5 ¹ Bihain long ol dispela samting i kamap, Moses na Aron i go lukim Fero na i tok, "Dispela em wanem God Yawe bilong Isrel em i tok. "Larim ol manmeri bilong mi i go na ol i ken lotu long mi long ples drai." ² Fero i askim, "Husait em God Yawe? Bilong wanem na bai mi harim toktok bilong em na larim ol Isrel i go? Mi no save long God Yawe God bilong yupela maski nau mi no inap larim ol Isrel i go." ³ Na ol i tok, "God bilong ol Hibru i bungim mipela. Larim mipela i go tripela dei long ples drai na mekim ofa i go long God Yawe na bai em i no inap long bagarapim mipela wantaim ol kainkain sik na wantaim bainat," ⁴ Tasol king bilong Isip i tokim ol olsem, " Moses na Aron bilong wanem na yu tupela i rausim ol long wok bilong ol? Go bek long wok bilong yupela." ⁵ Na tu em i tok, "Nau yumi gat planti lain manmeri long graun bilong yumi na yu wok long pasim ol long wok bilong ol. ⁶ Long dispela dei tasol, Fero i givim tok strong i go long ol bosman na ol man i go pas long wok na em i tok, ⁷ "I no olsem bipo, noken givim drai gras long ol manmeri bilong mekim brik. Larim ol i go na kisim drai gras bilong ol yet. ⁸ Tasol, yu mas tok strong yet long ol i ken mekim wankain namba bilong brik ol i save mekim bipo. Noken larim ol i mekim liklik namba bilong brik. Bilong wanem ol i les tumas. Olsem na ol i singaut na tok, "Larim mipela i go na mekim ofa i go long God bilong mipela." ⁹ Surikim wok mak bilong ol man na ol i mas wok yet na ol i no ken moa harim tok giaman." ¹⁰ Na ol bosman na ol man i go pas long ol dispela lain i go na toksave long ol manmeri. Na ol i tok, "Dispela em wanem Fero i tok, "Bai mi no inap givim drai gras long yupela moa. ¹¹ Yupela yet mas i go na painim drai gras long wanem hap yupela yet inap long painim, tasol hevi bilong wok bilong yupela bai i no inap go daun." ¹² Na ol manmeri i go long olgeta hap bilong Isip long painim ol drai gras. ¹³ Ol bosman i toktok strong moa yet long ol na i tokim ol, yupela i mas pinisim wok mak bilong yupela wankain tasol olsem ol i save givim drai gras long yupela. ¹⁴ Ol bosman bilong Fero i paitim ol man i go pas long ol Isrel, husait ol i makim ol long bosim ol wanwok bilong ol. Ol bosman i askim ol, "Bilong wanem na yupela i no wokim ol brik mipela i makim long yupela mekim aste na nau wankain olsem yupela i save mekim bipo?" ¹⁵ Na ol bosman bilong ol Isrel i kam long Fero na ol i krai long em, "Bilong wanem na yu mekim nogut long ol wokboi bilong yu olsem? ¹⁶ Ol i no givim drai gras long mipela ol wokboi bilong yu. Tasol ol i wok long tokim mipela long wokim ol brik yet! Na tu ol lain bilong yu i paitim mipela long asua bilong ol yet." ¹⁷ Tasol Fero i tokim ol olsem, "Yupela ol lesman! yupela i lesman! Yupela i tok mipela i go wokim ofa long God Yawe. ¹⁸ Long nau go bek long wok, nogat moa drai gras bai ol i givim long yupela, tasol yupela i mas mekim wankain namba bilong brik yet." ¹⁹ Ol bosman bilong ol Isrel ol i lukim olsem, ol i stap long hevi taim ol i tokim ol olsem, "yupela i noken daunim ol namba bilong brik olgeta dei." ²⁰ Na taim ol i lusim Fero na i go ol i bungim Moses na Aron i sanap autsait long haus bilong king. ²¹ Ol i tokim Moses na Aron, "Larim God Yawe i lukim yu tupela na mekim save long yu tupela, bilong wanem yu tupela i mekim na mipela i kamap olsem birua long ai bilong Fero na ol wokman bilong em. Em olsem yu putim bainat long han bilong ol long kilim mipela." ²² Moses i go bek long God Yawe na em i tok, "Bikpela, bilong wanem na yu givim hevi long ol dispela lain? Bilong wanem tru na yu salim mi kam pastaim. ²³ Long taim mi kam long Fero na toktok long em long nem bilong yu, em i givim hevi long ol dispela manmeri na yu no larim ol i go aut yet."