17 ¹ Orait Ahitofel i tok long Apsalom. ''Nau larim mi makim 12 tausen man na bai mi go na ronim Devit nau nait. ² Bai mi kam long em taim em sot win na i no gat strong na bai mi mekim em i kirap nogut na pret. Na ol man i stap wantaim em bai lusim em na ranawe na bai mi pait wantaim king tasol. ³ Orait bai mi kisim olgeta man i kam long yu, olsem wanpela yangpela meri i kam long man bilong em na olgeta manmeri i ken stap bel gut aninit long yu.'' ⁴ Wanem Ahitofel i tok i amamasim Apsalom na olgeta ol bikman bilong Israel. ⁵ Olsem na Apsalom i tok, '' nau singautim Husai man long Akaia, tu na larim mipela i ken harim wanem em bai i tok.'' ⁶ Taim Husai i kam long Apsalom, Apsalom i tokaut klia long em wanem Ahitofel i bin tok na askim Husai, ''Em i orait long yumi mekim wanem Ahitofel i bin tok? Sapos nogat, tokim mipela wanem tingting bilong yu.'' ⁷ Olsem na Husai i tokim Apsalom, ''Ahitofel i givim tingting long dispela taim em i no gutpela.'' ⁸ Husai i tok moa olsem,''Yu save tru long papa bilong yu na ol man bilong em i strongpela man bilong pait, na ol i no gutpela man, ol i olsem bea i go strong long pikinini bea long graun bilong pilai. Papa bilong yu em i man bilong pait, em bai i no inap slip wantaim ol soldia bilong em nau nait. ⁹ Lukim, nau yet em i mas hait long sampela hul o long sampela narapela ples. Em bai i kamap olsem long taim sampela man bilong yupela ol i bin pait na kilim long stat bilong pait, olsem na husait i harim bai i tok olsem, 'Wanpela kain samting nogut i kamap i olsem, ol i kilim olgeta soldia husait i bin bihainim Apsalom.' ¹⁰ Orait, maski ol gutpela, strongpela soldia husait bel bilong ol i olsem bel bilong laion, bai i pret bilong wanem ol Israel i save long papa bilong yu em i strongpela man na ol man i stap wantaim em tu ol i strongpela man tru. ¹¹ Olsem na mi laik tokim yu olsem, olgeta ol Israel i kam bung wantaim yu, stat long Dan i go long Beseba, mekim i kamap planti olsem ol wesan bilong nambis na bai yu go long pait long ol wanwan. ¹² Orait mipela bai kam antap long em taim mipela painim em na bai mipela karamapim em olsem ol liklik moning ren i save pundaun long graun. Mipela i no inap lusim wanpela man bilong em o em yet i stap laip. ¹³ Sapos em i surik i kam bek insait long biktaun, orait bai olgeta Israel i kisim rop i go long dispela biktaun na mipela bai pulim em i go insait long wara, i go inap mipela i no painim wanpela liklik ston long hap.'' ¹⁴ Orait Apsalom na ol man bilong Israel i tok olsem, '' Tingting bilong Husai man Akaia em i gutpela moa long Ahitofel.'' God Yawe i bin tok orait long rausim gutpela tingting bilong Ahitofel olsem bai bagarap i kamap long Apsalom. ¹⁵ Orait Husai i tok long Sadok na long Abiata tupela pris, ''Ahitofel givim tingting long Apsalom na ol bikman bilong Israel long kain kain rot, tasol mi bin givim tingting long narapela samting. ¹⁶ Nau orait go hariap na ripot long Devit na tokim em, 'Yu noken kemp long nau nait long wesan bilong Araba, tasol sapos olsem yupela brukim wara i go long narapela sait, bilong wanem king bai i kam antap wantaim olgeta man husait i stap wantaim em.'' ¹⁷ Nau Jonatan na Aimas i save stap long liklik han wara bilong Rogel. Wanpela wokmeri i save go na tokim ol wanem ol inap long save, bilong wanem ol bai i gat tok taim wanpela i lukim ol i insait long biktaun. Taim ol i kisim tok, orait ol i mas i go na tokim king Devit. ¹⁸ Tasol wanpela yangpela man i lukim ol na i tokim Apsalom. Olsem Jonatan na Aimas i go hariap tru na kamap long haus bilong wanpela man long Baurim, husait i gat hul wara insait long banis klostu long haus, olsem na tupela i go hait insait. ¹⁹ Meri bilong dispela man i rausim maus bilong hul wara na putim, raunim olgeta long maus bilong hul wara i op na em i draim grein wit antap long en, olsem na nogat wanpela man i save long Jonatan na Aimas i stap insait long hul wara. ²⁰ Ol lain man bilong Apsalom i kam long dispela meri long haus bilong em na tok, ''Aimas na Jonatan i stap we?'' Meri i tokim ol, ''tupela i brukim wara i go long narapela sait. ''Orait ol i painim tupela tasol ol i no lukim tupela, olsem na ol i go bek long Jerusalem. ²¹ Em i olsem taim ol i go pinis Jonatan na Aimas i kam aut long hul wara. Tupela i go long ripot long king Devit, tupela i tokim em, ''Yu kirap na brukim wara hariap i go long narapela sait bilong wanem Ahitofel i givim ol kain kain tingting long yu.'' ²² Orait Devit wantaim ol manmeri husait i bin stap wantaim em i kirap na ol i brukim Wara Joden i go long narapela sait. Taim tulait i bruk i no gat wanpela i stap bek na i no brukim wara Joden. ²³ Taim Ahitofel i lukim olsem ol i no bihainim tingting bilong em, em i go pasim donki bilong em na i go. Em i go bek long haus long biktaun bilong em, stretim meri pikinini na olgeta samting long oda, na em i hagamapim em yet. Long dispela rot em i dai na ol planim em long matmat bilong papa bilong em. ²⁴ Orait Devit i kam long Mahanaim. Na long Apsalom, em i brukim Wara Joden i go wantaim olgeta man Israel. ²⁵ Apsalom i makim Amasa long stap namba wan ofisa bilong ami long senisim Joap. Amasa em i pikinini man bilong Jeter long lain Ismael, husait i bin slip wantaim Abigel, husait em i pikinini meri bilong Nahas na susa bilong Seruia, em i mama bilong Joap. ²⁶ Orait ol lain Israel na Apsalom i kemp long graun bilong Gileat. ²⁷ Em i kamap taim Devit i bin kam long Mahanaim, olsem na Sobi pikinini man bilong Nahas bilong Raba long lain Amon na Makir pikinini man bilong Amiel bilong Lo Debar na Barsilai long lain Gileat bilong Rogelim, ²⁸ i bringim mat bilong slip na blanket bilong karamap, ol plet, sospen, wit, bali plawa, grein ol i rostim,bin, prut, ²⁹ hani, bata, sipsip na sis ol wokim long susu,olsem na Devit na ol manmeri i stap wantaim em ol inap kaikai. Ol dispela man i bin tok, ol manmeri i hangere na i no gat strong na nek drai insait long ples wesan nating.''