48 ¹ God Yawe, God bilong Israel i tok long Moap olsem: krai na sore long Nebo, bagarap i kamap pinis. Ol Kiriathaim i sem, long wanem ol i winim ol long pait na kisim ol pinis. ² Olgeta gutpela bilong Moap i no stap moa. Ol birua bilong ol long Hesbon i pasim tok long bagarapim ol. Ol i tok olsem, 'kam na yumi bagarapim ol na ol longlong man wantaim, bainat bai bihainim yupela.' ³ Harim; singaut bikmaus i kam olsem long Horonaim, em dispela hap i gat ol bikpela bagarap i stap. ⁴ Moap i baragarap pinis. Harim ol pikinini bilong ol i krai. ⁵ Ol i go antap long liklik mauten bilong Luthit na ol i go daun long Horonaim na ol i singaut na krai wantaim long wanem bikpela bagarap i kamap. ⁶ Yupela ranawe, nogut yupela i bagarap, yupela go long ples nating na stap olsem wanpela diwai lip bilong en i gat nilnil. ⁷ Long wanem yupela i bilipim ol giaman lotu bilong yupela na ol mani na kago bilong yupela, olsem na bai ol i kalabusim yupela na bai ol i kisim god Semos wantaim ol prist na ol lida bilong en i go. ⁸ Man bilong kamapim bagagarap bai kam long olgeta biktaun, nogat wanpela man inap long ranawe , olgeta ples daun bai bagarap olgeta, olsem God Yawe i bin tok. ⁹ Givim wing long Moap bai em i mas redi long plai i go. Ol biktaun bilong em bai kamap olsem ples nating na i nogat manmeri bai i stap long en. ¹⁰ Sapos wanpela man i no mekim wok bilong God Yawe, orait em bai kisim bagarap! Sapos wanpela man i no kisim bainat na i go long pait bai em i kisim bagarap! ¹¹ Moap i stap gut tru long taim em i stap yangpela yet. Em i olsem wain ol i no kapsaitim yet long ol sospen. Em i no bin i go long kalabus. Olsem na em i swit gutpela tru na swit bilong en i stap yet. ¹² Olsem na lukim i gat taim i kam, God Yawe i tokaut olsem, bai mi salim man i kam kapsaitim em na brukim ol sospen bilong em. ¹³ Na Moap bai sem long god Semos olsem ol Israel i kisim sem long Betel ples bilong ol long lotu. ¹⁴ Olsem wanem na yu tok mipela ol strongpela man tru bilong pait? ¹⁵ Moap na ol biktaun bilong en bai bagarap olgeta. Olgeta yangpela man bilong en bai dai. Dispela em i tok bilong king! God Yawe i gat olgeta strong em nem bilong em. ¹⁶ Bagarap bilong Moap bai kamap kwiktaim , hevi i wok long kam hariap tru. ¹⁷ Yupela i stap klostu long Moap, yupela singaut na krai, yupela i save long biknem bilong en olsem na yupela singaut olsem, Oloman, strongpela spia na wokabaut stik i bruk pinis.' ¹⁸ Yupela ol pikinini meri i stap long Dibon, lusim gutpla sia bilong yupela na sindaun long drai graun. Dispela man i laik bagarapim Moap bai bagarapim yupela, em man husait laik brukim strongpela banis bilong yupela. ¹⁹ Sanap long rot na was, manmeri yu stap insait long Aroer. Askim ol manmeri i wok long ranawe, 'Bilong wanem na yupela i ranawe?' ²⁰ Moap i sem long em i kisim bikpela bagarap. Singaut na krai bai ol man i helpim yupela. Tokim ol manmeri i stap arere long wara Arnon olsem Moap i bagarap pinis. ²¹ Hevi i kamap pinis long mauten ples bilong Holon, Jasa na Mefat, ²² long Dibon, Nebo na Bet Diblataim, ²³ long Kiriataim, Bet Gamul na Bet Meon, ²⁴ long Kiriot, na Bosra, na long ol biktaun bilong Moap - ol biktaun i stap long longwe na ol biktaun i stap klostu. ²⁵ Ol i katim strong bilong Moap pinis na ol i brukim han bilong em, God Yawe i tok