28
1
Singautim brata bilong yu Aron na ol pikinini man bilong em Nadap, Abiu, Elisa na Itama na long namel long ol lain Israel bai ol i ken wok long mi olsem pris.
2
Yu mas wokim klos bilong Aron, brata bilong yu na em i ken i stap narakain long ol manmeri. Dispela klos bai i givim biknem long mi na em bai gutpela tru.
3
Yu mas toktok long olgeta manmeri i gat gutpela bel em ol dispela lain mi bin pulmapim ol wantaim spirit bilong gutpela save, olsem na bai ol i wokim klos bilong Aron na putim em long narapela sait na bai em i mekim wok bilong mi olsem pris.
4
Dispela ol klos ol i mas wokim em i bros kapa, em longpela laplap i raunim nek, laplap i save holim sket o trasis olsem let na longpela laplap i raunim het. Ol i mas wokim ol dispela klos na putim long narapela sait long mi. Ol dispela ol klos i bilong brata bilong yu Aron wantaim ol pikinini bilong em na ol bai i wok olsem pris.
5
Save man bilong samapim klos i mas kisim laplap ol i mekim long liklik rop i gat gol kala blu, pepol na ret.
6
Ol i mas wokim longpela laplap i raunim nek wantaim gol long blu, pepol na retpela tret ol i tanim long en. Man i gat save gut long dispela wok i mas mekim dispela wok.
7
Dispela klos i mas i gat tupela hap laplap bilong solda i holim tupela kona long antap.
8
Ol i mekim gutru let olsem laplap bilong raunim nek, ol i mas mekim long wanpela laplap wantaim laplap bilong raunim nek, ol i mekim long laplap ol i bin tanim long kala gol, blu, pepol na ret.
9
Nau yu mas kisim tupela oniks ston na sigirapim na raitim nem bilong 12-pela pikinini man bilong Israel.
10
6-pela nem long wanpela ston na arapela 6-pela long narapela ston, ol i raitim nem bilong ol long oda bilong dei mama i karim ol long en.
11
Wokman i save katim ston na raitim nem, olsem mak i stap long ring, yu mas kisim tupela ston na raitim nem bilong ol 12 pela pikinini man bilong Israel. Yu mas bungim ol ston na mekim wantaim gol.
12
Yu mas putim tupela ston antap long tupela solda bilong klos bilong pris, long toksave long God Yawe long ol pikinini bilong Israel. Aron bai i karim ol nem i go long ai bilong God Yawe long tupela solda bilong em na God Yawe bai lukim na bai tingim ol.
13
Yu mas mekim gut tru wantaim gol,
14
wokim tupela sen wantaim gol na tanim tanim en i kamap olsem rop na yu mas pasim sen na lainim gut.
15
Yu mas mekim klos bilong bros long mekim disisen. Wokman em i save gut tru long samap, em tasol bai mekim na bihainim ol kala God Yawe i tok long en, gol, blu, pepol na gutpela laplap.
16
Em i mas kamap wankain long olgeta sait. Yu mas foldim dispela klos bilong bros i go tupela. Longpela bilong em i mas 22 senti mita na sait bilong en i mas 22 senti mita.
17
Yu mas putim ol long 4-pela stretpela lain bilong ol ston i dia tumas. Namba wan lain i mas igat rubi, topas na ganet.
18
Namba 2 lain i mas igat emeral, sapaia na daimon.
19
Namba 3 lain i mas igat jasin, akait na amaitis.
20
Namba 4 lain i mas igat beril, onix na jaspa. Ol i mas putim olgeta wantaim gol antap long en.
21
Ol i mas lainim ol ston long makim 12-pela pikinini man bilong Israel, bihanim nem bilong ol. Ol i mas raitim nem bilong ol long ston olsem mak i stap long ring bilong makim wanwan tumbuna lain.
22
Yu mas mekim antap long klos bilong bros olsem sen rop ol i tanim tanim long trupela gol.
23
Yu mas mekim tupela ring long gol long putim long klos bilong bros.
24
Yu mas pasim wantaim tupela gol sen long tupela kona bilong klos bilong bros.
