9 ¹ Taim ol i lwokim ol dispela samting pinis, ol bosman i kam lukim mi na tok, "Ol lain Israel, na ol pris na Livai, ol i no istap longwe long pasin nogut bilong ol man bilong narapela hap graun wantaim pasin nogut bilong ol. Em ol lain Keinan, Hit, Peris, Jebus, Amon, Moab, Isip na Amor. ² Ol Israel man kisim meri long narapela hap na marit i go i kam na bagarapim holi manmeri bilong Israel wantaim arapela lain. Ol bosman na ol lida i go pas long dispela pasin bilong sakim tok." ³ Taim mi harim dispela, mi brukim klos bilong mi wantaim bilas bilong lotu na pulim gras long het na kamautim mausgras bilong mi tu. Mi sindaun wantaim bikpela wari na tingting. ⁴ Ol lain husait i save pret long tok bilong God Yawe bilong Israel long pasin nogut bilong ol, i bung na i kam lukim mi i go i nap long apinun lotu taim mi sem pipia na i stap. ⁵ Tasol long apinun lotu, mi kirap gen long ol sem bilong mi wantaim ol brukbruk klos bilong mi na lotu bilas, na brukim skru na apim han i go antap long God Yawe. ⁶ Mi tok olsem, "God Yawe, mi sem na pilim nogut long apim pes bilong mi long lukim yu, bilong wanem pasin nogut i winim het bilong mipela na olgeta bikhet pasin i go antap long heven." ⁷ Long tumbuna taim ikam inap nau, mipela i stap long bikpela sem.Insait long pasin nogut bilong mipela, ol King na pris bilong mipela i go long han bilong king bilong dispela gaun, na bainat pinisim ol, ol i go insait long kalabus na olgeta nogut bilong mipela mekim mipela sem na bagarap i kam i nap nau. ⁸ Tasol nau long dispela liklik taim, bel isi na marimari bilong God Yawe i kam lusim mipela liklik hap lain husait istap wantaim em na mipela sanap strong long dispela ples holi. Na Yawe God em yet bai opim ai bilong mipela na givim gutpela malolo taim mipela istap long kalabus. ⁹ Mipela wokboi nating, tasol God Yawe i no lusim mipela, em surikim gutpela pasin bilong em i kam long mipela. Em wokim olsem long ai bilong King bilong Pesia long givim mipela nupela strong long wokim haus bilong God gen na stretim ol brukbruk hap. Em wokim olsem long givim mipela stronpela banis insait long Judah na Jerusalem. ¹⁰ Tasol nau, God Yawe bai mipela tok wanem long dispela bihain? Mipela lus tingting pinis long lo bilong yu, ¹¹ em ol lo yu givim ol wokman bilong yu ol Profet na God Yawe yu i bin tok, "Graun yupela i laik i go insait na kisim em ol man istap pastaim i mekim nogut long en wantaim pasin nogut bilong ol. Graun em pulap long pasin nogut long olgeta hap. ¹² Olsem na yupela i no gen givim pikinini meri i go long ol na kisim piknini meri bilong ol long maritim pikinini man bilong yupela na ino ken harim tok gris bilong ol long sindaun isi, olsem na yupela yet bai kisim gutpela kaikai long graun na ol pikinini bai kisim graun olgeta." ¹³ Tasol bihain long olgeta samting pundaun antap long mipela long bikhet pasin na sem bilong mipela, God Yawe, yu i no mekim save long mipela long nogut bilong mipela na mekim mipela kamap gut gen ¹⁴ na sapos mipela i sakim tok gen na brukim lo bilong yu na marit i go i kam wantaim ol arapela lain, bai yu belhat na pinisim mipela na ino inap larim sampela i stap na sampela i ranawe? ¹⁵ Yawe God bilong Israel, yu stret olgeta, mipela liklik hap lain tasol istap. Lukim! Mipela kamap long ai bilong yu wantaim olgate sem bilong mipela. I nogat wanpela i ken sanap long pes bilong yu, bilong wanem mipela olgeta i gat asua pinis long en.