16 ¹ God Yawe i tokim Samuel olsem, "Hamas taim bai yu krai na sori long Sol, Mi bin rausim em pinis long kamap king bilong ol Israel? Pulimapim oil long kom bilong sipsip na karim i go. Bai mi salim yu i go long Jesi long Betlehem, mi bin makim wanpela bilong ol pikinini bilong en long kamap king." ² Na Samuel i askim em olsem, "Mi bai go olsem wanem? Sapos Sol i harim olsem, em bai kilim mi." Na God Yawe i tok, "Kisim yangpela bulmakau i go na yu tok, 'Mi kam long mekim ofa long God Yawe.' ³ Singautim Jesi i kam long ofa na bai mi soim yu wanem yu bai mekim. Yu bai kapsaitim oil long het bilong wanpela pikinini olsem mi makim." ⁴ Orait Samuel i go long Betlehem olsem God Yawe i tok . Ol hetman bilong biktaun i pret na i askim, "Olsem wanem, yu kam wantaim tok bilong bel isi?" ⁵ Na em i tok, "Yes mi kam wantaim bel isi na mi laik mekim ofa long God Yawe. Redi na stretim yupela yet na kam mekim ofa wantaim mi." Orait em i tokim Jesi wantaim ol pikinini man bilong em long stretim ol yet na kam long mekim ofa. ⁶ Taim ol i kam, em i lukim Eliap na i tokim em yet olsem, dispela man God Yawe i makim em i sanap pinis. ⁷ Tasol God Yawe i tokim Samuel, "Yu no ken lukluk long samting man i save lukim, o longpela bilong em, long wanem mi bin rausim em. God Yawe i no save lukim samting olsem man i save lukim, man i save lukluk long autsait tasol God Yawe i save skelim bel bilong man." ⁸ Orait Jesi i singautim Abinadap i kam long pes bilong Samuel. Na Samuel i tok, "Em tu God Yawe i no makim." ⁹ Orait Jesi i kisim Sama i kam, tasol Samuel i tok, "Em tu God i no makim." ¹⁰ Jesi i kisim 7-pela pikinini bilong em i kam long Samuel. "Tasol Samuel i tokim Jesi, "God Yawe i no makim wanpela bilong ol." ¹¹ Orait Samuel i askim Jesi, "Yu ting olgeta pikinini man bilong yu i stap long hia?" Na em i bekim tok, I gat liklik brata bilong ol i stap, tasol em i save lukautim ol sipsip. "Na Samuel i tokim Jesi, Salim ol i go kisim em i kam, bai mipela wet inap ol i kam." ¹² Orait Jesi i salim wanpela man i go kisim em i kam. Em i lait skin na i gat gutpela ai na em i luk nais tru. Na God Yawe i tok, "Em dispela pikinini tasol, Kirap na kapsaitim oil long het bilong em." ¹³ Orait Samuel i kisim kom bilong sipsip i gat oil na kapsaitim long het bilong Devit namel long ol brata bilong em. Long dispela taim yet spirit bilong God Yawe i kam pulap long Devit. Orait Samuel i kirap na i go bek long Rama. ¹⁴ Na Spirit bilong God Yawe i lusim Sol na God i larim spirit nogut i kam bagarapim em. ¹⁵ Na ol wok man bilong Sol i tokim em, "Lukim, God i larim spirit nogut i kam long bagarapim yu. ¹⁶ Masta yu tokim mipela ol wokman bilong yu long painim man i save pilai musik gut. Orait taim God i larim spirit nogut i kam long yu, em bai pilai musik na bai yu pilim orait." ¹⁷ Sol i tokim ol wokman bilong em, "Painim man i save pilai musik gut na kisim em i kam long mi." ¹⁸ Orait wanpela bilong ol yanpela man i bekim tok olsem, "Mi bin lukim pikinini man bilong Jesi bilong Betlehem, em i gutpela man na em i gat save tru long pilai musik,em i gat save long toktok, em i man bilong pait, em i naispela man tru na God Yawe i stap wantaim em." ¹⁹ Orait Sol i salim ol man bilong karim tok i go long Jesi na i tok, "Salim pikinini man bilong yu Devit i kam, husait i save lukautim ²⁰ sipsip."Jesi i kisim planti bret na wanpela kontena wain na putim antap long donki wantaim yangpela meme na em i salim wantaim pikinini man bilong em Devit i go long Sol. ²¹ Orait Devit i kam long Sol na em i stap long helpim em. Sol i laikim em planti na em i kamap olsem man bilong karim klos pait bilong en. ²² Sol i salim ol man i go tokim Jesi, "Larim Devit i ken stap long haus bilong mi, long em mi painim gutpela samting." ²³ Long taim spirit nogut i kam long Sol, Devit i save kisim gita na pilai. Olsem na Sol i save kisim gutpela tingting na pilim orait na spirit nogut i save lusim em.