olsem. ²⁶ Mekim em kisim planti wain, em i litimapim em yet long ai bilong God Yawe. Larim Moap i slip antap long traut bilong em yet bai ol i tok bilas na lap long en. ²⁷ Yupela i no bin lap long ol Isarel? Ol i no bin stap olsem ol stil man na yupela tanim het long ol na tok baksait long ol? ²⁸ Lusim ol biktaun na yupela i go long maunten na wokim haus sel long hap bilong Moap. Yupela i olsem balus pisin i sindaun long maus bilong hul bilong ston. ²⁹ Mipela i harim ol tok long ol pasin bilong Moap long hapim em yet i go antap tumas na kisim biknem. ³⁰ God Yawe i tok, mi save long pasin bilong em na toktok bilong en i no save karim kaikai. ³¹ Bai mi singaut bikpela na krai long Moap, na mi bai sori tru long ol Moap. Bai mi singaut bikpela na krai long Kir Hareset. ³² Bai mi krai nogut tru long yu i winim taim mi krai long Jasa, diwai wain bilong Sibma! Ol han bilong yu i slip i go antap long Sol Wara na i go hapsait long Jasa. Ol Man bilong birua i bagarapim ol prut na wain bilong yu. ³³ Olgeta amamas bilong prut bilong graun bilong Moap i lusim yu pinis. Mi bai pasim ol long, i noken kamapim gutpela wain. Bai ol i no inap singaut moa na amamas. ³⁴ Bikpela singaut i kamap long Hesbon i go olgeta long Eleale, ol i harim singaut long Jahas , long Zoa i go long Horonaim na Eglat Shelishiya, long taim wara bilong Nimrim tu i drai pinis. ³⁵ Bai mi pinisim wanem man long Moap i save mekim ofa long maunten bilong kukim ofa bilong smuk smel i go long ol giaman god, God Yawe i tok olsem. ³⁶ Bel bilong mi i krai olsem ol i winim mambu i go long Moap. Bel bilong mi i krai olsem ol i winim mambu i go long Kir Hareset. Olgeta gutpela samting bilong ol i go pinis. ³⁷ Olgeta i katim het grass na maus grass na ol i pasim klos bilong sore. ³⁸ Bikpela singaut na krai i stap long olgeta hap na long antap long het bilong haus bilong ol Moap na ol bikpela haus bilong bung. Mi bagarapim Moap olsem sospen graun man i no laikim, God Yawe i tok olsem. ³⁹ Bikpela bagarap na krai sori ol i mekim. Moap i sem na tanim baksait. Ol bai lap long Moap na ol lain i stap klostu bai pret long wanem samting i kamap long ol. ⁴⁰ God Yawe i tok, birua bai flai i kam olsem tarangau i opim wing bilong en na karamapim Moap. ⁴¹ Birua i banisim na kisim Keriot, wantaim ol taun i gat strongpela banis. Long dispela dei bel bilong ol soldia bilong Moap bai kamap olsem ol mama i pilim pen long karim pikinini. ⁴² Moap bai bagarap na i no moa i stap olsem wanpela ples long wanem em i mekim em yet i kamap birua long God Yawe. ⁴³ Ol manmeri bilong Moap bikpela hevi na bagarap bai kamap long yu. Em God Yawe i tok olsem. ⁴⁴ God Yawe i tok olsem, husait man i pret na ranawe bai pundaun long hul na husait i kam autsait long hul bai hangamap long umben. Taim bilong mi long bekim pei em bai mi mekim olsem. ⁴⁵ Ol manmeri i bin ranawe bai i go hait baksait long Hesbon long wanem ol i nogat strong, paia bai kamap long Hesbon na lait namel long Sihon. Paia bai kukim het bilong Moap na het bilong ol i lain i save hapim ol yet. ⁴⁶ Sori tru long Moap, ol manmeri bilong Semos i bagarap olgeta, ol i kisim ol pikinini man na ol pikinini meri bilong yu i go kalabus. ⁴⁷ Tasol mi bai givim bek olgeta gutpela samting bilong Moap, God Yawe i tok." Olgeta hevi bilong Moap em i pinis nau.