11 ¹ Nau God Yawe i bin tokim Moses, "Bai mi salim wanpela bagarap moa i kam long Fero, king bilong Isip na olgeta lain manmeri bilong en. Bihain long dispela, em bai i larim yupela i go. Taim em i mekim olsem, em bai rausim yupela i go aut long Isip olgeta. ² Tokim ol manmeri olsem olgeta i mas askim husait wantok ol i save stap klostu long en, long givim, ol samting ol i mekim long silva na gol." ³ Nau God Yawe i bin mekim ol lain Isip i gat bikpela laik long amamasim ol lain Isrel na wankain olsem Moses tu i kamap bikpela save pes long ai bilong ol wokboi bilong Fero na ol lain manmeri bilong Isip. ⁴ Moses i tok, "God Yawe i tok olsem: 'Long biknait bai mi raun long olgeta hap bilong Isip. ⁵ Olgeta namba 1 pikinini man insait long graun bilong Isip bai i dai, long namba 1 pikinini man bilong Fero, husait i sindaun long sia king, i go long nambawan pikinini man bilong wokmeri husait i tanim wil bilong rausim skin bilong wit, na i go long olgeta namba 1 pikinini bilong olgeta bulmakau. ⁶ Bikpela krai bai i kamap long olgeta hap graun bilong Isip we i no i bin kamap bipo na bai i no inap long kamap gen. ⁷ Nogat wanpela dok bai i singaut long wanpela lain manmeri bilong Israel, long ol man o long ol animol, nogat tru. Long dispela rot bai yupela i save olsem pasin mi mekim long ol lain Israel i narakain long ol lain Isip. ⁸ Olgeta wokboi bilong yu, Fero, bai i kam brukim skru long mi na bai ol i tok, 'Plis lusim Isip na go, yu wantaim olgeta lain manmeri bilong Israel!' Bihain long dispela, mipela bai lusim Isip." Taim Moses i toktok pinis, em i lusim Fero wantaim bikplea belhat. ⁹ God Yawe i bin tokim Moses, "Fero bai i no inap long harim tok bilong yu. Dispela bai i mas kamap bilong wanem bai mi mekim planti samting we ol bai kilap nogut insait long graun bilong Isip." ¹⁰ Moses na Aron i mekim olgeta dispela samtin long ai bilong Fero, tasol God i mekim Fero i strongim yet bel bilong en. Olsem na Fero i no larim ol lain manmeri bilong Israrel i lusim graun bilong en.