14 ¹ Nau Joap pikinini bilong Seruia i pilim olsem bel bilong king i laik long lukim Apsalom. ² Olsem na Joap i salim tok i go long Tekoa na kisim meri i gat gutpela save i kam long em. Na em i tokim em, "Plis mekim olsem yu meri bilong krai na werim klos bilong krai. Plis noken welim yu yet wantaim oil, tasol yu mekim yu yet luk olsem wanpela meri i krai longpela taim long dai man. ³ Orait yu ken i go long king na tokim em wanem bai mi tokim yu long en." Olsem na Joap i tokim dispela meri long ol toktok em bai tokim king. ⁴ Taim meri long Tekoa i toktok long king, em i putim pes i go daun long graun na i tok, "Helpim mi, king." ⁵ Na king i tok long em, "Wanem samting em i rong?" Na meri i bekim tok, "Long mekim tok tru, mi nogat man, na man bilong mi i dai pinis. ⁶ Mi wokmeri bilong yu, mi gat tupela pikinini man na ol i pait long ol yet long gaden, na nogat man i stap namel long skelim tupela bai ol ino ken pait. Wanpela i sutim narapela na kilim em i dai. ⁷ Olsem na olgeta lain tumbuna i bikmaus strong long wokmeri bilong yu, na ol i tok, 'Givim mipela dispela man husat i kilim brata bilong em long han bilong mipela, olsem na mipela bai kilim em tu i dai, long peim bek laip bilong brata bilong em. Olsem na ol bai pinisim olgeta pikinini bilong mi. Olsem na hap paia tasol i lait i stap wantaim mi, em bai ol i rausim na ol i no inap larim nem bilong man bilong mi o larim tumbuna lain bilong mi tu i stap antap long dispela graun." ⁸ Na king i tokim dispela meri, "Go long haus bilong yu, na bai mi tokim ol samting ol bai i mekim long yu." ⁹ Dispela meri bilong Tekoa i bekim tok bilong king, "Masta bilong mi, king, larim asua i ken stap long mi wantaim famili bilong papa bilong mi. King na sia king bilong em i nogat asua i stap." ¹⁰ King i bekim tok, "Husat man i mekim wanem toktok long yu, kisim em i kam long mi, na em bai i no inap mekim nogut long yu ken." ¹¹ Orait meri i tok, "Plis, inap king i ken tokaut long nem bilong God Yawe, na ol man i noken bekim asua bilong blut i kapsait bai ol i no inap bagarapim narapela man moa. Olsem na ol i noken bagarapim pikinini bilong mi." Na king i bekim tok, "Long nem bilong God Yawe i stap laip, nogat wanpela hap gras bilong pikinini man bilong yu bai lus na pundaun long graun." ¹² Orait dispela meri i tok, "Plis larim wokmeri bilong yu i mekim sampela tok moa long masta na king bilong mi. " Em i tok, "Yu ken toktok nau." ¹³ Olsem na dispela meri i tok, "Bilong wanem na yu kamapim kain samting i no stret long ol manmeri bilong God? Long tokim dispela samting, king i olsem man i gat asua, long wanem king i no kisim i kam bek pikinini man bilong em long haus em i bin rausim em long en. ¹⁴ Olsem na yumi olgeta mas i dai, na yumi olsem wara kapsait long graun, we i no inap go bek antap. Tasol God bai i no inap rausim laip, moabeta, em i mas painim wei bilong putim bek ol man ol i kisim i go pinis long en. ¹⁵ Orait nau, luk olsem mi kam long tokim ol dispela ol samting long masta na king bilong mi, bilong wanem ol man i mekim mi pret. Olsem wokmeri bilong yu i tok long em yet, 'Nau bai mi toktok long king. Ating, king bai mekim sampela samting antap long askim bilong wokmeri bilong em. ¹⁶ Ating king bai harim tok bilong mi na helpim mi wokmeri bilong em long han bilong ol man i laik bagarapim mi na pikinini man bilong mi wantaim, long ples graun God Yawe i givim mipela ol manmeri bilong em.' ¹⁷ Orait wokmeri bilong yu i bin prea olsem, 'God Yawe, plis larim tok bilong masta na king bilong mi givim