31 ¹ Nau God Yawe i tokim Moses olsem, ² "Lukim, mi bin singautim nem bilong yu Besalel pikinini bilong Uri tumbuna bilong Ur long lain bilong Juda. ³ Mi bin pulimapim Besalel wantaim Spirit bilong mi, long givim em gutpela tingting na save long em i ken mekim olgeta wok, ⁴ long em i ken save long mekim piksa na wok long gol, silva na brons, ⁵ long katim ston na stretim, sapim na wokim ol piksa long diwai na mekim olgeta kain wok. ⁶ Antap long dispela long strongim wok, mi makim Oholiab pikinini bilong Aisamak, long lain bilong Den. Na tu mi givim save long olgeta husait i gat save long ol i ken mekim ol samting em mi tokim yu long em. Kain olsem ⁷ haus sel bilong bung na bokis bilong kontrak na lid bilong bokis kontrak long ples bilong putim blut wantaim ol arapela samting bai i ken stap insait ⁸ na tebol wantaim ol dis, plet, kap na fok na stik bilong lam wantaim olgeta samting bilong larim lait i mas stap yet na alta bilong mekim gutpela smel ⁹ na alta bilong kukim olgeta ofa na samting bilong mekim ofa na dis bilong wasim han na lek wantaim ples bilong putim dis. ¹⁰ Na tu ol klos i gat gutpela bilas bilong en em Aron wantaim ol pikinini bilong em i ken werim taim ol i mekim wok pris. ¹¹ Na tu oil bilong kapsaitim antap long het bilong makim man na oil bilong kamapim gutpela smel insait long haus holi. Dispela ol wokman i mas mekim olgeta samting olsem mi bin tokim yu long en." ¹² Na God Yawe i tokim Moses gen olsem, ¹³ "Tokim ol Isrel, 'Yupela i mas stap holi long dei sabat bilong God Yawe, long wanem dispela bai i stap olsem mak bilong em namel long em wantaim yupela olgeta manmeri long ol lain i stap nau na bai kam bihain long yupela, bai yupela i ken save olsem em i God Yawe, husait i makim yupela ol manmeri bilong em yet. ¹⁴ Olsem na yupela i mas malolo long dei Sabat na tingim gut dispela dei olsem em i holi. Husait man o meri i bagarapim dispela dei i mas dai. Husait man o meri i wok long dispela dei Sabat, yupela mas rausim em long lain bilong em. ¹⁵ Olgeta wok i mas pinis long namba 6 dei, tasol long namba 7 dei em dei bilong malolo na givim biknem i go long God Yawe. Husait man o meri i mekim wok long dispela dei sabat i mas dai. ¹⁶ Olsem na ol Israel i mas lukautim dispela dei Sabat gut. Ol i mas bihainim dispela tok long nau ol istap na long ol tumbuna husait bai i kam bihain tu. ¹⁷ Dei sabat bai i stap olsem mak namel long God Yawe wantaim ol manmeri bilong Israel, long wanem, long 6-pela dei, God Yawe i bin mekim heven na graun na long namba 7 dei em i malolo. ¹⁸ Taim God i bin toktok pinis wantaim Moses antap long maunten Sainai, em i givim tupela hap ston i gat lo long Moses. Dispela ston i gat lo em God yet i bin raitim long han bilong em.