16 ¹ Wanpela taim, Samson i go long ples Gasa na lukim wanpela rot meri, na em i go long slip wantaim em. ² Ol lain Gasa i harim olsem, "Samson i kam stap pinis long ples." Ol lain Gasa i raunim dispela ples na stap hait long holim Samson. Ol putim was na stap isi long geit bilong dispela biktaun na ol i tok olsem, "Mipela bai weit long em inap tulait i bruk, bai yumi holim em na kilim em." ³ Samson stap wantaim dispela meri i go inap biknait tru, na em kirap i go kamautim geit dua bilong biktaun na tupela pos bilong geit wantaim ain, na em putim long solda bilong en, na kisim i go antap long het bilong mauten i stap klostu long ples ⁴ Hebron. Bihain long sampela taim i go pinis, Samson i stat long laikim wanpela meri i save stap long daun ples long Sorek, nem bilong en Delaila. ⁵ Ol lida man long Filistia i go long dispela meri na ol i grisim em na tok, "Yu mas traim painim aut na save long wanem hap stret Samson i save kisim strong, na mipela bai save long wanem wei bai mipela inap long daunim strong bilong en, na taitim em long daunim em i go daun. Yu mas mekim dispela wok, na mipela wan wan man bai givim yu 1,100 silva moni." ⁶ Na bihain, Delaila i askim Samson, "Inap yu tokim mi long wanem samting i mekim yu i stap strongpela man tru, na taim ol man i taitim yu long rop bai yu soim strong bilong yu olsem wanem?" ⁷ Samson i tokim Delaila, "Sapos ol taitim mi wantaim 7pela nupela bunara rop i no draim long en, em bai mi lusim strong na stap olsem man nating." ⁸ Orait ol lida man bilong Filistia i go long Delaila na givim em 7pela nupela bunara rop ol i no draim long en. Delaila i haitim ol dispela man long rum bilong en, ⁹ na taitim Samson wantaim rop. Orait Delaila i singaut na tok, "Samson, "Ol Filistia i kam pinis long kilim yu?" Samson i brukim ol dispela rop olsem paia i holim liklik rop. Em olsem na ol i no panim aut hait samting bilong en. ¹⁰ Orait Delaila i tokim Samson olsem, "Olsem wanem na yu bin giamanim mi long tok giaman bilong yu, nau yu mas tokim mi tru, long wanem rot ol man bai daunim strong bilong yu." ¹¹ Samson i tokim em, "Sapos yu pasim rop na taitim mi wantaim nupela rop ol man i no yusim yet, em bai mi lusim strong na stap olsem man nating." ¹² Olsem na Delaila i kisim ol nupela rop na taitim raunim Samson na singaut na tok, "Samson, ol Filistia i kam stap pinis long kilim yu." Ol birua i stap hait yet long rum bilong Delaila. Em olsem tasol, Samson i brukim ol dispela rop long han olsem liklik rop. ¹³ Delaila i tokim Samson, "Yu bin giamanim mi i kam inap nau, tokim mi tru, long wanem rot ol man bai daunim strong bilong yu." Samson i tokim em olsem, "Sapos yu pasin het gras bilong mi long 7pela hap na pasim strong wantaim pin, bai mi kamap wankain olsem ol narapela man." ¹⁴ Taim Samson i slip, Delaila pasim het gras bilong Samson bihainim stret wanem samson i tokim em. Na bihain Delaila i singaut na tok, "Samson, ol Filistia i kam stap pinis long kilim yu!" Em i kirap long slip na rausim pin long het gras em pasim long en. ¹⁵ Delaila i tokim Samson, "Taim yu tok olsem, 'yu laikim mi,' yu save giamanim mi, long wanem yu no tokim mi hait samting bilong yu. Yu giamanim mi pinis 3 pela taim. Yu no tokim mi, long wanem hap yu save kisim strong." ¹⁶ Olgeta taim Delaila i save tok hat na strong long Samson, na Samson i save tingting planti. ¹⁷ Olsem na Samson i tokim Delaila hait tok bilong em. Samson i tokim em olsem, "Mi no bin katim het gras bilong mi wanpela taim long resa, long wanem, mi stap long bel bilong mama na promis pinis olsem man bilong God. ¹⁸ Taim Delaila i harim pinis tok hait Samson i tokim em, Delaila i salim tok i go long ol lida man bilong Filistia na i tok olsem, "Yupela mas kam antap gen, Samson i tokim mi olgeta hait tok bilong en pinis." Orait ol lida man bilong Filistia i holim silva moni wantaim ol i go antap long em. ¹⁹ Delaila i mekim Samson i ai slip na em i slip putim het bilong em long tais bilong en. Em singautim wanpela long kam katim het gras long 7pela hap em i pasim. Samson i stat long bihainim tok bilong Delaila, long wanem strong bilong Samson i lusim em pinis. ²⁰ Delaila i singaut strong long Samson, "Ol man long Filistai i kam pinis!" Samson i kirap long slip bilong en, na em i tingting olsem, em bai ranawe, olsem em i save mekim, tasol em i no save olsem God Yawe i lusim em pinis. ²¹ Ol Filistai i holim Samson na kamautim tupela ai bilong em, na kisim em i go daun long ples Gasa na ol i pasim em wantaim hankad igat lok, na em i tanim bikpela ston i raunim insait long haus kalabus. ²² Tasol het gras bilong em i stat long kamap gen. ²³ Orait, Ol lida man bilong ol Filistai ol i kam bung wantaim, na ol i mekim ofa i go long Dagon long hamamas, em giaman god bilong ol na ol i tok olsem, " Em god bilong yumi tasol i kisim birua bilong yumi, Samson na i givim yumi." ²⁴ Taim ol manmeri i lukim Samson, ol i givim biknem long god bilong ol na tok, "Em god bilong yumi tasol i winim pait na givim dispela birua i kam long han bilong mipela, man husait i save bagarapim kantri bilong yumi na kilim planti bilong yumi pinis." ²⁵ Taim ol amamas, ol i tok olsem, "Singautim Samson long kam na mekim yumi hamamas." Ol i kisim samson i kam aut long haus kalabus na putim em namel long tupela pos haus i sanap long en, na em i mekim ol amamas long tok pilai. ²⁶ Samson i tokim yanpela boi, husait i holim han bilong en, "Inap yu helpim mi long mi ken holim han long tupela pos haus i sanap long en, na bai putim baksait long en." ²⁷ Insait long dispela haus i pulap long ol manmeri, na ol lida bilong Filistia tu. Namba bilong olgeta manmeri i stap insait long dispela haus inap long 3,000 manmeri, taim Samson i hamamasim ol i stap. ²⁸ Samson i beten i go long God Yawe, "Bikpela God Yawe, yu tingim mi, yu God bilong mi, givim mi strong wanpela taim gen inap mi bekim bek ol Filistia wanpela taim tasol long tupela ai ol i bin kamautim." ²⁹ Samson i holim tupela pos haus i sanap long en, na baksait em i bin putim long en, em i putim em yet i go pas long dispela tupela pos, na han kais bilong em i holim narapela pos na long han sut, em holim narapela pos. ³⁰ "Mi bai dai wantaim olgeta Filistia!" Samson i tok olsem, na em i pusim strong dispela pos wantaim olgeta strong bilong em, na haus i pundaun antap long olgeta manmeri i stap insait. Namba bilong ol dispela manmeri i dai wantaim em i winim namba bilong ol manmeri, em bin laip yet na kilim ol. ³¹ Bihain ol brata bilong em na ol lain bilong papa bilong em i kam daun na kisim Samson i go bek na planim em namel long ples Sora na long ples Estaol long matmat bilong papa bilong en Manoa. Samson i kamap hetman bilong Israel na stap i nap 20 yia.