malolo long i stap gut. Masta na king bilong mi em i olsem ensel bilong God Yawe na em i save skelim gutpela pasin wantaim nogut pasin. Olsem na God Yawe em God bilong yu, em bai i stap wantaim yu." ¹⁸ Orait king i bekim tok bilong meri na i tok olsem, "Plis noken haitim wanpela samting long mi taim mi askim yu." Na meri i bekim tok, "Larim masta na king bilong mi i ken toktok nau." ¹⁹ King i tok, "Ating Joap ino bin pasim sampela tingting wantaim yu long ol dispela samting?" Na meri i bekim tok, "Taim yu i stap masta na king bilong mi, nogat wanpela man bai i ranawe long hansut o long hankais bilong ol samting masta na king bilong mi i tok long en. Em Joap wokman bilong yu tasol i tokim mi ol toktok long tokim yu ol dispela samting na wokmeri bilong yu i tokim yu pinis. ²⁰ Wokman bilong yu Joap i kamapim ol dispela samting long mekim yu long senisim ol hevi i wok long kamap. Masta bilong mi i gat gutpela tingting, olsem ensel bilong God Yawe i gat gutpela save, na em i save long olgeta samting i save kamap long dispela graun." ²¹ Olsem na king i tokim Joap, "Nau lukim, bai mi wokim dispela samting. Orait yu go na kisim yangpela man Apsalom i kam bek." ²² Olsem na Joap i putim pes i go daun long graun na i givim biknem na bel amamas long king. Na Joap i tok, "Nau, mi wokman bilong yu, mi winim bel bilong yu, masta na king bilong mi. Long wanem, king i mekim ol samting pinis long askim bilong wokman bilong em." ²³ Olsem na Joap i kirap na i go long Gesur, na bringim Apsolam i kam bek long Jerusalem. ²⁴ Na king i tok," Em i ken kam bek gen long haus bilong em yet, tasol em i no inap lukim pes bilong mi." Olsem na Apsalom i kam bek long haus bilong em yet, tasol em i no lukim pes bilong king. ²⁵ Nau long olgeta hap bilong Israel i nogat wanpela man i luk naispela moa olsem Apsalom, na ol man i amamas long gutpela lukluk bilong em. Aninit long leg bilong em i kam antap long het bilong em i nogat wanpela makmak i stap. ²⁶ Taim Apsalom i katim het gras bilong em long arare bilong olgeta yia,em i save skelim hevi bilong gras bilong em. Long wanem, gras i hevi na hevi bilong en i olsem 200 kilo, olsem ol i skelim long skelmak bilong king. ²⁷ Apsalom em i karim tripela man pikinini na wanpela piknini meri, husat nem bilong em i Tamar. Em i naispela meri tru. ²⁸ Apsalom i stap tupela yia olgeta long Jelusalem na em i no lukim pes bilong king. ²⁹ Olsem na Apsalom i salim toktok long Joap bilong salim em i go long king, tasol Joap i no gat laik long kam long Apsalom. Olsem na Apsalom i salim tok namba tu taim, tasol Joap i no kam long em. ³⁰ 1Olsem na Apsalom i tokim ol wokman bilong em, "Lukim, gaden bilong Joap i stap klostu long gaden bilong mi, na wit bali bilong em i stap long hap. Yupela go na putim paia antap long gaden bilong en." Olsem na ol wokman bilong Apsalom i go kukim dispela gaden wantaim paia. ³¹ Orait Joap kirap na i kam long haus bilong Apsalom na i tok long em, "Bilong wanem ol wokman bilong yu i go kukim gaden bilong mi long paia?" ³² Apsalom i bekim tok bilong Joap ,"Lukim, mi salim tok i go long yu na mi tok, 'Kam long hia na bai mi inap long salim yu long tokim king, "Bilong wanem mi kam long Gesur? Em i gutpela long mi sapos mi i stap yet long hap. Olsem na nau larim mi lukim pes bilong king. na sapos mi gat asua, larim em i ken kilim mi.""' ³³ Olsem na Joap i go long king na tokim em. Taim king i singautim Apsalom, em i kam long king na brukim het i go daun tru long graun long ai bilong king, na king i kis long Apsalom.