12 ¹ Nau God Yahweh i tokim Abram, Lusim Ples bilong yu, ol lain bilong yu na olgeta samting bilong papa bilong yu na go long hap graun we bai mi soim yu long en. ² Na bai mi mekim yu kamap planti lain manmeri, na bai mi blesim yu, na mekim nem bilong yu kamap bikpela, na bai yu kamap blesing. ³ Bai mi blesim husait lain i blesim yu, tasol husait ol i no givim biknem long yu bai mi mekim nogut long ol. Orait long yu bai mi blesim olgeta lain femili bilong dispela graun". ⁴ Orait Abram i go,olsem God Yahweh i tokim em long bihainim, na Lot i go wantaim em. Abram em 75 yia taim em i lusim Haran. ⁵ Abram i kisim meri bilong em Sarai, Lot, na pikinini man bilong brata bilong em, na ol kisim olgeta liklik samting we ol i gat long en, na ol wokmanmeri ol i bin baim long Haran. Ol i lusim dispela hap na i go long ples Kanan. ⁶ Abram i abrusim dispela graun na i go olgeta long Sekem, na i go stap long diwai ok bilong Moreh. Long dispela taim ol lain Kenan i bin stap yet long dispela graun. ⁷ God Yahweh i kamap long Abram, na tok ,"Long ol pikinini tumbuna bilong yu bai mi givim ol dispela graun". Orait Abram i wokim wanpela alta bilong God Yahweh, husait i bin kamap long em. ⁸ Long dispela hap em i go long liklik maunten ples, long Betel we san kamap long en, orait em i sanapim sel haus bilong em. Betel em i stap long ples we san i go daun long en. Na Ai i stap long ples we san kamap long en. Orait long hap em sanapim alta bilong God Yahweh na singaut long nem bilong God Yahweh. ⁹ Bihain Abram i go yet long wokabaut bilong en, na em i go long Negev. ¹⁰ Long dispela taim, bikpela hangre i kamap long dispela ples, orait Abram i go daun long Isip na stap long hap. Bilong wanem i gat bikpela hangre tru i kamap long olgeta hap. ¹¹ Taim em i laik go insait long Isip, em i tokim Sarai meri bilong em , "Lukim long hia, Mi save olsem yu naispela meri tumas. ¹² Taim ol lain Isip i lukim yu, ol bai tok, Dispela em meri bilong em na ol i bai kilim mi, tasol ol bai larim yu stap laip ¹³ Olsem na yu mas tok yu sista bilong mi, na bai ol i no inap kilim mi i dai". ¹⁴ I kamap long dispela taim Abram i go long Isip, na ol lain Isip i lukim olsem Sarai em naispela meri tru. ¹⁵ Ol ofisa bilong Fero i lukim Sarai, na ol i stori long em long Fero, na ol i kisim Sarai i go insait long haus bilong Fero. ¹⁶ Long Sarai, Fero i mekim gut long Abram na i givim sipsip, bulmakau, ol man donki, wokman ,wokmeri , meri donki na ol kemol. ¹⁷ Bihain God Yahweh i mekim bikpela bagarap i kamap long Fero na haus bilong em wantaim kainkain sik, long wanem Sarai, meri bilong Abram i stap long haus bilong Fero. ¹⁸ Fero salim tok long Abram na i tok, "Yu mekim wanem samting long mi? Bilong wanem na yu no bin tokim mi olsem em i meri bilong yu? ¹⁹ Bilong wanem na yu tok," Em Sista bilong mi," na mi kisim em pinis olsem meri bilong mi? Orait kisim meri bilong yu na go long rot bilong yu." ²⁰ Bihain Fero i toksave long ol wokman bilong em, na ol i salim Abram wantaim meri bilong em i go wantaim olgeta samting em i gat.