5 ¹ Mi givim strongpela tok long ol hetman bilong yupela. Mi tu mi wanpela hetman, mi wanpela man husait i bin stap na lukim dispela hevi Krais i karim. Na bai stap namel tu long glori bilong God taim Krais i kam bek. ² Olsem na mi givim strongpela tok long yupela ol hetman olsem, yupela i mas lukautim gut ol manmeri bilong God, wantaim gutpela bel olsem God i laikim. Na yupela i mas mekim dispela wok long tingting bilong yupela yet, na i no olsem ol man i tokim yupela long mekim. ³ Noken kamap bikman long ai bilong ol manmeri yupela i lukautim. Nogat, Yupela i mas mekim gutpela pasin tasol na bai ol manmeri i bihainim yupela. ⁴ Na taim bikpela wasman bilong olgeta sipsip i kam, yupela bai kisim bikpela prais i stap gut oltaim oltaim. ⁵ Long wankain pasin, yupela ol yanpela man i mas daunim yupela yet na i stap aninit long ol bikman.Yupela olgeta i mas laikim ol arapela manmeri na helpim ol. Long wanem, God i save daunim ol man i apim ol yet na em i save marimari long ol man i save daunim ol yet. ⁶ Olsem na yu mas daunim yu yet long ai bilong God na bai God i apim yu long taim bilong em yet.. ⁷ Karim olgeta hevi na wari bilong yupela i go long God, Long wanem, God i save wari long yupela. ⁸ Yupela i mas was na redi,satan dispela birua bilong yupela, em i save raun olsem laion na painim ol man long kilim na kaikai. ⁹ Sanap strong na holim pas bilip. Yu mas save olsem olgeta bilip manmeri long dispela graun tu i wok long karim wankain hevi i stap. ¹⁰ Liklik taim tasol na bai yupela i karim hevi long dispela graun. Na dispela God i pulap long olgeta marimari, em i bin singautim yupela long stap oltaim long glori bilong en, em bai strongim bilip bilong yupela na mekim gut long yupela. ¹¹ God i gat olgeta strong na pawa, em bai i stap oltaim oltaim. I tru. ¹² Mi raitim dispela pas long tokaut long yupela olsem, Silvanus em i wanpela brata bilong lukautim ol wok gut tru. Mi givim strongpela tok na tokaut long gutpela wok bilong Silvanus taim mi raitim dispela pas. Dispela tok mi raitim em i tru. Yupela mas sanap strong long dispela tok. ¹³ Dispela meri bilong Babilon,ol i makim em tu i salim gude tu long yupela. Mak tu em pikinini bilong mi i salim gude tu long yupela. ¹⁴ Givim gude long ol narapela wantaim amamas na soim laikim bilong God. Bel isi bilong Jisas Krais i ken stap wantaim yupela olgeta.