6 ¹ Olsem na king Darius i salim ol man long sekim ol buk insait long haus gavaman bilong Babilon . ² Long biktaun Ekbatana bilong Media, i gat bikpela banis i raunim em, ol i painim wanpela buk i gat ol dispela tok, ³ Long namba wan yia bilong king Sairus, Sairus i pasim wanpela lo long wokim haus bilong God long Jerusalem, "Mekim dispela haus gen olsem ples bilong mekim ofa, putim ol ston long as bilong en, mekim longpela bilong em i go antap 26 mita na bikpela bilong em 26 mita, ⁴ wantaim tripela lain bilong ol traipela ston na wanpela lain bilong ol plang na ol i mas kisim mani long haus bilong king na baim ol samting na pei bilong ol wokman. ⁵ Nau ol i mas bringim bek ol gol na ol silva samting bilong haus bilong God, em ol dispela samting king Nebukanesa i bin kisim long tempel long Jerusalem i go long Babilon na i salim i kam bek long tempel long Jerusalem. Yupela i mas putim ol long haus bilong God.' ⁶ Orait Tatenai gavana bilong Taun Hapsait long Wara, Seta-Bosenai na ol poroman husait i stap long taun hapsait long wara, i stap longwei! ⁷ Larim wok bilong haus bilong God Yawe i stap olsem. Gavana wantaim ol het man bilong Juda bai i mekim haus bilong God long dispela ples. ⁸ Nau mi tok strong long yupela long mekim ol dispela samting long ol het man bilong Juda husait i mekim haus bilong God. Mani i kam long takis bilong king ol i kisim long ol taun i stap long hapsait long Wara bai yupela i yusim long baim ol wokman olsem na ol i no inap stopim wok bilong ol. ⁹ Yupela i mas givim ol pris long wanem ol samting ol i askim long en, ol yangpela bulmakau, man sipsip o pikinini sipsip bilong mekim ofa ol i kukim olgeta long paia i go long God bilong Heven, wit, sol, wain na oil. Yupela i mas givim ol dispela samting long ol long olgeta dei. ¹⁰ Mekim olsem na ol bai i bringim ol ofa i go long God bilong heven na ol bai i beten long helpim mi, king na ol pikinini man bilong mi. ¹¹ Mi tok strong olsem sapos wanpela i sakim tok bilong mi ol i mas pulim aut wanpela plang long haus bilong em orait ol i mas putim em antap na sutim em i dai. Ol i mas kukim haus bilong em na em bai i kamap olsem hip bilong rabis long pasin bilong sakim tok. ¹² Mi king Darius i mekim dispela strongpela tok na yupela i mas bihainim. Bai God husait i mekim nem bilong em i stap long dispela hap i daunim ol king na ol manmeri husait i apim han bilong em long senisim dispela lo o i bagarapim haus bilong God long Jerusalem." ¹³ King Darius i bin mekim dispela strongpela tok olsem naTetanai gavana bilong provins hapsait long wara, Seta Bosenai na ol poroman bilong em i mekim olgeta samting i bihainim tok bilong king Darius. ¹⁴ Na ol het man bilong Juda i mekim haus bilong God gut tru aninit long stia toktok bilong profet Hagai na Sekaria pikinini man bilong Ido. Ol i bihainim lo bilong God bilong ol Israel na ol lo bilong Sairus, Darius na Artaserksis king bilong ol Persia. ¹⁵ Long namba 6 yia bilong king Darius na long namba tri mun bilong Ada ol i pinisim haus bilong God. ¹⁶ Ol manmeri bilong Israel, ol pris, ol Livai na olgeta manmeri i kam aut long kalabus i amamas long makim dispela haus bilong God. ¹⁷ Ol i ofaim 100 bulmakau, 100 man sipsip na 400 pikinini sipsip long makim haus bilong God. Ol i ofaim 12-pela man meme olsem sin ofa bilong olgeta Israel long makim wanwan tumbuna lain bilong Israel. ¹⁸ Ol i makim ol pris na ol Livai na putim ol long grup long mekim wok insait long haus bilong God long Jerusalem olsem ol i raitim long Buk bilong Moses. ¹⁹ Olsem na ol manmeri husait i bin kam aut long kalabus i amamas na tingim dei bilong Pasova long namba 14 dei bilong namba wan mun. ²⁰ Ol pris na ol Livai i klinim ol yet na kilim sipsip bilong mekim Pasova ofa bilong olgeta manmeri husait i bin kam aut long kalabus na bilong ol yet tu. ²¹ Ol manmeri bilong Israel husait i bin kam aut long kalabus i kaikai dispela Pasova mit wantaim ol arapela manmeri husait i lusim pasin nogut na i lotu long God Yawe, God bilong ol Israel. ²² Ol i amamas tru na i mekim kaikai bilong makim Dei bilong Bret I Nogat Yis long wanem God Yawe i mekim ol i amamas na i tanim tingting bilong king bilong Asiria long bel gut na strongim han bilong ol long wokim haus, haus bilong God bilong Israel.