46 ¹ Dispela em i tok bilong God Yawe i kam long profet Jeremaia long ol lain manmeri bilong dispela kantri. ² Dispela i go long ol lain Isip, " Long ples Kekemis long wara Iupret ol ami bilong king Paro Neko ol i stap. Dispela em ol ami we king Nebukatnesa bilong Babilon i pait wantaim ol na winim ol long pait, taim Jeokim pikinini man bilong Josia i stap king bilong Juda long 4 pela krismas. ³ Yupela i kisim ol liklik na bikpela sais sil redi na i go pait. ⁴ Taitim rop long nus bilong ol hos na kalap antap long ol redi wantaim hat kapa long het bilong yupela, sapim bainat na werim olgeta klos pait. ⁵ Gog Yawe i tok aut olsem ol manmeri i pret nogut tru na i ranawe long wanem ol soldia bilong ol i lus long pait. Olsem na olgeta lain i ranawe long sevim laip bilong ol yet na les long tanim bek gen. Olgeta lain long dispela ples i pret narakain tru, ⁶ ol man bilong ran ol i painim hat tru long ran na ol soldia i no inap long ranawe. Ol i paul nambaut i stap long not na pundaun arere long wara Iupret. ⁷ Em ol wanem kain lain i kirap olsem wara Nail, wankain olsem tait wara i ron i go antap na i kam daun? ⁸ Em ol Isip ol i kirap olsem wara Nail i save tait i go antap na pundaun i kam daun. Isip i tokaut olsem, 'Mi bai kirap na inapim olgeta hap bilong graun. Mi bai bagarapim olgeta samting i stap insait long biktaun bilong ol. ⁹ Ol soldia bilong Kus na Put wantaim ol save man bilong pait long sil, ol i bumg wantaim ol lain Ludim husait i gat save long pait long bunara,ol i kalap long hos na karis na i go long pait.' ¹⁰ Dispela dei em bai i kamap dei we bikpela God Yawe bai helpim mipela long pait long bekim bek ol nogut ol birua i bin mekim long mipela, olgeta bainat bilong ol bai i kaikaim ol na ol bai i pulap. Em bai dringim blut bilong ol birua long inapim tingting bilong ol. Bihain long dispela ol bai givim ofa long God Yawe bikpela long wara Iupret long ples not. ¹¹ Ol yanpela meri bilong Isip husait i no bin silip wantaim man yet i go long Gilet na i kisim marasin i kam, tasol em i no gutpela tumas olsem yupela i putim planti marasin bilong wanem em bai i no inap oraitim sik bilong yupela. ¹² Ol kantri i bin harim dispela nogut we i bin kamap, olgeta man long dispela graun i sori na krai long ol soldia husait i lus long pait na ol soldia i wokabaut sapotim ol yet taim ol i pundaun." ¹³ Dispela em tok we God Yawe i tokim profet Jeremaia, taim Nebukatnesa king bilong Babilon i kam long pait long graun bilong Isip. ¹⁴ "Tokim ol lain Migdol, Mempis na Tapanes long Isip olsem, 'Kisim was na redim yu yet bilong wanem ol bainat bilong birua bai i bagarapim husait i stap klostu long yu.' ¹⁵ Olsem wanem na ol strongpela lain bilong yupela i lukluk i go daun long graun? Ol bai i no inap sanap bilong wanem mi, God Yawe i pusim ol i go daun long graun. ¹⁶ Em i apim namba bilong ol man i pundaun nambaut na olgeta bilong ol yet i no inap sapotim ol yet. Olgeta i tok olsem, 'Yumi mas kirap na i go bek long as ples bilong yumi we ol lain bilong yumi yet i stap long en. Yumi mas lusim dispela bainat we em i no helpim mipela.' ¹⁷ Ol i tok aut olsem, 'Fero king bilong Egypt em tasol i bikmaus na em i lidim ol karangi liklik.' ¹⁸ King i tok aut olsem mi stap laip, Husait em dispela man nem bilong em God Yawe bikpela, ating wanpela man i mas wankain olsem maunten Tabo na maunten Kamel i stap arere long sol wara. ¹⁹ Husait yu stap long Isip, yu mas kisim ol kago bilong yupela long i go long kalabus. Bilong wanem ples Mempis em i no moa gutpela, em i bagarap na i no gat wanpela man bai stap long hap. ²⁰ Isip i olsem wanpela naispela yangpela bulmakau, tasol wanpela binatang bilong kaikaim man i kam long not. ²¹ Namel long ol i gat ol soldia i kam long helpim, ol i wankain olsem ol patpela bulmakau, tasol ol i no inap long pait, ol tu bai i ranawe bilong wanem taim nogut bai i kamap long bagarapim na mekim save long ol. ²² Ol Isip i toktok isi na i wokabaut long bel bilong ol olsem snek, long wanem ol birua bilong ol i kam long pait long ol. Ol birua bilong ol i pait long ol wankain olsem ol i holim tamiok i kam long katim ol diwai. ²³ God Yawe i tok aut olsem, ol bai katim ol nambaut wankain olsem bus diwai maski em bik bus. Long wanem ol birua i planti tumas i winim namba bilong ol grasopa na hat tru long kauntim. ²⁴ Ol bai tok bilas long ol pikinini meri bilong ol Isip long wanem ol man long not bai kam kisim ol i go." ²⁵ God Yawe bikpela, dispela God bilong Isreal i tok olsem, "Lukim, mi laik mekim save long Amon ol lain bilong Tebes na king Fero wantaim ol giaman god bilong ol we ol i save bilip long en. ²⁶ Mi givim ol i go long han bilong Nebukatnesa, king bilong Babilon na wok man bilong ol we ol bai mekim save long ol. Bihain long dispela ol Isip bai i kam sindaun olsem bifo ol i bin mekim, dispela em God Yawe i tok. ²⁷ Tasol wokman bilong mi Jekob yu no ken pret. Israel yu no ken tingting planti, lukim mi laik kisim yu i go bek long ples long we na ol pikinini bilong yu i stap long ples kalabus bai kam bek. Olsem Jekob bai i kam bek painim bel isi na ol bai i orait gen na bai ol i no inap pret gen. ²⁸ God Yawe i tok olsem, wok man bilong mi Jekob yu noken pret,mi stap wantaim yu. Mi bai bringim bikpela bagarap long ol kantri i laik traim long mekim birua wantaim yu, long ples we mi putim yu. Tasol mi bai i no inap bagarapim yu olgeta, tasol mi bai stretim yu tasol, tru tumas mi bai i no inap mekim save long yupela."