9 ¹ Bikpela tudak bai i lusim ol lain i stap long bikpela hevi. Bipo em i bin mekim ol Sebulun na ol lain Naptali i sem, tasol bihain em bai mekim ol i amamas gen, long rot i go long solwara na hapsait long wara Jodan na olgeta hap bilong Galili. ² Ol manmeri i wokabaut long tudak i lukim bikpela lait, ol lain i stap long bikpela tudak nau ol i lukim lait. ³ Yu mekim kantri i kamap planti na mekim ol i amamas moa na ol i amamas long ai bilong yu olsem ol i amamas long taim bilong bungim kaikai na olsem long taim ol man i save tilim ol samting ol i kisim long pait. ⁴ Ol dispela hevi, pen na bagarap em ol i karim, em yu brukim olgeta olsem yu bin mekim long taim bilong ol Midian. ⁵ Na olgeta su na ol klos pait i gat blut i pas long ol long pait, bai ol i kukim long paia. wantaim ol kainkain. ⁶ Long wanem wanpela pikinini i kamap, dispela pikinini God i givim long yumi, em bai lukautim olgeta manmeri na em bai i gat ol dispela nem, man bilong givim tingting, Bikpela God, Papa bilong i stap oltaim oltaim na King bilong Bel Isi. ⁷ God Yawe i gat olgeta strong bai mekim olsem, gavman bilong em bai kamap bikpela na ol manmeri bai i stap gut na i no gat pait, em bai sindaun long sia king bilong Devit na bosim ol manmeri bilong em na lukautim ol long gutpela na stretpela pasin long nau na oltaim oltaim. ⁸ Na Bikpela i tok long mekim nogut long Jekop na dispela tok i go long olgeta Israel. ⁹ Na olgeta manmeri bai save long dispela, ol lain bilong Efraim na ol lain i stap long Samaria na i save apim ol yet. ¹⁰ ''Olgeta brik i pundaun pinis, tasol mipela bai katim ston na wokim gen, na ol i katim pinis ol diwai fik, tasol mipela bai senisim na planim diwai sida.'' ¹¹ Olsem na God Yawe bai kirapim bel bilong birua bilong em, King Resin long i kam pait. ¹² Ol Aram long hap san kamap na ol Filistia long hap bilong san i go daun, ol bai bagarapim ol Israel olgeta, belhat bilong em bai i no inap pinis tasol han bilong em bai i stap antap yet. ¹³ Em i mekim save long ol dispela manmeri tasol ol i no tanim na painim God Yawe i gat olgeta strong. ¹⁴ Olsem na God Yawe bai katim het na tel bilong ol Israel na katim han bilong ol diwai pam na ol gras long wanpela dei. ¹⁵ Ol lida na ol bikman em ol het na ol profet i save skulim ol man long tok giaman, em ol tel. ¹⁶ Ol man i save go paslain long ol dispela man i no save soim ol long rot stret na ol dispela lain i bihainim, ol i dai olgeta. ¹⁷ Olsem na Bikpela bai i no inap amamas long ol yangpela man na em i no inap sori long ol pikinini i nogat papa na ol meri man bilong ol i dai pinis, long wanem olgeta i no save long God na i save bihainim pasin nogut na ol i save toktok long ol samting nogut tasol. Olsem na belhat bilong em bai i no inap pinis, tasol em bai apim han yet. ¹⁸ Pasin nogut i lait olsem paia i kukim ol nil gras na ol rop i gat nil na i kukim bikpela bus na i kamapim bikpela smuk. ¹⁹ God Yawe i gat olgeta strong i belhat na i kukim graun na olgeta manmeri i olsem paia wut bilong kukim long paia. Olgeta man i laik bagarapim brata bilong em. ²⁰ Ol bai kisim kaikai long han sut tasol ol bai hangre yet na ol bai kisim kaikai long han kais tasol ol bai i no inap pulap. Wanwan man bai kaikai mit bilong ol pikinini bilong ol yet. ²¹ Manase bai daunim Efraim na Efraim bai daunim Manase na tupela wantaim bai bung na pait long Juda. Belhat bilong God i no pinis nogat em i stap yet. Na em bai apim han yet.