25 ¹ God Yawe i tokim Moses olsem, ² "Tokim ol manmeri bilong Israel long bungim ofa bilong mi, long olgeta manmeri i gat bel kirap long givim wantaim amamas. Yu mas kisim dispela ofa bilong mi. ³ Dispela em ol samting ol bai i givim ofa long yu, gol, silva na brons, ⁴ blu, pepol na retpela klos we ol i bin putim kala long em wantaim gras bilong meme, ⁵ ol dispela ofa tu olsem skin bilong sipsip ol i putim retpela kala na skin bilong kau bilong solwara wantaim diwai akasia ⁶ na wel bilong lam bilong alta, wel bilong olim man na ol samting bilong givim gutpela smel. ⁷ dispela ston i gat narapela kain kala na ol ston i dia tumas bilong putim long klos bilong pris. ⁸ Larim ol i mekim haus lotu bilong mi na bai mi kam i stap namel long ol. ⁹ Yu mas mekim stret olsem wanem mi bai soim yu long en na yu mas bihainim tok bilong mi na wokim haus lotu na bai mi tokim yu long wanem ol samting tu bai yu kisim na wokim long en. ¹⁰ Ol bai i mekim wanpela bokis long strongpela diwai akasia. Em i mas longpela olsem 2.5 kubik, bikpela bilong em bai i olsem 1.5 kubik na lid bilong em bai i olsem 1.5 kubik. ¹¹ Yu mas karamapim insait na autsait bilong em wantaim gol tasol na yu mas putim gol long ol kona na raunim olgeta i go antap long lid bilong bokis. ¹² Yu mas kukim gol na mekim 4-pela ring na putin long 4-pela lek bilong bokis, tupela ring long wanpela sait na tupela long narapela sait. ¹³ Yu mas mekim pos long strongpela diwai akasia na karamapim wantaim gol. ¹⁴ Yu mas putim pos i go insait long ring long olgeta sait bilong bokis na redi long karim. ¹⁵ Pos i mas i stap insait long ring bilong bokis na noken rausim i kam autsait long ring. ¹⁶ Yu mas putim lo bilong kontrak mi bai givim long yu i go insait long bokis. ¹⁷ Yu mas mekim lid bilong bokis wantaim gol tasol. Longpela bilong em i olsem 2.5 kubik na bikpela bilong em i olsem 0.5 kubik. ¹⁸ Yu mas mekim tupela ensol long gol na putim long tupela kona bilong bokis antap long lid. ¹⁹ Mekim tupela ensol long gol na putim wanpela long kona bilong lid na narapela long narapela kona bilong lid na tupela mas pas wantaim lid. ²⁰ Ensol i mas opim wing bilong em i go antap na pasim gol lid bilong bokis. Tupela gol ensol i mas lukluk i go i kam long tupela yet namel long gol lid bilong bokis. ²¹ Nau yu mas putim lid i go antap long bokis na putim lo bilong kontrak mi bin givim yu i go insait long bokis. ²² Long dispela bokis tasol bai mi bungim yu na toktok long yu. Ples bilong mi long stap em i stap antap long gol lid antap long bokis, namel long tupela gol ensol, bai mi toktok long yu long ol lo bai mi givim long ol lain manmeri bilong ol Isreal. ²³ Yu mas mekim wanpela tebol long diwai akasia. Longpela bilong em i olsem 2 kubik na bikpela bilong em i olsem wanpela kubik na antap bilong em i olsem 1hap kubik. ²⁴ Yu mas karamapim dispela tebol wantaim gol tasol na putim ol gol i raunim olgeta kona na antap bilong tebol tu. ²⁵ Yu mas mekim sapot bilong tebol i olsem 7 na 8 sentimita na em bai i strongim lek bilong tebol na raunim ol dispela sapot bilong em wantaim gol. ²⁶ Yu mas mekim 4-pela ring long gol na putim ol long 4-pela kona long lek bilong tebol i stap long en. ²⁷ Ol ring i mas i stap pas long tebol na em bai i kamapim ples bilong putim pos. Na dispela tebol em i redi long karim. ²⁸ Yu mas mekim pos wantaim strongpela diwai akasia na karamapim wantaim gol na ol i ken karim tebol wantaim dispela pos. ²⁹ Yu mas mekim ol dis, spun, jak na plet bilong kapsaitim ofa. Ol dispela samting yu mas mekim long gol tasol. ³⁰ Olgeta taim yu mas putim bret long tebol long pes bilong mi. ³¹ Yu mas mekim stik bilong putim lam wantaim gol tasol, yu mas mekim stik bilong lam wantaim as na han bilong em long sapotim lam. Lip, flawa na kap, Olgeta i mas pas na stap wantaim olsem bilasi bilong stik bilong lam. ³² 6-pela han bilong lam i mas i go long tupela sait bilong lam, 3-pela han i go long wanpela sait na 3-pela i go long narapela sait bilong lam. ³³ Namba wan han i mas i gat 3-pela kap i luk olsem flawa bilong almon diwai, em i gat lip na flawa long as bilong en. Na 3-pela kap i stap long narapela han bilong lam em i wankain olsem narapela sait. Olgeta 6-pela han bilong lam i mas luk wankain tasol. ³⁴ Long namel long stik bilong lam i mas i gat 4-pela kap i luk olsem flawa bilong almon diwai, lip na flawa bilong em i mas i stap long as bilong lam. ³⁵ Em i mas i gat ol lip long as bilong tupela namba wan han bilong lam ol i mekim wantaim na narapela tupela han i mas wankain. Laspela tupela han bilong lam i gat lip long as bilong em we ol i mekim wantaim. I mas wankain long olgeta 6-pela han bilong lam. ³⁶ Olgeta lip long as bilong lam na han bilong en i kamap wanpela, em ol i mas mekim long gol tasol. ³⁷ Yu mas mekim stik bilong putim lam wantaim 7-pela lam na putim long ples bilong em na em bai i givim lait. ³⁸ Yu mas mekim sisi na plet bilong en wantaim gol tasol. ³⁹ Long mekim dispela olgeta samting bilong lam wantaim ples bilong putim lam em yupela i mas mekim long 34-pela kilo grem gol. ⁴⁰ Yu i mas tingim gut na mekim olsem mi bin soim yu long maunten.