25
Yu mas pasim ol narapela arere bilong klos bilong bros long sen ol i mekim long putim long solda. Na pasim olgeta wantaim long klos bilong bros.
26
Yu mas mekim tupela ring long gol na putim long tupela kona bilong klos bilong bros, long arare bilong narapela klos bilong bros.
27
Yu mas wokim tupela moa ring bilong gol, yu mas putim ol aninit long tupela hap bilong laplap long solda na klostu bai arare bilong en i mas strong moa klostu lo let bilong pasim wantaim klos bilong pris.
28
Ol i mas pasim ring bilong klos bilong bros wantaim ring bilong laplap bilong raunim nek long blupela rop, olsem na em bai pas antap long laplap bilong raunim nek na let. Dispela klos bilong bros i mas pas antap long klos bilong pris olgeta taim.
29
Taim Aron i go insait long ples holi em i mas karim nem bilong ol manmeri bilong Israel long klos em i putim long bros bilong em bilong mekim sampela tingting long gutpela sindaun bilong ol manmeri. Em bai mekim olsem bilong tingim ol gutpela pasin em God Yawe i bin mekim long ol.
30
Yu putim Urim na Tumim long klos bilong bros long ples bilong mekim sampela tingting, em bai i stap long bros bilong Aron taim em i go long ples holi long lukim God Yawe. Olsem bai Aron inap kamap man bilong kamapim sampela tingting long makim lain Israel long bros bilong em taim em i kam sanap long ai bolong God Yawe.
31
Yu mas mekim longpela klos bilong pris long blupela laplap tasol.
32
Dispela klos i mas i gat hul long namel bilong het i ken go insait. Na samapim arere bilong laplap i raunim hul long klos, bai em i noken bruk. Man husait i save long samapim klos i mas mekim dispela.
33
Aninit long dispela longpela klos yumi mas mekim piksa bilong pomegrenet long kala blu, pepol na ret i raunim klos na ol gol belo long namel na i mas raunim dispela klos.
34
I mas i gat belo long gol na piksa bilong pomegranet i raunim arere bilong klos long aninit.
35
Aron i mas pasim dispela klos long taim em i wok. Dispela belo i mas pairap taim Aron i go insait long ples holi long ai bilong God Yawe na taim em i kam ausait. Em i mas mekim olsem long em i noken dai.
36
Yu mas mekim wanpela plet long gol tasol na rait antap long en olsem wanpela mak i na dispela mak i mas tok olsem, "God Yawe em i holi."
37
Pasim dispela plet long hat bilong pris antap long poret bilong em.
38
Em i mas stap long het bilong Aron bai em i ken karim hevi i save pas long ofa ol Isarel i makim olsem holi ofa i go long God Yawe. Dispela hat bilong pris mas stap oltaim long het bilong Aron na God i bai amamas na kisim ol dispela ofa bilong lain Israel.
39
Yu mas mekim longpela klos bilong ol long liklik tret long waitpela kala na mekim klos bilong het tu long ol liklik tret long waitpela kala. Na yu mas mekim wanpela hap laplap bai i kamap olsem let wantaim ol mak i stap long en.
40
Mekim ol longpela klos, ol let na ol laplap olsem rop bilong pasim long het na givim long ol pikinini bilong Aron long kamapim biknem na gutpela pasin bilong ol. Man i gat save long samap i mas mekim ol dispela samting.
41
Yu mas givim dispela ol klos long brata bilong yu Aron na ol pikinini bilong en. Yu mas werim ol na makim ol bai ol i mekim wok long mi olsem pris.
42
Yu mas mekim klos bilong karamapim skin bilong ol long bel i go daun long tais bilong ol.
43
Aron na ol pikinini bilong en tasol bai i putim dispela klos long taim ol i go insait long sel haus o long taim ol i go wok long ples holi. Ol i mas bihainim dispela tok God Yawe i tokim ol, nogut bai ol i dai. Dispela bai kamap strongpela lo bilong Aron na ol lain tumbuna pikininin bilong en i kam bihain.