13 ¹ "Ol manmeri i hariap long bihainim tok, taim ol lain Efraim i toktok. Em i save apim nem bilong em yet long ai bilong Israel, tasol ol i gat asua na ol i dai long wanem ol i save lotu long giaman god Bal. ² Tasol nau ol i mekim planti sin moa. Ol man bilong kamapim piksa i mekim gut tru piksa bilong ol god giaman long silva. Ol narapela manmeri i tok, 'Dispela ol lain i save givim kis na lotu long piksa bilong kau.' ³ Ol i kamap olsem klaut bilong monin i pinis taim san i kamap, ol i kamap olsem wara bilong monin i pinis taim san i kamap, ol i kamap olsem pipia bilong wit win i save winim i go aut long hap bilong brukim wit na ol i kamap olsem smuk long paia i kamap na pinis. ⁴ Tasol Mi God Yawe God bilong yupela mi bin kisim yupela i kam aut long graun bilong Isip. Yupela i noken lotu long ol narapela god, yupela i mas lotu long mi tasol, yupela i mas save olsem i nogat wanpela man inap long kisim bek yupela. ⁵ Mi bin lukautim yupela long dispela ples wesan nating. ⁶ Taim mi givim yupela planti kaikai, yupela i kaikai na bel i pulap na taim yupela i pulap, yupela i hamamas long yupela yet na lusim tingting long mi. ⁷ Bai mi kamap olsem wanpela laion na bikpela wel pusi i was long rot long killim yupela, ⁸ Bai mi pait long yupela olsem mama bea ol i kisim pikinini bilong em. Bai mi brukim bros bilong yupela na bai mi brukim bodi bilong yupela i go liklik olsem laion na bikpela wel abus i save mekim. ⁹ Husat inap long helpim yupela, ol lain Israel, taim mi bagarapim yupela? ¹⁰ King bilong yupela i stap we na inap long helpim yupela insait long ol biktaun bilong yupela? Nogat wanpela king o lida man yupela i askim mi long givim yupela inap long helpim yupela? ¹¹ Mi givim yupela wanpela king wantaim belhat bilong mi na mi rausim em long wanem mi belhat long yupela. ¹² Ol lain Efraim i mekim kain kain pasin nogut tru, ¹³ Bikpela pen olsem mama i laik karim pikinini bai kamap long em, tasol bai em kamap olsem longlong pikinini man na taim mama i laik karim em bai em i no laik kam aut long bel bilong mama. ¹⁴ Bai mi helpim ol na ol i no inap go long ples bilong ol dai man? Bai mi savim ol long dai? Nogat, bai yupela i dai na bai yupela i pinis olgeta. Bai mi no inap long marimari long yupela." ¹⁵ Efraim i gat planti gutpela samting namel long ol brata bilong em tasol i gat wanpela win bai i kam olsem long ples san i kamap, em win bilong God Yawe bai i kam olsem long ples drai na draim ol hul wara bilong ol Efraim. Ol birua bai kisim olgeta gutpela samting bilong em i go. ¹⁶ Samaria bai i sem long ol pasin nogut em i mekim long God bilong em. Ol birua bai kilim ol long bainat, ol bai tromai ol pikinini bilong ol i go daun long graun na killim ol i dai na brukim bel bilong ol meri i gat bel.