17 ¹ Dispela em i wok bilong graun long ol lain bilong Manase, (husait i namba wan pikinini bilong Josep) na Maki, em i namba wan pikinini bilong Manase, husait em i papa bilong Gilet. Maki na ol tumbuna lain bilong em, ol i kisim dispela graun Gilet na Basan, bilong wanem Maki, em i gutpela man bilong pait. ² Graun ol makim long olgeta lain tumbuna bilong Manase, i go long olgeta wanlain, Abiesa, Helek, Asria, Sekem, Hefa na Semida. Em ol lain tumbuna pikinini man bilong Manase, pikinini man bilong Josep, i givim long ol wanlain bilong ol. ³ Nau Jelofehet pikinini man bilong Hefa,em i pikinini man bilong Gilet, em i pikinini man bilong Maki, em i pikinini man bilong Manase husait i no gat pikinini man, tasol i gat ol pikinini meri tasol. Nem bilong ol dispela pikinini meri ,em Mala, Noa, Hokla, Milka na Tisa. ⁴ Ol i kam lukim pris Eliasa, Josua pikinini man bilong Nun na ol hetman na ol i tok,"God Yawe i tokim Moses long givim graun bilong mipela wantaim ol brata bilong mipela." Olsem na em i bihainim lo bilong God Yawe na em i givim graun long ol dispela meri namel long ol brata bilong papa bilong ol. ⁵ 10-pela hap bilong graun ol i makim bilong Manase long Gilet na Basan, dispela graun i stap long hap sait bilong Joden, ⁶ bilong wanem ol pikinini meri bilong Manase i kisim graun bilong ol wantaim ol pikinini man bilong em.Ol i givim graun bilong Gilet i go long olgeta lain bilong Manase. ⁷ Ol graun bilong Manase i stat long Asa i go long Mikmeta, dispela graun i stap long hap san kamap long Sekem. Na boda mak i go long saut sait bilong ol lain i stap arere long wara bilong Tapua. ⁸ (Graun Tapua em i bilong Manase, tasol taun bilong Tapua i stap long boda mak bilong Manase, en i bilong ol lain bilong ol tumbuna bilong Efraim.) ⁹ Boda mak i go daun long liklik wara bilong Kana. Ol dispela biktaun i stap saut sait long wara namel long ol taun bilong Manase, em ol i bilong Efraim. Boda mak bilong Manase i stap long not sait bilong wara na i go inap long solwara ¹⁰ Dispela graun i go long saut, em i bilong Efraim na graun i go long not, em bilong Manase na solwara i boda mak. Long not sait Asa i stap i go na long san kamap, Isaka i stap. ¹¹ Wankain long Isaka na Asa, Manase i kisim taun Bet San na haus lain, Iblem na haus lain, olgeta manmeri long Dor na haus lain, olgeta manmeri long Endo na haus lain, olgeta manmeri long Tanak na haus lain, olgeta manmeri long Megido (na haus lain na namba tri biktaun em Nafet). ¹² Tasol ol lain bilong Manase i no inap long kisim ol dispela biktaun, bilong wanem ol Kenan i stap yet long dispela graun. ¹³ Taim ol man meri bilong Israel i kamap strong, ol i mekim ol Kenan i kamap wokboi nating, tasol ol i no rausim ol i go aut olgeta. ¹⁴ Bihain ol tumbuna lain bilong Josep i tokim Josua, ol i tok, "Bilong wanem yu givim mipela wanpela hap graun long wok long en na wanpela hap bilong ol samting mipela bai kisim long en, I kam inap nau, God Yawe i blesim mipela na mekim mipela kamap planti moa?" ¹⁵ Josua i tokim ol, "Sapos yupela ol manmeri i kamap bikpela long namba, yupela i go antap long bikbus na stretim graun bilong yupela yet insait long graun bilong ol Peres na ol Refaim. Mekim olsem, bilong wanem liklik maunten kantri bilong Efraim i liklik tumas long yupela." ¹⁶ Ol tumbuna lain bilong Josep i tok,"Ol liklik maunten kantri i no inap long mipela. Tasol ol Kenan husait i stap long ples daun i gat planti ain karis, tupela lain wantaim, ol lain husait i stap long taun Bet San na ol ples na ol lain husait i stap long ples daun bilong Jesril." ¹⁷ Bihain Josua i tokim ol lain bilong Josep -na long Efraim na Manase,"Yupela ol manmeri i gat bikpela namba na yupela i gat bikpela strong. Yupela mas noken i gat wanpela liklik hap graun tasol ol i makim bilong yupela. ¹⁸ Liklik maunten kantri tu em bai i bilong yupela. Maski em i bikbus, bai yupela i klinim na kisim bilong yupela i go inap long ol boda mak. Yupela bai rausim ol lain Kenan, maski ol i gat ain karis na maski ol i strong."