12 ¹ Nau Job i kirap na bekim tok olsem, ² ''Yupela ol manmeri i noken tubel,gutpela tingting bai i dai wantaim yupela. ³ Yupela ting mi no save long dispela ol samting? Yupela i no winim mi tasol mi tu mi gat wankain save olsem yupela. ⁴ Mi olsem samting ol wantok i ken lap long en.Mi singaut long God na em i bekim singaut bilong mi.Mi nogat asua na mi stretpela man tasol nau ol i ken lap long mi. ⁵ Insait long tingting bilong wanpela man i stap isi tru bai em i sakim tok na painim bagarap.Tingting bilong em bai i kamapim moa bagarap long ol lain i no sanap strong. ⁶ Ol stil man i gat planti samting long haus bilong ol na ol lain i sakim tok bilong God i stap gut. Han bilong ol i olsem god bilong ol. ⁷ Tasol nau askim ol wel abus na ol bai i skulim yu, askim ol pisin bilong heven na ol bai i tokim yu. ⁸ O toktok long graun na em bai i skulim yu na ol pis bilong solwara bai tokaut long yu. ⁹ Wanem abus namel long olgeta i no save olsem God Yawe i wokim dispela. ¹⁰ Olgeta samting i gat laip na laip bilong olgeta manmeri tu i stap long han bilong em. ¹¹ Iau i save harim ol toktok olsem maus i save pilim swit bilong kaikai. ¹² Ol lapun man i gat gutpela tingting na longpela taim ol i stap laip long graun ol i gat gutpela save. ¹³ Long God i gat gutpela tingting na strong na em i gat gutpela stia na save. ¹⁴ Lukim, wanem samting em i brukim ol i no inap long wokim gen na sapos em i kalabusim wanpela man bai em i no inap i go fri. ¹⁵ Lukim, sapos em i pasim wara,ol wara bai drai na sapos em i salim wara i go aut bai wara i karamapim olgeta hap graun. ¹⁶ Long God i gat olgeta strong na gutpela tingting, ol manmeri i save bihainim ol giaman pasin na man i save giaman tupela i stap aninit long strong bilong em. ¹⁷ Em i pinisim save bilong ol man bilong givim gutpela tingting na ol i go wantaim sori na em i mekim ol man bilong skelim hevi i kamap olsem longlong. ¹⁸ Em i rausim olgeta strong bilong ol king na ol i pasim laplap olsem ol wokboi nating.. ¹⁹ Em i pinisim olgeta wok bilong ol pris na ol i go wantaim sori na em i daunim ol strongpela lain. ²⁰ Em i rausim tok long maus bilong ol man ol manmeri i save harim tok bilong ol na em i rausim save bilong ol hetman. ²¹ Em i mekim ol pikinini man bilong ol king i sakim tok na em i pinisim strong bilong ol strongpela man. ²² Em i save mekim ol samting i stap hait i kamap ples klia na putim ol samting i stap long tutak i kamap tulait. ²³ Em i save mekim ol kantri i kamap strong na em i save bagarapim ol tu na em i save mekim ol i kamap planti na em i save kisim ol i go olsem kalabus tu. ²⁴ Em i rausim gutpela tingting bilong ol lida bilong ol manmeri bilong graun na em i mekim ol i raun nambaut long ples nating i nogat rot. ²⁵ Ol i wokabaut olsem aipas long ples tutak i nogat lait na em i mekim ol i wokabaut olsem spak man.