13 ¹ Long yia 18 long taim bilong King Jeroboam, Abaija stat long kamap lida long lukautim ol Juda. ² Em i stap King inap long tripela yia long Jerusalem, nem bilong mama bilong em Makaia, pikinini meri bilong Uriel long Gibea. I gat bikpela pait i bin bruk namel long Abaija na Jeroboam. ³ Abaija i bin i go insait wantaim ami long pait wantaim ol strongpela soldia, em 400,000 man ol i makim ol pinis. Jeroboam i bin putim mak bilong pait wantaim 800,000 man ol i makim pinis, ol strongpela soldia. ⁴ Abaija i bin sanap long maunten Semaraim, em ples daun bilong kantri Efraim, na i tok, yupela olgeta harim, Jeroboam na olgeta Israel! ⁵ Yupela i no save olsem God Yawe, em God bilong Israel, i givim pinis pawa i go long Israel long Devit oltaim, long em na ol pikinini bilong em long pasin bilong mekim kontrak? ⁶ Tasol Jeroboam pikinini man bilong Nebat, wokboi bilong Solomon pikinini bilong Devit, i kirap na birua long masta bilong em. ⁷ Ol man bilong mekim ol kainkain rabis pasin i bin poroman wantaim em. Ol i birua long Rehoboam pikinini man bilong Solomon, Rehoboham em yangpela na em i nogat planti save long sanap na winim ol long toktok. ⁸ Olsem na, nau yupela tingting long ranawe long kingdom bilong Yawe em samting i bin stap gut long han bilong ol lain bilong Devit, long wanem yupela i bikpela ami tru na yupela i gat gol piksa bilong animel Jeroboam i bin mekim ol god giaman bilong yupela. ⁹ Tasol yupela i no bin rausim ol pris bilong God Yawe, na ol lain bilong Aron, na ol livai, na makim ol pris long laik bilong yupela olsem ol arapela man save mekim? Husait i kam wok olsem pris, givim yangpela animel olsem ofa na 7-pela yangpela sipsip, em i kamap pris bilong samting em i no god tru. ¹⁰ Tasol long mipela, God Yawe em God bilong mipela, na mipela i no givim baksait long em. Mipela lain bilong Aron, mipela i gat ol pris na ol Livai ol i save sanap long wok bilong ol. ¹¹ Long olgeta moning na apinun ol i save mekim ofa long God Yawe wantaim ofa bilong kukim olgeta na mekim gutpela smuk smel na tu ol i save stretim ol bret long holipela tebol na tu ol i save laitim lam long stik lam ol i mekim long gol, bilong kukim long olgeta apinun. Mipela save bihainim tok bilong God Yawe, God bilong mipela, tasol yupela wok long givim baksait long em. ¹² God Yawe em stap wantaim mipela klostu long het bilong mipela, na ol pris bilong em ol i holim biugel long mekim nois long salim tok lukaut. Yupela ol Israel, yupela i no ken pait wantaim God Yawe, em God bilong ol tumbuna bilong mipela, long wanem bai yupela i no inap tru winim em. ¹³ Tasol Jeroboam i giamam toktok yet na salim ol birua long i go baksait long banisim ol Juda. ¹⁴ Taim ol Juda i lukluk bek na ol i guria olsem ol birua i kamap long pes bilong ol na tu kam long beksait bilong ol. Na ol pris i mekim nois na ol Juda krai i go long God Yawe, na ol pris winim ol biugel. ¹⁵ Taim ol man bilong Juda i singaut strong moa yet na God i bagarapim Jeroboam na ol Israel long ai bilong Abaija na ol lain Juda. ¹⁶ Ol manmeri bilong Israel i ranawe long lain Juda, tasol God i givim ol long han bilong ol Juda. ¹⁷ Abaija na ol ami bilong em i kilim planti man tru, olsem 500,000 bilong ol gutpela soldia bilong Israel olgeta i dai. ¹⁸ Long dispela rot, ol manmeri bilong Israel i bin lus long dispela taim, na ol Juda i bin win bikos ol i bin kisim strong bilong ol long God Yawe, em God bilong tumbuna bilong ol. ¹⁹ Abaija i ronim Jeroboam, na kisim ol biktaun bilong em, Betel hauslain, Jesana hauslain na Efron hauslain. ²⁰ Jeroboam i no inap tru kisim bek pawa long taim bilong Abaija na God Yawe i bagarapim Jeroboam na em i dai. ²¹ Tasol Abaija kamap strong tru, em i maritim 14 meri na kamap papa bilong 22 pikinini man na 16 pikinini meri. ²² Ol arapela wok bilong Abaija, pasin bilong em, na ol toktok bilong em ol i bin raitim long stori bilong profet Ido.