmat na i go back na tokim ol 11pela aposol wantaim ol arapela lain long wanem samting ol i lukim na harim. ¹⁰ Nau Maria Magdala, Joana,Maria mama bilong Jems na ol arapela meri husait i bin i go wantaim i bringim dispela nius i go long ol aposol. ¹¹ Tasol ol aposol i ting em ol tok pilai nating bilong ol meri, na ol i no bilipim tok bilong ol. ¹² Nau Pita i kirap na i ran i go long matmat. Em i kamap pinis long matmat na em i lukluk i go insait. Em i lukim tasol ol laplap ol i bin karamapim bodi bilong Jisas,tasol em i no lukim Jisas. Pita i lusim na i go bek long haus bilong en na i tingting planti long wanem samting i kamap. ¹³ Long dispela taim tupela disaipel bilong Jisas i wokabaut long rot i go long ples Emaus. Emaus i stap 10 kilomita long we long Jerusalem. ¹⁴ Tupela i wokabaut yet na ol i toktok planti long wanem samting i bin kamap. ¹⁵ Taim tupela i toktok yet i go, Jisas em yet i wokabaut i go klostu wantaim ol. ¹⁶ Tasol tupela i no luksave long Jisas, long wanem God i pasim ai bilong tupela long luksave long em. ¹⁷ Na Jisas i askim tupela, "Yutupela i wokabaut na toktok planti long wanem samting,yutupela i luk wari? ¹⁸ Na wanpela bilong tupela nem bilong en Kliopas i tok, "Ating yu wanpela tasol bilong Jerusalem i no bin save, long ol samting i bin kamap long dispela hap,long ol de i kam i go pinis?" ¹⁹ Na Jisas i askim ol gen, "Wanem dispela ol samting?" Na ol i bekim tok bilong en olsem, "Ol samting i kamap long Jisas bilong Nasaret, em i wanpela profet, na em i mekim ol strongpela mirakel na skulim ol manmeri long ol gutpela tok long ai bilong God na ol manmeri, ²⁰ na olsem wanem ol hetpris na ol hetman bilong mipela i putim em long han bilong ol birua na ol birua i kilim em i dai antap long diwai kros. ²¹ Tasol mipela yet i bilip olsem dispela man,em i man husait bai i kisim bek ol manmeri bilong Israel long han bilong ol birua. Na nau em tripela dei i kam i go pinis. ²² Tasol, sampela ol meri namel long mipela yet i mekim mipela i kirap nogut nau moning long wanem samting i kamap long matmat, ²³ na taim ol i no lukim bodi bilong Jisas long matmat, ol i kam bek na tokim mipela olsem ol i biin lukim ol ensel na ensel i tokim al olsem Jisas i stap laip. ²⁴ Na sampela man namel long mipela yet i ran i go long matmat na ol i lukim ol samting olsem ol meri i bin tok long en.Tasol ol i no lukim Jisas." ²⁵ Jisas i tok long ol, "O ol kranki man tasol, i no gat bel i save kirap hariap long bilip long ol toktok ol profet i mekim." ²⁶ Ating yupela i no save olsem Krais i mas karim pen pastaim,na bihain em bai go insait long lait bilong en?" ²⁷ Na em i stat long Moses i go daun long ol profet, wanem ol tok ol i mekim long em yet na i stap in sait long tok bilong God. ²⁸ Ol i wokabaut i go na kamap klostu long ples we ol i ting long go long en.Na Jisas i mekim olsem em i laik i go moa. ²⁹ Tasol tupela i pasim em na i tok, "Stap wantaim mipela, em abinun pinis na klostu bai tudak."Olsem na Jisas i go long haus bilong tupela na i stap wantaim ol. ³⁰ Bihain em i sindaun long kaikai wantaim ol na em i kisim bret na tenkiu long God, brukim na i givim i go long ol. ³¹ Na ai bilong ol i op na ol i luksave olsem em i Jisas.Na wantu tasol em i lus nating na ol i no lukim em moa. ³² Tupela i tok long tupela yet olsem, "Tru tumas taim em i wokabaut wantaim mi tupela long rot na em i autim tok long Buk bilong God, bel bilong mitupela i kirap stret?." ³³ Tupela i kirap na kwik taim ol i go bek long Jerusalem we 11pela aposol i bung i stap wantaim ol arapela lain. ³⁴ Na tupela i tokim ol,tru tumas Bikpela i kirap bek pinis,na em i kamap ples klia long Saimon." ³⁵ Na tupela man i tokim ol wanem samting i kamap long ol long rot na hau ol i luksave long Jisas taim em i brukim bret wantaim ol. ³⁶ Na taim ol i toktok yet i stap,Jisas em yet i kamap namel long ol, na em i tokim ol olsem, "Bel isi bilong God i ken stap wantaim yupela." ³⁷ Tasol ol i pret nogut tru long wanem ol i ting ol i lukim wanpela tewel. ³⁸ Na Jisas i tok long ol, "Bilong wanem yupela i pret? Bilong wanem yupela i gat planti tingting long bel bilong yupela? ³⁹ Yupela lukim han na lek bilong mi, na yupela holim mi na lukim mi, em mi tasol. Ol tewel i nogat mit, gris na bun, olsem yupela lukim mi gat." ⁴⁰ Jisas i tok olsem pinis, em i soim ol han na lek bilong en. ⁴¹ Na taim ol i no soim amamas long bel,na ol i tingting planti i stap, em i askim ol, "Yupela i gat sampela kaikai bilong kaikai i stap,a?" ⁴² Na ol i givim em wanpela pis ol i boilim pinis, ⁴³ na em i kisim na kaikai long ai bilong ol. ⁴⁴ Na Jisas i tokim ol olsem, "Taim mi stap yet wantaim yupela,mi bin tokim yupela olsem,olgeta tok ol i raitim long lo bilong Moses na ol arapela profet na long buk Song,ol i tok long mi." ⁴⁵ Na em i mekim tingting bilong ol i op na ol i mas save long tok stap long buk bilong God. ⁴⁶ Na em i tokim ol, "Ol i bin raitim i stap olsem, Krais i mas karim pen na dai, na long namba tri de em i mas kirap bek. ⁴⁷ Olsem na wok bilong tanim bel,na pasin bilong lusim sin bilong ol manmeri long nem bilong Jisas i mas stat long Jerusalem na i go i kam long olgeta hap graun. ⁴⁸ Na yupela tasol bai i tokaut long ol dispela samting. ⁴⁹ Na lukim, mi salim promis bilong Papa i kam long yupela, tasol pastaim yupela i mas weit long Jerusalem,i nap yupela i ken kisim pawa bilong antap. ⁵⁰ Na Jisas i kisim ol i go ausait long taun na ol i go kamap klostu long ples Betani.Na em i apim han bilong en na em i blesim ol. ⁵¹ Taim em i blesim ol yet, em i lusim dispela graun na isi isi go antap long heven. ⁵² Ol i lotu long em pinis, na ol i go bek long Jerusalem pulap wantaim bikpela amamas. ⁵³ Na oltaim ol i stap long tempel,ol i litimapim nem bilong God.