7 ¹ Long namba wan yia bilong Belsasa long stap king bilong Babilon, Daniel i slip long bet na em i lukim wanpela driman. Orait em i raitim ol samting em i lukim, em olgeta bikpela samting bai kamap. ² Daniel i tokaut olsem, "Insait long driman bilong mi long nait, mi lukim 4-pela strongpela win i kam long heven na mekim bikpela solwara i kirap. ³ Na 4-pela bikpela animol, ol i no wankain olsem narapela, ol i kam autsait long solwara. ⁴ Na namba wan, em i olsem bikpela laion tasol em i gat bikpela wing i olsem tarangau. Taim mi lukluk yet, wing bilong en ol i rausim na mekim em long sanap long tupela lek long graun na ol i givim tingting bilong man long en. ⁵ Bihain i gat namba tu bikpela animol, olsem bea na em i brukim em yet i go daun, em i gat tripela sait bun bilong banis i pas long tit long maus bilong en. Tok i kam long en, 'Kirap na bagarapim planti lain manmeri.' ⁶ Bihain mi lukluk gen. I gat narapela animol, i wankain olsem bikplela wel pusi. Long baksait bilong en i gat 4-pela wing olsem wing bilong ol pisin na em i gat 4-pela het. Ol i givim em olgeta strong bilong bosim olgeta manmeri. ⁷ Bihain long dispela, mi lukim namba 4 animol long driman, em i strongpela na i mekim mi pret nogut tru. Em i gat bikpela tit i olsem ain, em i kaikai olgeta samting na brukim olgeta samting i go liklik na em i krungutim antap long ol hap samting i stap. Em i narakain long ol arapela animol na em i gat 10-pela kom i stap long het bilong en. ⁸ Taim mi lukim ol kom bilong en, mi lukim narapela liklik kom i kamap antap long en. Dispela liklik kom i kamautim tripela bilong ol bikpela kom. Mi lukim long dispela liklik kom, em i gat ai olsem ai bilong ol man na em i gat maus i save apim nem bilong em yet long olgeta bikpela samting em i mekim. ⁹ Taim mi lukluk, ol i putim ol sia king na Bikpela God i stap bipo bipo tru na nau tu bai sindaun antap long sia king bilong em. Klos bilong em i waitpela olsem sno na het gras bilong em i waitpela olsem gras bilong sipsip. Sia king bilong em i olsem paia i lait na wil bilong sia king i olsem paia i lait strong. ¹⁰ Paia i ron kam autsait olsem wara long pes bilong em na milion manmeri i lotu long em na wan handret milion moa manmeri i sanap long pes bilong em. Taim bilong bikpela kot i stat na ol i kisim buk na opim. ¹¹ Mi wok long lukluk yet long wanem, ol tok bilong givim biknem i kamap long dispela liklik kom. Mi lukim yet na ol i kilim dispela namba 4 animol na bagarapim olgeta bodi bilong en na tromoi long paia i kukim olgeta. ¹² Long ol dispela 4-pela animol, olgeta pawa bilong bosim ol samting ol i rausim i go, tasol ol i surikim laip bilong ol bai i stap sampela taim. ¹³ Long driman bilong mi long nait, mi lukim wanpela man i kam wantaim bikpela klaut i raunim em long heven, em i kam olsem 'Pikinini Bilong Man. Em i kam long pes bilong Bikpela God i stap bipo bipo tru na sanap long ai bilong em. ¹⁴ Ol i givim em olgeta strong na pawa wantaim biknem bilong bosim olgeta manmeri, kantri na kainkain tokples bai lotu long em. Olgeta pawa bilong bosim olgeta samting em bai i stap oltaim oltaim na bai i no inap pinis na kingdom bilong em bai i no inap bagarap. ¹⁵ Long mi yet, Daniel, spirit bilong mi i no amamas insait long mi na ol driman mi bin lukim i mekim mi i tingting planti. ¹⁶ Mi go long wanpela bilong ol i sanap long hap na askim em long tokim mi long as tingting bilong ol dispela samting. ¹⁷ 'Dispela 4-pela bikpela animol i makim 4-pela king bai kirap long 4-pela hap bilong graun. ¹⁸ Tasol ol manmeri i gat stretpela pasin bilong Bikpela i stap antap tru, ol bai i kisim kingdom bilong em na ol bai i lukautim ol samting oltaim.' ¹⁹ Bihain mi laik save moa long dispela namba 4 animol, em i narakain long ol arapela na em bai i mekim ol manmeri i pret long tit bilong en i olsem ain na ol pinga bilong en i olsem bras. Em i bagarapim olgeta samting na brukim ol i go liklik na krungutim long lek bilong en. ²⁰ Mi laik save moa long ol 10-pela kom i stap antap long het bilong em na narapela liklik kom i kamap antap long en na mekim ol tripela kom i pundaun i go daun. Mi laik save gut long kom i gat ol ai na i gat maus i save tokaut na apim nem bilong em yet long em i bin kamapim ol bikpela samting. Dispela kom i bikpela moa long ol narapela kom. ²¹ Taim mi lukluk, dispela kom i kirapim pait wantaim ol stretpela manmeri na i winim ol ²² inap Bikpela God bilong bipo bipo tru i mekim kot wantaim ol stretpela manmeri bilong em yet God i stap antap tru. Orait taim em i kam bai ol stretpela manmeri i kisim kingdom bilong em. ²³ Dispela man i tok olsem, 'namba 4 animol bai makim namba 4 kingdom long graun, em bai i narakain long ol arapela kingdom. Em bai bagarapim olgeta graun na em bai krungutim na brukim i go liklik hap. ²⁴ Long 10-pela kom, em i makim 10-pela king bai kirap namel long ol dispela kingdom na narapela bai kirap bihain long ol. Em bai narakain long ol i bin kamap pastaim na em bai winim ol 3-pela king. ²⁵ Em bai i tok pait wantaim Bikpela God i stap antap tru na bai mekim nogut long ol stretpela manmeri bilong Bikpela God i stap antap tru. Em bai traim long senisim ol bikpela dei bilong lotu na ol lo. Dispela ol samting bai i go long han bilong em na stap long wanpela yia, tupela yia na hap bilong wanpela yia. ²⁶ Tasol taim bilong kot bai i kamap na ol bai kisim pawa bilong em i olsem king na i go na bagarapim olgeta samting na pinisim olgeta. ²⁷ Bikpela God i stap antap tru bai givim olgeta kingdom na pawa na ol gutpela samting i kamap long ol dispela kingdom i stap long graun i go long ol stretpela manmeri bilong God. Kingdom bilong God bai i stap oltaim na ol narapela lain manmeri bai i lotu long em na bihainim tok bilong em.' ²⁸ Em i pinis bilong olgeta samting mi bin lukim long driman bilong mi. Long mi yet, Daniel, ol tingting bilong mi i givim mi bikpela pret na pes bilong mi i kamap narakain. Tasol mi i no tokaut long ol samting mi bin lukim."