3 ¹ Long dispela rot, yupela ol maritmeri i mas daunim yupela yet na stap aninit long ol man bilong yupela yet. Yu mekim olsem na ol man wok long sakim tok bilong God, ol bai lukim gutpela pasin bilong yupela meri bilong ol, maski ol i no inap toktok tasol pasin bai helpim ol man long tanim bel. ² Na bai ol igat luksave long gutpela pasin bilong yu na belgut. ³ Yupela i no ken soim gutpela bilong yupela long ausait bilas olsem, pasim gras, bilas long gol na werim ol gutpela klos. ⁴ Nogat, trupela bilas yu mas soim gutpela pasin bilong yu insait long bel bilong yu, bilas bilong i stap longpela taim em olsem yu i mas daunim yu yet na stap isi. Dispela em bikpela na gutpela samting long ai bilong God. ⁵ Ol stretpela meri i save daunim ol yet na stap isi tasol. Ol i save long tok tru bilong God na ol i save i stap aninit long man bilong ol.. ⁶ Long wankain rot, Sera i save harim tok bilong Abraham na kolim Abraham olsem em i bikpela. Yu tu bai olsem pikinini bilong Sera, sapos yu i no save poret long hevi na wokim gutpela pasin tasol. ⁷ Wankain tu, yupela ol man i mas stap wantaim meri bilong yupela wantaim gutpela tingting na save, long wanem, ol meri i nogat strong. Yupela i mas mekim gutpela pasin long ol meri bilong yupela, long wanem, ol meri tu bai kisim laip i stap oltaim. Yupela i mas mekim dispela pasin na em bai i no inap pasim prea bilong yupela. ⁸ Long pinisim tok, yupela olgeta i mas i gat wankain tingting, na laikim yupela narapela long bel bilong yupela na daunim yupela yet. ⁹ Noken mekim nogut long narapela husait i mekim nogut long yu. Yu mas mekim gutpela pasin tasol long ol lain i mekim nogut long yu, long wanem, bai yu kisim bikpela blesing long dispela pasin yu mekim. ¹⁰ Husait ol manmeri i laik long i stap gut na i gat gutpela laif, ol i mas noken larim maus bilong ol i mekim tok nogut na tok giaman. ¹¹ Ol i mas givim baksait long pasin nogut na mekim gutpela pasin tasol. Em i mas painim rot long mekim gutpela pasin na stap bel isi. ¹² Bikpela i save lukluk long ol stretpela manmeri na harim prea bilong ol. Tasol, God i no save i no save wanbel long ol manmeri i mekim sin. ¹³ Husait bai bagarapim yu, sapos yu gat laik long mekim gutpela samting? ¹⁴ Tasol, sapos yu kisim hevi long gutpela pasin bilong yu, orait em bai yu kisim blesing long dispela. Noken pret long wanem samting ol man i save pret long en na noken wari long wanpela samting. ¹⁵ Tasol, kisim Krais Bikpela bilong yu olsem em i gutpela samting tru. Yu mas redi oltaim long tokim ol manmeri olsem yu save tru long God na gutpela pasin bilong en. Yu mas toktok isi long ol wantaim pasin bilong daunim yu yet. ¹⁶ Yu mas i gat gutpela tingting i kam long God na husait i laik bagarapim gutpela laip bilong yu insait long Krais bai ol i sem, long wanem, yu no man bilong mekim pasin nogut. ¹⁷ Em i gutpela sapos God i laikim bai yu karim hevi taim yu mekim gutpela pasin na i no mekim pasin nogut. ¹⁸ Krais em i stretpela man, tasol em i kisim hevi bilong mipela ol sin manmeri. Krais i mekim dispela long kisim mipela i kam klostu long God. Ol i kilim Krais i dai long bodi, tasol Spirit bilong God i kirapim em gen. ¹⁹ Long Spirit, Krais i go na autim tok long ol spirit husait nau i stap long kalabus. ²⁰ Ol lain i sakim tok taim bel isi bilong God i weitim ol long taim bilong Noa, long dispela taim Noa i bin wokim sip. God i lukautim gut Eit-pela manmeri tasol long taim bikpela wara tait i bin kamap. ²¹ Dispela wara em olsem piksa bilong baptais, long wanem, God i save kisim bek yupela long wara bilong baptais. Baptais em i no bilong rausim sin bilong ol man. Na long kisim yupela God i bin kirapim Krais Jisas long matmat. ²² Krais i go long heven na em i stap long hansut bilong God. Ol ensel na ol bikman wantaim olgeta pawa bilong dispela graun i mas kam aninit long Em.