24 ¹ God Yawe i belhat long ol Israel na em i tokim Devit ''Go, kaunim Israel na Juda.'' ² King i tokim Joap kepten bilong ami, husait i stap wantaim em, ''Go long wan wan lain bilong Israel, long Dan i go inap long Beseba na kaunim olgeta manmeri, olsem bai mi ken save long olgeta man husait inap long go pait.'' ³ Joap i tokim king olsem, ''God Yawe God bilong yu i ken mekim namba bilong ol manmeri bilong yu i kamap planti inap 100 taim na bikman bilong mi king i ken lukim em i kamap.Tasol bilong wanem king bikman bilong mi i laikim dispela? ⁴ Tasol king tok strong long Joap na namba wan ofisa bilong ol ami. Olsem na Joap na namba wan ofisa bilong ami i lusim king na i go long kaunim ol manmeri bilong Israel. ⁵ Ol i kalapim wara Jodan na i wokim kem klostu long Aroa, hap saut bilong biktaun insait long ples daun. Na ol i wokabaut abrusim ples Gat na i go long Jasa. ⁶ Ol i kam long Gilit na long graun bilong Tatim Hodsi na i go long Dan Jan na raunim na kamap long Sidon ⁷ Ol i kamap long strongpela taun bilong Taia na ol biktaun bilong ol Hivi na ol kenan. Orait ol i go long Negev insait long Juda long Beseba. ⁸ Taim ol i go pinis long olgeta hap bilong dispela graun, ol i kam bek long Jerusalem long pinis bilong 9-pela mun na 20 de. ⁹ Orait Joap i givim ripot long king olsem ol Israel i gat ol man bilong pait ol i bin kaunim. Hia long Israel 800,000 strongpela man i save long pait long bainat na ol man bilong Juda i stap olsem 500,000 man. ¹⁰ Devit i pilim nogut tru long bel bilong em bihain long em i bin kaunim ol man. Olsem na em i tokim God Yawe, ''Mi bin mekim sin taim mi mekim dispela samting. nau, God Yawe, rausim asua bilong wokman bilong yu, mi bin mekim longlong pasin tru.'' ¹¹ Taim Devit i kirap long moning, tok bilong God Yawe i kam long profet Gad, profet bilong Devit, em i tok, ¹² ''Go na tokim Devit; 'God Yawe i tok olsem; ''Mi givim yu tripela samting. Yu mas makim wanpela namel long ol.'''' ¹³ Olsem na Gad i go long Devit na i tokim em, ''Yu laik bai bikpela hangre i kamap tripela yia long graun bilong yu? O yu laik ranawe long ol birua bilong yu inap tripela mun taim ol i ranim yu? O yu laik bai bikpela hevi na sik na bagarap i ken i stap long graun bilong yu? Nau yu makim wanem rot yu laikim na bai mi kisim tok i go long man i salim mi.'' ¹⁴ Orait Devit i tokim Gad, ''Mi stap long bikpela hevi tru. Larim God i laik mekim wanem samting em inap mekim long mipela, tasol mipela i no laik ol man i mekim samting long mipela, long wanem marimari bilong em i gutpela tru.'' ¹⁵ Olsem na God Yawe i salim bikpela hevi na sik long ol Israel long moning taim i go inap dispela taim em i makim, 70,000 manmeri i dai long Dan i go inap long Beseba. ¹⁶ Taim ensel laik i go long bagarapim Jerusalem, God Yawe i senisim tingting bilong em long wanem em i tingim bagarap em bai i kamapim, olsem na em i tokim ensel husait i wok long bagarapim ol manmeri, ''Inap nau! Ruasim han bilong yu.''Long dispela taim ensel bilong God Yawe i sanap long ples bilong rausim skin bilong wit long ples bilong Arauna long Jebu. ¹⁷ Orait Devit i tokim God Yawe taim em i lukim ensel i wok long bagarapim ol manmeri, em i tok, ''Mi bin mekim sin na mi no bin tingting gut na mi sakim tok bilong yu. Tasol ol dispela sipsip, ol i bin mekim wanem? Plis yu i ken bagarapim mi wantaim ol lain bilong papa bilong mi!'' ¹⁸ Orait Gad i kam long Devit long dispela de na i tokim em, ''Go antap na wokim alta bilong God Yawe long hap ol i save rausim wit bilong Aruna dispela man Jebu.'' ¹⁹ Olsem na Devit i go antap long mekim ol samting Gad i bin tokim em long mekim, olsem God Yawe i tok. ²⁰ Arauna i lukluk i go ausait na i lukim king na ol wokboi bilong em i kam. Olsem na Arauna i go ausait na i brukim skru long king wantaim pes i go daun long graun. ²¹ Orait Arauna i tok, ''bilong wanem masta bilong mi king i kam long mi, wokboi bilong em?'' Devit bekim, ''Long baim dispela hap yu save rausim wit na bai mi wokim alta bilong God Yawe na sik na bagarap i stap long ol manmeri bai i pinis.'' ²² Arauna i tokim Devit, ''Kisim olsem samting bilong yu, masta king bilong mi, Mekim wanem samting i gutpela long yu. Lukim, hia em ol bulmakau bilong kukim ofa na ol samting bilong wilwilim wit na ol palang bilong pulim bulmakau bilong wokim paia. ²³ Olgeta dispela, king bilong mi, Mi, Aruna, bai i givim yu.'' Orait em i tokim king, ''God Yawe God bilong yu i ken amamas long yu.'' ²⁴ Na king i tokim Arauna olsem, ''Nogat, Mi pasin tingting pinis long baim long yu. Mi no ken kukim ofa i go long God Yawe long ol samting mi no baim long mani.'' Olsem na Devit i baim dispela ples bilong rausim wit na ol bulmakau inap long 50 sekel bilong silva. ²⁵ Devit i wokim alta bilong God Yawe long hap na kukim ol ofa bilong lotu na ofa bilong kukim olgeta. Olsem na God Yawe i harim prea bilong em na i rausim Israel long hevi na sik na bagarap.