3 ¹ Nau ol brata, beten long mipela, olsem tok bilong Bikpela bai igo hariap na tu hapim igo antap olsem em oltaim i save stap wantaim yupela. ² Beten olsem mipela iken kam aut long namel bilong ol man nogut, na ol man bilong mekim pasin nogut. Bilong wanem, planti bilong ol ino gat pasin bilong bilip. ³ Tasol, Bikpela ol taim i save stap klostu long yupela bai strongim yupela na lukautim yupela long dispela man nogut. ⁴ Mipela igat bilip long yupela insait long Bikpela olsem yupela iken mekim ol dispela samting na tu yupela iken bihainim igo yet ol dispela samting mipela i tok strong long yupela long en. ⁵ Bai Bikpela iken helpim yupela long luksave long laikim bilong God na long Krais i bin karim hevi bilong yumi. ⁶ Orait ol brata, nau mipela i tok strong long yupela long nem bilong Bikpela bilong yumi Jisas Krais long yupela imas givim baksait long olgeta brata husait i nogat wok na ino save bihainim wanem ol samting yupela i bin kisim long mipela. ⁷ Yupela yet i save long ol pasin bilong mipela i gutpela inap long yupela i ken bihainim. Mipela i no stap namel long yupela olsem ol man meri ino bin daunim laik bilong bodi bilong ol. ⁸ Mipela ino bin kisim kaikai bilong ol sampela lain sapos mipela ino baim yet, tasol, mipela i wok hat na strong long nait na dei, bilong wanem mipela ino laik givim hevi long wanpela bilong yupela. ⁹ Mipela i bin mekim dispela pasin ino olsem mipela ino gat namba long mekim. Nogat, tasol mipela i laik mekim olsem long kamap piksa long yupela i ken lukim na bihainim pasin bilong mipela. ¹⁰ Taim mipela ibin stap wantaim yupela, mipela ibin tok strong long yupela olsem, Sapos wanpela man em i no laik wok, orait em ino ken kaikai. ¹¹ Mipela i harim olsem sampela namel long yupela i no save mekim wok na tu sampela bilong yupela i save bagarapim samting bilong ol narapela man. ¹² Nau mipela i tok strong na givim tingting insait long Bikpela Jisas Krais long ol dispela kain man ol iken stap isi na kaikai long hatwok bilong ol yet. ¹³ Tasol yupela ol brata, yupela ino ken les long mekim wanem samting em i stret. ¹⁴ Sapos wanpela man ino bihainim tok bilong mipela istap insait long dispela pas, orait yupela i mas luksave long em na yupela ino ken wokbung wantaim em na em i ken pilim sem. ¹⁵ Yupela i noken lukim em olsem wanpela birua tasol yupela i mas tok strong long em olsem brata bilong yupela. ¹⁶ Bikpela em i papa bilong bel isi na em i ken givim bel isi long yupela long olgeta taim na long olkain wok yupela i mekim. Bai Bikpela iken stap wantaim yupela olgeta. ¹⁷ Mi Pol na dispela em i luksave pas bilong mi long yupela. Wantaim han bilong mi yet ,mi raitim dispela pas. Em rot mi save raitim long en. ¹⁸ Bai marimari bilong Bikpela Jisas Krais bilong yumi iken istap wantaim yupela olgeta.