7 ¹ God Yawe i tokim Moses, "Lukim, mi mekim yu kamap olsem god long Fero. Aron brata bilong yu bai kamap profet bilong yu. ² Bai yu tokaut long olgeta strongpela tok mi bin tokim yu long tokim ol. Aron brata bilong yu bai toktok long Fero long em i ken larim ol manmeri bilong Israel i ken lusim dispela graun na i go. ³ Bai mi mekim bel bilong Fero i pas tru na mi bai soim ples klia bikpela pawa na strong bilong mi, insait long graun bilong Isip. ⁴ Tasol Fero i no inap long harim tok bilong yu, olsem na han bilong mi bai i stap antap long Isip na kisim aut ol bikpela lain man bilong pait, em ol manmeri husait ol tumbuna lain bilong Israel, long kamaut long Isip, tru long ol bikpela hevi. ⁵ Ol lain Isip bai i luksave olsem mi God Yawe husait i holim Isip long han bilong mi na kisim ol lain Israel i kamaut long ol.'' ⁶ Moses na Aron, i mekim olsem God Yawe i tokim ol. ⁷ Moses i stap 80 pela krismas na Aron i stap 83 pela krismas taim em i toktok long Fero. ⁸ God Yawe i tokim Moses na Aron, ⁹ "Taim Fero i askim yu, 'wokim wanpela mirakel,' orait yu tokim Aron long kisim stik na tromoi i go daun pastaim long ai bilong Fero na em bai senis na kamap snek.'' ¹⁰ Orait Moses na Aron i go long Fero na ol i wokim olsem God Yawe i tok. Aron i tromoi stik i go daun pastaim long Fero na ol wokman bilong en na em i tanim na kamap snek. ¹¹ Olsem na Fero tu i singautim ol saveman na ol klas man. Ol tu i mekim wankain samting. ¹² Ol wanwan man i tromoi stik bilong ol na dispela stik i tanim na kamap snek. Tasol snek i kamap long stik bilong Aron i daunim olgeta snek bilong ol. ¹³ Bel bilong Fero em i pas yet na em i no harim wanem God Yawe i tok. ¹⁴ God Yawe i tokim Moses, "Bel bilong Fero i pas na em i les long larim ol manmeri i go. ¹⁵ Go long Fero long monin taim em i go long wara. Sanap long sait bilong wara long bungim em na karim long han bilong yu dispela stik we i bin tanim na i kamap snek. ¹⁶ Tokim em olsem, 'God Yawe, God bilong ol Hibru, i salim mi i kam long tokim yu olsem, "Larim ol manmeri bilong mi i go, bai ol i ken lotu long mi long ples nating. I kam inap nau yu no laik harim." ¹⁷ God Yawe i mekim ol dispela toktok long mekim yu i ken save long mi God Yawe. Mi bai paitim wara Nail wantaim stik mi holim long han na wara bai tanim na kamap blut. ¹⁸ Ol pis i stap long wara bai i dai na wara em bai i smel sting. ¹⁹ Na God Yawe i tokim Moses, "Tokim Aron, 'Kisim stik bilong yu na apim i go olsem antap long olgeta wara bilong Isip na antap long bikpela wara bilong ol na liklik wara na ol raunwara na olgeta liklik raunwara, bai olgeta dispela wara i kamap blut. Yu mekim olsem na bai blut i stap long olgeta hap graun bilong Isip na long olgeta sospen ol i wokim wantaim diwai na ston.'' ²⁰ Moses na Aron i mekim olsem God Yawe i bin tok. Aron i apim stik na paitim wara long bikpela wara, Fero na ol wokman i lukim long ai bilong ol olsem olgeta wara insait long bikpela wara i tanim na i kamap blut. ²¹ Ol pis long bikpela wara i dai na ol bikpela wara i stat long smel sting. Ol Isip lain i hat long dringim dispela wara long bikpela wara na blut i stap long olgeta hap graun bilong Isip. ²² Tasol ol poisinman bilong Isip i wokim wankain samting. Olsem na bel bilong Fero i pas tru na em i les long harim tok bilong Moses na Aron, long ol samting God Yawe i tok long em bai i kamap. ²³ Olsem na Fero i tanim i go bek long haus bilong em. Em i no putim yau long ol dispela toktok. ²⁴ Olgeta lain Isip i dikim hul arere long bikpela wara long kisim wara bilong drin, tasol ol i no inap long dringim wara bilong bikpela wara. ²⁵ Sevenpela dei i bin kam i go bihain long God Yawe i bin kamapim dispela hevi long ol wara bilong ol Isip.