19 ¹ Taim Yawe God bilong yupela i kilim na pinisim tru ol manmeri bilong ol kantri, Yawe God bilong yupela bai i givim graun bilong ol long yupela, na taim yupela kam bai yupela i stap long biktaun bilong ol na stap long ol haus bilong ol, ² yupela mas makim tripela biktaun bilong yupela yet namel long ol graun bilong yupela Yawe God bilong yupela i givim yupela long stap long em. ³ Yupela mas wokim rot na makim na brukim graun i go i kam long tripela hap, Yawe God bilong yupela bai i mekim na bai yupela i kisim ol dispela graun, olsem na husat i kilim narapela i dai i ken ran i go long hap. ⁴ Dispela lo em bilong ol man husat i kilim narapela man i dai na ran i go long dispela hap na stap gut, husat man nogat as long en o bipo em i no gat kros wantaim em i kilim nating wantok bilong em. ⁵ Tok piksa, sapos wanpela man wantaim wantok bilong em tupela igo long bus long katim diwai, na taim em i katim diwai istap na het bilong tamiok i lus long stik na igo paitim wantok bilong em idai-orait dispela man i mas ran igo long wanpela bilong ol dispela biktaun na stap laip. ⁶ Sapos ino olsem man bilong bekim dai bilong dispela man i dai pinis bai ronim em, na belhat bilong dispela man i winim em, sapos rot i longwe tumas bai em go holim pas dispela man long rot na paitim em na kilim em idai maski em i nogat asua long dai, long wanem bipo dispela man i no bin kros pait wantaim wantok bilong em. ⁷ Olsem na mi tokim yupela long makim tripela biktaun bilong yupela yet ⁸ Sapos Yawe God bilong yupela i surukim mak bilong graun bilong yupela igo bikpela, olsem em i bin pasim tok long ol tumbuna bilong yupela long mekim olsem, na givim yupela olgeta graun em bin promis long givim igo long ol tumbuna bilong yupela. ⁹ sapos yupela i lukautim olgeta dispela ol lo na mekim, nau mi tokim yupela long em-ol lo long laikim Yawe God bilong yupela na oltaim wokabaut long laik na pasin bilong em, orait yupela mas kisim tripela moa biktaun bilong yupela yet, antap long ol tripela yupela igat pinis. ¹⁰ Mekim olsem na blut bilong ol man ino gat asua i noken pundaun namel long ol graun Yawe God bilong yupela i givim yupela nating,olsem na noken larim dispela blut i kotim yupela olsem yupela i gat asua. ¹¹ Tasol sapos wanpela man igat kros na belhat long wantok bilong em, em bai igo hait na wet istap long rot na taim dispela wantok ikam em bai kirap na paitim em na kilim em idai, na sapos em ron igo hait long wanpela bilong ol dispela biktaun- ¹² orait ol hetman bilong biktaun bai salim tok na ol bai i kisim dispela man ikam bek, na ol hetman bai i givim em igo long han bilong ol lain bilong man idai pinis, ol i ken bekim na kilim em idai, ¹³ Yupela i noken sori na krai long em, yupela i mas rausim dispela kain pasin nogut we blut bilong man ipundaun long graun na mekim ol Israel olsem ol igat asua,olsem na bai yupela istap gut. ¹⁴ Yupela mas noken rausim ol mak bilong graun bilong ol wantok bilong yupela bipo ol tumbuna ibin makim pinis long ol, dispela graun bai yupela kisim bilong yupela yet, long graun Yawe God bilong yupela bai givim igo long yupela na bai yupela kisim. ¹⁵ Wanpela man tasol i no ken kirap na tokaut olsem em yet wanpela i lukim na dispela man i kamapim rong, o mekim sin, o wanem ol arapela samting em mekim na kamapim ol sin; tupela man mas tok aut, o tripela man iken tokaut long strongim tok olsem em itru dispela man i mekim sin. ¹⁶ Sapos wanpela man sindaun na wokabaut bilong em i no stret i kirap na sutim tok long ol narapela man husat i mekim rong. ¹⁷ Orait tupela man i wok long sutim tok igo ikam long tupela yet, tupela i mas kam sanap long ai bilong God Yawe, long ai bilong ol pris na ol jas husat i holim wok long dispela taim. ¹⁸ Ol jas ol yet mas sekim na painim aut gut tru; lukim, sapos dispela man ino tok tru na sutim tok nating long brata bilong em, ¹⁹ orait yupela mas mekim long em, wanem ol samting em i laik mekim long brata bilong em, na long dispela rot bai yupela i kilim idai ol pasin nogut istap namel long yupela ²⁰ Orait bihain husat ol lain istap yet bai i harim na pret, na long dispela taim igo olsem bai ol i no inap mekim ol kain pasin nogut moa namel long yupela. ²¹ Yupela noken sori na krai long ol; wanpela kilim narapela idai orait narapela mas kilim em idai, wanpela i bagarapim ai bilong yu orait yu bagarapim ai bilong em, wanpela i brukim tit bilong yu orait yu brukim tit bilong em, wanpela i brukim han bilong yu orait yu brukim han bilong em, na wanpela i brukim lek bilong yu orait yu brukim lek bilong em tu.