20 ¹ Na God Yawe i tokim Josua, ² ''Tokim ol manmeri bilong Israel na tokim ol olsem, makim ol biktaun bilong ples hait olsem mi bin tokim Moses long tokim yupela. ³ Mekim olsem na man husait i no tingting long kilim narapela man i go long dispela hap. Dispela ol biktaun bai kamap ples hait long husait man i laik bekim pe bilong blut bilong man ol i bin kilim, ⁴ Em bai ran i go long wanpela bilong dispela biktaun na sanap long rot i go long dua bilong biktaun na tokaut long dispela bagarap long ol lida bilong biktaun. Na bai ol i kisim em i go insait long biktaun na ol bai givim em, ples bilong em long stap wantaim ol. ⁵ Sapos wanpela bilong ol i traim long bekim pei bilong blut bilong man i dai pinis, orait ol manmeri bilong biktaun i no ken givim dispela man husait i kilim em i go long han bilong ol lida man. Ol i no ken mekim olsem long wanem em i no tingting long kilim brata bilong em, em i no gat bel nogut long brata bilong em bipo. ⁶ Em i mas stap long dispela biktaun inap em sanap long kot long ai bilong ol manmeri, i go inap long dai bilong wanpela husait i mekim wok olsem het pris long ol dispela dei. Na wanpela husait i bin abrus na kilim narapela, em bai go bek long taun bilong em na haus bilong em, long taun em i bin ranawe long en." ⁷ Olsem na ol Israel i makim Kedes dispela taun i stap insait long distrik Galili long liklik ples maunten long Naptali na Sekem insait long maunten Efraim na Kiriat Aba em i wankain olsem Hebron long liklik ples maunten bilong Juda. ⁸ Na go yet long Joden long hap san kamap long Jeriko, ol i makim Beser long ples nating long bikpela hap bilong lain tumbuna bilong Ruben na Ramot Gilit, long lain tumbuna bilong Gat na Golen insait long Basan, long lain tumbuna bilong Manase. ⁹ Dispela em ol biktaun ol i makim bilong olgeta manmeri bilong Israel na ol narapela lain i kam i stap namel long ol, olsem na wanpela i abrus na kilim narapela i ken ranawe i go hait long ol. Dispela man i no inap dai long han bilong man husait i laik bekim pe bilong blut i kapsait, inap man husait i asua i mas sanap long bung ples long ai bilong ol planti manmeri..