15 ¹ Bihain Elifas, man bilong Teman i bekim tok olsem, " ² Inap bai wanpela man i gat gutpela tingting i bekim tok wantaim rabis save na pulapim em yet wantaim win i kam long hap sankamap? ³ Inap em stretim tok wantaim ol toktok i no gutpela o wantaim ol tok em i no inap kamapim wanpela gutpela samting? ⁴ Tru tumas, pasin bilong givim biknem i go long God i kamap liklik na yu pasim pasin bilong lotu na beten i go long em, ⁵ long wanem pasin nogut bilong yu i stiaim maus bilong yu na yu makim rot pinis long kisim maus bilong ol giaman man. ⁶ Maus bilong yu yet i kotim yu, i no maus bilong mi. I tru olsem maus bilong yu yet i tokaut long kotim yu. ⁷ Ating yu namba wan man husat i bin kamap? Ating yu kamap pastaim long ol maunten? ⁸ Ating yu bin save long ol hait tingting bilong God? Olsem wanem, yu ting yu nogat gutpela save? ⁹ Yu save long wanem samting em mipela i no save ah? Na yu luksave long wanem samting em i no i stap long mipela? ¹⁰ Ol man i gat wait gras na ol lapun man tru i winim papa bilong yu i stap wantaim mipela. ¹¹ Ating ol pasin isi na gutpela pasin bilong God i liklik samting long yu? ¹² Bilong wanem na bel bilong yu i kisim yu i go longwe? Bilong wanem na yu pasim ai bilong yu ¹³ na larim spirit bilong yu i givim baksait long God na mekim ol kain tok olsem long maus bilong yu? ¹⁴ Man em i husat na em i mas i stap klin? Em i husat na em i kamap long meri na em i mas i stap stret? ¹⁵ Harim, God i lukim olsem ol ensel bilong em i no mekim stretpela pasin na ples heven tu i no klin long ai bilong em, ¹⁶ na man i pulap long pasin nogut i olsem man i dring wara, olsem wanem bai em inap i stap klin! ¹⁷ Bai mi soim yu, harim, bai mi tokim yu long ol samting mi bin lukim, ¹⁸ em ol samting ol papa bilong ol saveman i bin kisim long ol tumbuna lain bilong ol. ¹⁹ Ol i bin givim graun long ol lain tumbuna bilong ol tasol na i nogat ol arapela lain i save wokabaut namel long ol. ²⁰ Man bilong mekim pasin nogut i tanim nambaut wantaim bikpela pen olgeta dei long laip bilong em na dispela man nogut bai i stap long bikpela pen na hevi long planti moa yia i stap yet. ²¹ Ol nois bilong pret i stap long yau bilong em taim em i stap gut tru, man bilong kamapim bagarap i bai kamap long em. ²² Em i no save ting olsem em bai i lusim tudak na kam autsait long wanem bainat i wetim em i stap. ²³ Em i go long kainkain ples long painim bret na askim, 'Em i stap long we?' Em i save pinis olsem dei bilong bikpela tudak i kam klostu pinis. ²⁴ Bikpela bagarap na pen i mekim em pret na i daunim em olsem wanpela king i redi long go pait. ²⁵ Long wanem, em i bin putim han bilong em i go long pait wantaim God na mekim pasin olsem, em i stap antap moa long God I Gat Olgeta Strong ²⁶ na dispela man nogut i ron i go long God wantaim bel i strong tumas na hap plang bilong pait. ²⁷ Em i tru olsem em i bin karamapim em yet wantaim gris bilong em yet na bungim gris long bodi bilong em, ²⁸ na em i stap long ol biktaun i nogat man i stap long em na insait long haus i nogat ol man i stap na bai i kamap olsem pipia. ²⁹ Em bai i no gat planti moni samting na ol planti samting bilong em bai i no inap stap longpela taim na ol kago bilong em bai i no inap go long olgeta hap bilong graun. ³⁰ Em bai i no inap lusim tudak na paia bai i lait na draim ol han bilong diwai bilong em long win i kam long maus bilong God tasol, em bai i pinis olgeta. ³¹ Larim em i noken bilip long ol samting i no gat wok long em na giamanim em yet, long wanem olgeta dispela giaman samting bai olsem pei bilong em. ³² Em bai i kamap long taim em i stap yangpela yet, olsem han bilong diwai i drai. ³³ Em bai i olsem frut bilong diwai wain i no mau yet na i pundaun na i olsem ol flawa bilong diwai oliv i lus na pundaun. ³⁴ Olsem na ol manmeri i no save long God bai i stap nating na i no gat pikinini na paia bai kukim ol haus bilong ol man i save kisim moni long ol pasin i no stret. ³⁵ Ol bai i gat bel long ol pasin nogut na karim ol pasin nogut na bel bilong ol bai i olsem mama i gat bel long ol giaman pasin."