14 ¹ Wanpela taim Samson i go daun long taun Timna na long dispela hap em i lukim wanpela meri, em wanpela bilong ol pikinini meri bilong ol Filistia. ² Na taim em i kam bek, em i tokim papa na mama bilong en, ''Mi lukim wanpela meri long Timna, wanpela bilong ol pikinini meri bilong ol Filistia. Nau kisim em i kam long kamap meri bilong mi.'' ³ Tasol papa na mama bilong Samson i tokim em, ''Ating i nogat wanpela meri namel long pikinini meri bilong ol lain femili, o namel long ol lain manmeri bilong yumi yet a? Yu laik kisim meri Filistia long ol lain i no katim skin a?'' Na Samson i tokim papa bilong em, ''Kisim dispela meri na givim mi, long wanem, taim mi lukim dispela meri, em i luk naispela tru long mi.'' ⁴ Tasol papa na mama bilong em i no save olsem dispela em i laik bilong God Yawe, long wanem, em i laik kamapim wanpela hevi namel long ol Filistia (long dispela taim ol Israel i bin stap aninit long ol Filistia). ⁵ Na taim Samson i go daun long Timna wantaim papa na mama bilong em, ol i kam kamap long gaden wain bilong Timna. Na, hariap tru wanpela yanpela laion i singaut kam antap na kros long em. ⁶ Spirit bilong God Yawe i givim strong long em na em i go holim laion na brukim laion long han tasol olsem man i brukim liklik meme, na em i no bin gat wanpela samting long han bilong em. Tasol em i no bin tokim papa na mama bilong em long wanem samting em i bin mekim. ⁷ Na em i go toktok wantaim dispela meri na taim em i lukim meri, Samson i laikim na amamas tru long em. ⁸ Bihain long sampela de i go pinis taim em i go daun long maritim dispela meri, em i tanim i go long sait long lukim ol bun na pipia samting bilong laion. Em i lukim ol planti bi na hani insait long pipia bilong skim na bodi bilong laion. ⁹ Em i go klostu na sigirapim sampela hani long han bilong em na i go, em kaikai yet wantaim na i go. Taim em i go kamap long papa na mama bilong em, em i givim sampela long ol na tupela i kaikai. Tasol em i no tokim ol olsem em i kisim hani long wanem ol pipia i stap long skin na bodi bilong laion. ¹⁰ Papa bilong Samson igo daun long ples meri i stap long en na Samson i givim marit kaikai long hap, long wanem, dispela em i kastom bilong ol yangpela man. ¹¹ Kwik taim, taim ol femili bilong meri i lukim em, ol i kisim 30 man long lain bilong ol yet long stap wantaim em. ¹² Samson i tokim ol olsem, ''Larim mi i tokim yupela wanpela tok bokis. Sapos wanpela bilong yupela i ken painim aut as bilong tok bokis na tokim mi insait long dispela 7 pela de bilong marit kaikai, bai mi givim 30 gutpela laplap na 30 gutpela klos. ¹³ Tasol sapos yupela i no givim mi as bilong tok bokis , orait bai yupela i givim mi 30 gutpela laplap na 30 gutpela klos,'' Ol i tokim em olsem, ''Tokim mipela tok bokis bilong yu na mipela i ken harim.'' ¹⁴ Na em i tokim ol, ''Long samting bilong kaikaim man, igat gutpela samting bilong kaikai na long samting i strong tumas, i gat samting i swit tru,'' Tasol ol lain ol i bin singautim ol long kam long marit kaikai i no painim as bilong tok bokis insait long 3 pela de. ¹⁵ Long de namba 4 ol i kam long meri bilong Samson na tok, ''Trikim man bilong yu na bai em i tokim yumi as bilong tok bokis, sapos nogat bai mipela i kukim haus bilong yu na haus bilong papa bilong yu. Yu singautim mipela kam hia long mekim mipela i kamap rabis tru a?'' ¹⁶ Olsem na meri bilong Samson i wok long i go krai long pes bilong em na i tokim, ''Ating yu kros long mi! Yu no laikim mi moa. Yu bin tokim dispela tok bokis long sampela ol lain bilong mi, tasol yu no bin tokim mi as bilong tok bokis bilong yu.'' Samson i tokim em, ''Lukim, em olsem, sapos mi no bin tokim papa o mama bilong mi, bilong wanem bai mi tokim yu?'' ¹⁷ Em i krai tasol inap long dispela 7 pela de bilong marit kaikai. Long de namba 7 em i tokim as bilong tok bokis bilong wanem meri i grisim em gut tru. Meri i tokim as bilong dispela tok bokis long ol wantok bilong femili bilong em. ¹⁸ Orait klostu long san i go daun long de namba 7 ol man bilong biktaun i tokim em. ''Wanem samting i winim swit bilong hani? Na wanem samting i winim strong bilong laion?'' Samson i tokim ol, ''Sapos yupela ino bin wok wantaim meri bulmakau bilong mi, bai yupela i no inap painim as bilong dispela tok bokis bilong mi.'' ¹⁹ Na Spirit bilong God Yawe i strongim Samson wantaim pawa. Samson i go daun long taun Askelon na kilim 30 man bilong ol. Em i kisim ol samting bilong ol na givim 30 gutpela klos bilong ol long ol man i bin autim as bilong tok bokis bilong em. Tasol em i bin belhat nogut tru na i go antap long haus bilong papa bilong em. ²⁰ Na ol Filistia i kisim meri bilong Samson na i givim long wanpela bilong ol gutpela pren bilong em ol i bin stap wantaim long marit kaikai.