15 ¹ Sampela de bihain long taim bilong katim wit Samson kisim wanpela yangpela meme na em igo lukim meri bilong em. Em tok long em yet olsem, "Bai mi go long rum bilong meri bilong mi." Tasol papa bilong meri ino larim em igo insait. ² Papa bilong meri tok, " Mi ting yu no laikim tru meri bilong yu, olsem na mi givim em long pren bilong yu. Liklik susa bilong em i naispela tru winim bikpela susa bilong em, a? Yu ken maritim em" ³ Samson tokim ol," Dispela taim bai mi no pilim mi mekim rong long ol Pilistai, taim mi givim hevi long ol.'' ⁴ Samson go aut na holim pas 300 wel dog na em i pasim tel bilong tupela wantaim. Long namel bilong tupela tel i pas long en em kisim ol bombom na pasim wantaim tupela tel. ⁵ Taim em laitim paia, pinis em larim ol wel dok igo insait long ol gaden wit bilong ol Pilistia, na paia i kukim ol wit ol ikatim pinis na bungim istap wantaim ol wit i sanap yet long gaden, na wantaim ol diwai wain na ol diwai oliv. ⁶ Ol Pilistia i askim, "Husat i mekim olsem?" Ol i tokim ol " Samson, tambu man bilong Timnit, em i mekim olsem long wanem Timnit kisim meri bilong em na givim igo long pren bilong em." Orait ol Pilistia igo na kukim meri wantaim papa bilong em. ⁷ Samson tokim ol, " Sapos yupela i laik mekim olsem, bai mi bekim long yupela, na taim mi mekim pinis, orait bai mi lusim.'' ⁸ Em kilim ol na bagarapim ol nogut tru em i katim bodi bilong ol i go liklik liklik, ol bun bilong baksait na ol bun samting long lek bilong ol. Na em igo na stap insait long hul bilong ston long sait long maunten Etam ⁹ Orait ol Pilistia kam antap long Juda na redi long pait wantaim ol na ami bilong ol i wokim kem long Lehi. ¹⁰ Ol man bilong Juda itok, " Bilong wanem yupela kam long pait wantaim mipela?" Ol bekim tok, " mipela kirapim pait long holim pas Samson, na mekim long em wanem em ibin mekim long mipela.'' ¹¹ Orait 3000 man bilong Juda go kamap long hul bilong ston long maunten sait bilong Etam na ol i tok long Samson, " Yu save o nogat, mipela istap aninit long ol Pilistia? Yu mekim wanem long mipela?" Samson tokim ol olsem " Ol i mekim long mi, na mi mekim long ol" ¹² OL tokim Samson,"Mipela kam daun long holim pas han lek bilong yu na givim yu i go long han bilong ol Pilistia.'' Samson tokim ol Juda, " Yupela i mas promis long mi olsem yupela yet ino inap kilim mi" ¹³ Ol i tokim em,"Nogat, mipela bai pasim yu long rop tasol na givim yu igo long han bilong ol Pilistia. Mipela i promis mipela bai ino inap kilim yu." Orait ol i pasim em wantaim tupela nupela rop na kisim em i kam aut long hul bilong ston. ¹⁴ Taim em kamap long Lehi ol Pilistia singaut ikam long bungim em. Orait Spirit bilong God Yawe ikam long em wantaim bikpela strong. Ol rop i pasim tupela han bilong em i lus nating na pundaun olsem rop paia i kukim pinis. ¹⁵ Samson painim wanpela nupela wasket bun bilong donki, na em i apim na kilim 1000 man wantaim dispela bun. ¹⁶ Samson itok, "Wantain wasket bun bilong donki, hipim bodi bilong ol igo antap antap, wantaim wasket bun bilong donki mi kilim pinis 1000 man." ¹⁷ Taim Samson i pinisim toktok bilong em, em i tromoi wasket bun bilong donki i go, na em i kolim nem bilong dispela ples Ramat Lehi. ¹⁸ Nek bilong Samson i drai tru na em i singaut long God Yawe na i tok, "Yu bin givim mi wokman bilong yu bikpela strong na mi winim ol birua pinis. Tasol nau bai mi dai long wara na bai mi pundaun long han bilong ol man ol i no bin katim skin bilong ol?'' ¹⁹ God Yawe i brukim graun op long ples Lahi na wara ikam aut. Taim em i dring dispela wara em kirap na strong bilong em ikam bek gen long em. Olsem na em ikolim nem bilong hap ples En Hakore, na em stap yet long Lehi nau. ²⁰ Samson stap hetman bilong ol Israel 2o krismas taim ol istap aninit long ol Pilistia.