54 ¹ ''Singsing, yu meri i no save karim pikinini, yu singsing na amamas na singaut bikpela, yu meri i no bin karim pikinini. Meri i nogat man i gat planti pikinini moa i winim ol pikinini bilong meri i gat man,'' God Yawe i tok. ² ''Wokim haus sel bilong yu i go bikpela na opim sel bilong yu olgeta, taitim ol rop i go longpela na planim strong ol stik i go daun long graun. ³ Graun bilong yu bai i go long han sut na i go long han kais na ol tumbuna bilong yu bai pait na daunim ol narapela kantri na bai ol i sindaun long ol biktaun i stap nating. ⁴ Yu no ken pret, yu no ken tingting planti na sem, long wanem, bai yu lusim tingting long taim yu stap yangpela yet na man bilong yu i lusim yu. ⁵ Mi God mi bin wokim yu, em mi man bilong yu, God Yawe i gat olgeta strong em nem bilong mi. God Holi bilong Israel, em Man bilong kisim bek yupela na God bilong olgeta hap long graun. ⁶ God Yawe i singautim yu i kam bek gen olsem meri i marit long taim em i yangpela yet na man i lusim em na em i wari na sori tru,'' God i tok olsem. ⁷ ''Mi lusim yu na givim baksait long yu long sotpela taim, tasol bai mi kisim yu gen na sori long yu na mekim gut tru long yu. ⁸ Mi bin bel kros nogut tru long yupela long sotpela taim, tasol bai mi marimari long yupela na mekim gut tru na laikim yupela tru, man bilong helpim yupela, God Yawe i tok olsem. ⁹ Em i olsem wara long taim bilong Noa, mi promis bai wara i no inap karamapim graun gen, olsem tasol, mi promis bai mi no inap belhat na kros long yupela gen. ¹⁰ Maski ol maunten i ken bruk na pundaun na ol liklik maunten bai guria, tasol bai mi laikim yupela yet na kontrak bilong mi long yupela bai i stap gut wantaim mi na i no inap pinis. Man bilong marimari long yupela, God Yawe i tok olsem. ¹¹ Yu bin kisim planti bagarap, lukim, bai mi kisim ol kainkain ston i dia tumas na wokim rot bilong yu long wokabaut long en na bai mi lainim ol dispela ston bilong wokim banis bilong taun. ¹² Bai mi wokim het bilong haus, banis bilong taun na ol dua bilong banis wantaim ol gutpela ston i dia tumas na ol naispela ston. ¹³ God Yawe bai skulim ol pikinini bilong yupela na ol bai stap gut tru. ¹⁴ Bai yu kamap strong long stretpela pasin bilong mi, i nogat man bai bagarapim yu na yu no inap pret moa, long wanem, wanpela samting nogut i no inap kam klostu long yu. ¹⁵ Lukim, sapos wanpela man i kam long kamapim pait, em i kam long laik bilong em yet na bai mi putim em long han bilong yupela na bai yupela i daunim em. ¹⁶ Lukim, mi yet mi wokim man i gat save long wokim ol kainkain samting bilong pait long ain na mi tu i wokim ol man i save kisim ol dispela samting bilong pait na bagarapim ol narapela lain. ¹⁷ I nogat wanpela samting bilong pait ol i wokim bai daunim yupela na bai yupela i daunim ol kainkain tok ol i sutim long yupela. Dispela em pasin bilong God Yawe long was gut long ol wokman bilong em na mekim ol i win, God Yawe i tok olsem.''