9
1
Abimelek pikinini bilong Jerub Bal i go long ol wanblut bilong mama bilong em long Sekem na i tokim ol na olgeta wanlain long famili bilong mama bilong en.
2
"Plis tokim olgeta olsem, inap olgeta lida bilong Sekem i ken harim, 'Wanem i gutpela long yupela, long olgeta 70-pikinini bilong Jerub Bal i bosim yupela o wanpela bilong ol i bosim yupela? Tingim, mi pikinini na blut bilong yupela tu."
3
Ol lain famili bilong mama bilong em i toktok wantaim olgeta lain lida bilong Sekem na olgeta i wanbel long bihainim Abimelek, long wanem ol i tok, "Em i brata bilong mipela."
4
Na ol famili bilong mama i givim em 70 silva mani ol i kisim long haus lotu bilong Bal Berit. Abimelek i kisim dispela mani na baim ol man bilong bikhet na sakim tok, na ol dispela man nogut i bihainim em.
5
Abimelek i go long haus bilong papa bilong em long Ofra na i kilim 70 ol brata bilong em antap long wanpela bikpela ston, em ol pikinini bilong Jerub Bal. Tasol wanpela yangpela pikinini man bilong Jerub Bal i hait, olsem na ol i no kilim em.
6
Olgeta lida bilong Sekem na Bet Milo kam bung wantaim na i go makim Abimelek i kamap king, arere long diwai ok i stap klostu long ston long Sekem.
7
Taim Jotam i harim dispela, bihain em i go sanap antap long Maunten Gerisim. Em i singaut strong long ol na i tok, "Harim mi, yupela lida bilong Sekem na bai God Yawe i ken harim yupela.
8
Wanpela taim ol diwai i go bilong makim king bilong ol. Olsem na ol i tokim diwai oliv, 'Yu kamap king bilong mipela!'
9
Tasol oliv diwai i tokim ol, 'Bai mi lusim wok bilong givim oil long givim biknem long ol god na manmeri, long kamap olsem bos bilong ol arapela diwai a?'
10
Na ol diwai i tokim diwai fik, 'Yu kamap king bilong mipela!'
11
Tasol fik diwai i tok, 'Bai mi lusim swit na gutpela kaikai bilong mi long i go bek na kamap king bilong ol arapela a?'
12
Na ol diwai i tokim wain, 'Yu kamap king bilong mipela!'
13
Na wain i tokim ol, 'Bai mi lusim pasin bilong karim wain bilong givim biknem long ol god na manmeri na kamap olsem king bilong ol narapela diwai a?'
14
Na olgeta diwai i tok long ol liklik diwai i gat nil, 'Yu kamap king bilong mipela!'
15
Na nil diwai i tok ,'Sapos i tru yupela i laik makim mi long kamap king bilong yupela, orait yupela kam na hait long mi. Nogat larim paia kam long mi na kukim olgeta strongpela diwai sida bilong Lebanon.'
16
Sapos nau yupela i mekim gutpela pasin long makim Abimelek long kamap king, na sapos yupela i mekim gut long Jerub Bal na ol pikinini na sapos yu mekim save long em long ol pasin em i mekim
17
na tingim wanem papa bilong mi i bin pait long yupela na lusim laip long helpim yupela na pait wantaim ol Midia.
18
Nau yupela birua pinis long papa na ol famili bilong mi, long wanem yupela kilim pinis papa, na 70 pikinini man antap long wanpela ston. Na yupela i makim Abimelek pikinini bilong wokmeri i kamap king long lukautim yupela ol lida bilong Sekem long wanem em i brata bilong yupela.
19
Sapos yupela i bin wokim stretpela pasin long save bilong yupela long Jerub Bal na ol pikinini bilong en, orait yupela i ken amamas wantaim Abimelek na em i ken amamas wantaim yupela.
20
Sapos nogat, larim paia kam aut long Abimelek na kukim ol man bilong Sekem na Bet Milo. Na larim paia i kam aut long ol man bilong Sekem na Bet Milo i ken kukim Abimelek."
21
Jotam i ranawe na kamap long Ber long wanem, em i ples longwe long brata bilong em Abimelek.
22
Na Abimelek i stap king bilong Israel long tripela krismas.
23
Na bihain God i salim spirit nogut i kamapim kros namel long Abimelek na ol lida bilong Sekem. Ol lida bilong Sekem i lusim Abimelek na i no bihainim tok bilong em.
24
God i mekim dispela long bekim 70 pikinini bilong Jeru Bal ol i kilim na Abimelek brata bilong ol i gat asua long kilim ol brata bilong em, na ol man bilong Sekem i gat asua long helpim na kilim ol brata bilong em.
25
Olsem na ol lida bilong Sekem i hait antap long maunten bilong pait long em na ol i stilim ol samting bilong man i go abrusim ol long dispela rot. Dispela tok i go kamap long Abimelek.
26
Gal pikinini bilong Ebet i kam wantaim ol famili bilong em na ol i go olsem long Sekem na ol lida bilong Sekem i bihainim em.
27
Ol i go long gaden wain bilong ol na bungim wain i mau pinis na memeim olgeta na mekim bikpela pati long haus bilong god bilong ol. Ol i kaikai na dring na ol i tok baksait long Abimelek.
