19 ¹ Long dispela taim i nogat king long Israel, i gat wanpela man bilong Livai i stap longwe long ples maunten bilong Efraim. Em i kisim wanpela meri bilong Betlehem long Juda olsem narapela meri bilong em. ² Tasol dispela namba tu meri i no aninit long em, meri i lusim em na i go bek long haus bilong papa bilong em long Betlehem bilong Juda. Em i go stap 4-pela mun olgeta. ³ Orait man bilong em i bihainim em i go bilong stretim tok wantaim em na kisim em i kam bek. Em i kisim wanpela wokboi bilong em wantaim tupela donki. Dispela meri i kisim em i go insait long haus bilong papa bilong em. Papa bilong meri i lukim em na i amamas. ⁴ Tambu bilong em, papa bilong meri bilong em i strong long em bai i stap tripela dei. Ol i kaikai na dring na ol i stap long hap. ⁵ Long namba 4 dei ol i kirap long moning tru na i redi long i go tasol papa bilong meri i tokim tambu bilong en olsem, ''Yu kaikai liklik bret na strongim yu yet pastaim, bihain yu ken i go.'' ⁶ Olsem na tupela i sindaun wantaim long kaikai na dring. Orait papa bilong meri i tokim em, ''Yu stap gen wanpela nait na yumi kaikai na amamas.'' ⁷ Taim Livai i kirap long i go, papa bilong meri i strong long em i stap, olsem na em i senisim tingting na em i slip wanpela nait gen. ⁸ Long namba 5 dei em i kirap long moning tru na i laik go, tasol papa bilong meri i tok, ''Kaikai pastaim na wet inap long apinun. ''Olsem na tupela i kaikai. ⁹ Taim dispela Livai na narapela meri bilong em na wokboi bilong em i kirap long i go, tambu bilong em, papa bilong meri i tokim em, ''Lukim nau em i go apinun pinis. Yupela i stap narapela nait moa na yupela i amamas. Tumora yupela i ken kirap long moning tru na i go bek long ples.'' ¹⁰ Tasol Livai i no laik long slip gen. Em i kirap na i go. Em i go olsem long Jebus ( narapela nem bilong Jerusalem ). Em i kisim tupela donki i gat setel long baksait bilong en, namba tu meri bilong em i go wantaim em. ¹¹ Taim ol i go kamap klostu long Jebus, klostu san i laik go daun na wokboi i tokim bosman bilong em, ''Kam, yumi go insait long biktaun bilong ol Jebus na yumi slip long nait.'' ¹² Bosman bilong em i tokim em, ''Yumi i no inap i go insait long biktaun bilong ol narapela lain, ol i no lain bilong ol Israel. Bai yumi go long Gibia. ¹³ Livai i tokim dispela yangpela man, ''Kam, yumi go slip long ol dispela ples, long Gibia o long Rama.'' ¹⁴ Olsem na ol i wokabaut i go, ol i go kamap klostu long Gibia long hap graun bilong Benjamin na san i go daun. ¹⁵ Ol i lusim rot na i go insait long slip long Gibia. Ol i go insait na sindaun long ples bilong bung, tasol i nogat man i kisim ol i go long haus long slip. ¹⁶ Tasol wanpela lapun man i kam bek long gaden bilong em long apinun. Em i bilong ples maunten bilong Efraim, tasol em i go stap long Gibia. Ol man i stap long dispela ples em ol lain bilong Benjamin. ¹⁷ Em i lukim ol i sindaun i stap long ples bilong bung. Dispela lapun man i tok, ''Yupela i laik go long wanem hap? Yupela i kam long wanem hap?'' ¹⁸ Dispela Livai i tokim em, ''Mipela i kam long Betlehem long Juda na i laik go long ples maunten bilong Efraim, em ples bilong mi. Mi go long Betlehem long Juda na mi laik i go long haus bilong God Yawe. Tasol i nogat wanpela man i laik kisim mi i go long haus bilong em. ¹⁹ Mipela i gat kaikai bilong donki na i gat bret na wain bilong mi na wokmeri bilong yu na bilong dispela yangpela man wantaim ol wokman bilong yu. Mipela i no sot long wanpela samting.'' ²⁰ Lapun man i tok, ''Bel isi i stap wantaim yupela. Bai mi lukautim yupela long olgeta samting. Yupela i noken slip long ples bilong bung.'' ²¹ Dispela man i kisim Livai i go long haus bilong em na givim kaikai long ol donki. Ol i wasim lek bilong ol na ol i kaikai na dring. ²² Taim ol i kaikai na amamas i stap, sampela man bilong biktaun, ol man nogut i banisim haus na i paitim dua. Ol i tokim dispela lapun man em papa bilong haus na ol i tok, Salim dispela man i kam istap long haus bilong yu i kam autsait na bai mipela koapim em. ²³ Dispela man em papa bilong haus, i go autsait na i tokim ol, Nogat, ol brata bilong mi, yupela i noken mekim dispela pasin nogut. Mi lukautim dispela man long haus bilong mi, yupela i noken mekim dispela kain pasin nogut. ²⁴ Lukim, yangpla pikinini meri bilong mi na narapela meri bilong em i stap hia. Bai mi kisim ol i kam autsait nau. Yupela i ken pinisim laik bilong yupela. Tasol yupela i no ken mekim dispela kain pasin nogut long dispela man. ²⁵ Tasol ol man i no harim tok bilong em olsem na dispela man i kisim namba tu meri bilong em yet na kisim i kam autsait long ol. Ol i koapim em na mekim ol kainkain pasin nogut long em long nait i go inap long tulait na ol i lusim em i go. ²⁶ Long tulait dispela meri i kam na pundaun long dua bilong haus bilong lapunman, em haus man bilong em i slip long en na em i slip long hap inap san i kam antap. ²⁷ Man bilong em i kirap long moning na opim dua bilong haus na i go ausait long i go. Em i lukim namba tu meri bilong em i slip istap long dua, han bilong em i holim dua istap. ²⁸ Livai i tokim em, '' Yu kirap na yumi go.'' Tasol meri i no bekim tok. Em i putim bodi bilong meri antap long donki na em i go long ples bilong em. ²⁹ Taim Livai i kam kamap long haus bilong em, em i kisim wanpela naip na i kisim bodi bilong namba tu meri bilong em na i katim hap hap inap 12- pela hap olgeta na i salim i go long olgeta hap bilong Israel ³⁰ Ol man i lukim dispela na i tok, ''Kain samting olsem i no bin kamap o mipela i no bin lukim kain samting olsem bipo long taim ol Israel i lusim Isip i kam inap long nau. Yupela i tingting olsem wanem. Yupela tok. Bai yumi mekim wanem.''