28
Gal pikinini bilong Ebet i tok, "Husait em Abimelek na husait em Sekem na bai yumi bihainim? Em i pikinini bilong Jerub Bal o em i ofisa bilong Sebul? Mipela inap i stap aninit long Hamor papa bilong Sekem! Bilong wanem mipela aninit long Abimelek?
29
Em i laik bilong mi sapos olgeta lain man i harim tok na bihainim mi, orait mi inap rausim Abimelek. Na mi inap tokim Abimelek 'singautim ol ami bilong yu.'
30
Taim Sebul ofisa bilong biktaun i harim tok bilong Gal pikinini bilong Ebet em i belhat nogut tru.
31
Em salim ol man i go long giamanim Abimelek olsem, "Lukim, Gal pikinini man bilong Ebet wantaim ol lain bilong em bai kam long Sekem na ol i pasim tok long biktaun long bagarapim yu.
32
Kirap nau long nait na yu wantaim ol soldia i ken i go hait long ples kunai klostu long biktaun.
33
Long monin taim tru san i no go antap yet, kirap hariap na go kirapim pait long biktaun. Taim em wantaim ol lain bilong em i kam aut long pait wantaim yu, mekim tasol wanem yu ting long mekim long ol."
34
Olsem na Abimelek i kirap long nait wantaim olgeta man i stap wantaim em. Na ol i skelim i go 4 pela hap na kirapim pait long Sekem.
35
Gal pikinini bilong Ebet i go aut na sanap long maus rot i go long geit bilong biktaun na Abimelek wantaim ol man husait i stap wantaim em i kirap kam aut long ples hait bilong
36
ol.Taim Gal i lukim ol man em i tokim Jebul, "Lukim, ol man i kam daun olsem long maunten!" Jebul i tokim em, "Yu lukim ol tewel bilong ol maunten na yu ting ol man."
37
Gal i tok gen, 'Lukim, ol man i bihainim kil bilong maunten i kam daun, na narapela hap lain i bihainim rot i kam long ok diwai bilong ol glasman."
38
Na Sebul i tok long em, "Yu save amamas long ol tok bilong yu olsem, 'Abimelek em husait na ol man i save bihainim em?' Nogut em ol dispela lain yu save tok baksait? Go na pait wantaim ol nau."
39
Gal i go aut na em i go pas long ol man bilong Sekem na pait long Abimelek.
40
Na Abimelek i ronim em na Gal i ranawe i go pas long em. Planti kisim bikpela bagarap long maus rot i go long dua bilong biktaun.
41
Abimelek i go stap long Aruma olsem na Sebul i hariapim ol wanlain bilong em i go longwe long Sekem.
42
Long narapela dei ol manmeri bilong Sekem i ranawe i go long gaden bilong ol na tok i go kamap long Abimelek.
43
Em i kisim ol lain bilong em na i skelim ol long tripela hap na ol i go hait long ples kunai long gaden bilong ol. Em lukim ol manmeri kam aut long biktaun na em i go kirapim pait na kilim ol.
44
Abimelek na ol lain man i stap wantaim em i pasim maus rot bilong geit i go long biktaun. Narapela tupela hap lain man i go kirapim pait long ples kunai long gaden na kilim olgeta manmeri.
45
Abimelek i pait wantaim ol lain man bilong biktaun long dispela dei na winim biktaun na kilim olgeta manmeri stap insait. Em i bagarapim olgeta biktaun na tromoi sol long en.
46
Taim olgeta lida long taua bilong Sekem i harim, sampela manmeri i go insait long strongpela haus bilong El Berit.
47
Ol i tokim Abimelek long ol lida bilong biktaun i bung wantaim long taua bilong Sekem.
48
Abimelek i go antap long Maunten Salmon, em na olgeta lain stap wantaim em. Abimelek i kisim tamiok na katim han bilong diwai na putim long sol bilong em na tokim ol man i stap wantaim em, "Wanem yupela i lukim mi mekim, yupela tu hariap na mekim."
49
Olsem na olgeta katim han bilong diwai na bihainim Abimelek. Ol i go bungim long banis bilong taua na wokim paia long ol manmeri i stap long taua bilong Sekem na ol tu i dai, olgeta olsem wan tausen man na meri.
50
Bihain Abimelek i go long Tebes na em i go stap klostu long Tebes na kisim dispela ples.
51
Tasol i gat strongpela taua i stap antap long biktaun, na ol man na meri na ol lida bilong biktaun i go hait na pasim ol yet insait, na i go antap long rup bilong taua.
52
Abimelek i go kamap long taua na pait inap em kam klostu long dua bilong taua na kukim.
53
Tasol wanpela meri i pusim wanpela ston bilong brukim wit pundaunim antap long het bilong Abimelek na i brukim het bilong em.
54
Na em kwiktaim singautim yangpela man bilong holim spia bilong em na i tokim em, "Pulim bainat bilong yu na kilim mi na bai nogat man i tok long mi olsem, 'Wanpela meri i kilim em."' Olsem na yangpela man i sutim em long bainat na em i dai.
55
Taim olgeta man bilong Israel i lukim Abimelek i dai, olgeta i lusim na go long ples bilong ol.
56
Long dispela pasin God Yawe i bekim pasin nogut bilong Abimelek wankain olsem em i mekim long papa bilong em na 70 ol brata bilong em.
57
God Yawe i bekim olgeta pasin nogut bilong ol man Sekem olsem bipo Jotam pikinini bilong Jerub Bal, i tok bai ol Sekem i kisim bagarap na dispela i kamap olsem em i tok.