9 ¹ Bihain long Solomon i wokim haus bilong God Yawe na bikpela haus bilong king, em i amamas tru long wok em i mekim, ² God Yawe i kamap long Solomon namba tu taim, olsem em i bin kamap long em long Gibion. ³ Na God Yawe i tokim em, ''Mi bin harim prea na ol askim bilong yu long nem bilong mi. Nau mi mekim dispela haus yu wokim bilong mi i kamap holi na nem bilong mi bai i stap oltaim long wanem, ai na bel bilong mi bai i stap long dispela haus oltaim. ⁴ Na God Yawe i tokim em, sapos yu wokabaut long ai bilong mi wankain olsem papa bilong yu Davit husait em i save bihainim olgeta tok na lo bilong mi i stap gut, ⁵ Na bai mi kamapim sia king long kingdom bilong ol Israel oltaim, olsem mi bin promisim papa bilong yu Davit na mi tok, ''Ol lain tumbuna bilong yu bai mi mekim ol i stap gut long sia king bilong Israel. ⁶ Na sapos yu o ol pikinini bilong yu i tanim baksait na i no bihainim ol lo na wok we mi bin givim yu na sapos yu go na lotu long ol arapela god na brukim skru long ol, ⁷ em bai mi rausim ol Israel wantaim bikpela haus bilong ol long dispela graun mi bin givim ol. Na ol bai i kisim nem na piksa nogut namel long ol arapela lain. ⁸ Dispela haus bai i bagarap na taim olgeta man i kam na lukim, ol bai i guria na mekim nois na askim olsem, ''Bilong wanem na God Yawe i mekim olsem long dispela graun na long dispela haus?'' ⁹ Ol arapela bai i kisim tok long wanem, ol i no harim tok bilong God Yawe em God bilong ol, husait em i bin kisim ol lain tumbuna bilong ol long Isip na ol arapela god we ol i save brukim skru na lotu long ol. Long dispela as tasol, God i givim ol dispela bikpela hevi long ol.'' ¹⁰ Bihain long pinis bilong 20-pela yia, Solomon i pinisim tupela haus, em haus bilong God Yawe na bikpela haus bilong king. ¹¹ Nau Hiram, king bilong Tair i givim ol diwai sida na pain na gol long Solomon. Na Solomon i givim Hiram 20-pela biktaun long graun bilong Galili. ¹² Hiram i kirap long taire na i go lukim dispela biktaun we solomon i bin givim long em, tasol Hiram i no hamamas long ol dispela biktaun. ¹³ Na Hiram i tok, ''Brata, wanem kain ol biktaun yu givim long mi?'' Na em i kolim ol graun bilong Kabul, we dispela nem ol i kolim long nau tu. ¹⁴ Hiram i givim 120 gutpela gol i go long king. ¹⁵ Dispela em ol nem bilong ol wokboi we king Solomon i salim ol long wokim haus bilong God Yawe na bikpela haus bilong em, Milo, banis bilong Jerusalem na Haso na Megido na Gese. ¹⁶ Fero king bilong ol Isip, i kisim Gese na em i kukim na kilim olgeta Kenan insait long biktaun na em i givim dispela biktaun long pikinini meri bilong em, husait em i meri bilong Solomon olsem pe bilong marit. ¹⁷ Na Solomon i wokim gen biktaun Gese na Bet Horon daunbilo, ¹⁸ Balat na Tama i stap long ples nating long graun bilong Juda, ¹⁹ Na olgeta stua long biktaun em i kisim na ol taun bilong caris na ol wok man bilong hos na olgeta samting em i laikim long Jerusalem na long Lebanon na long olgeta graun em i bosim. ²⁰ Na long olgeta lain bilong Arom, bilong Hitie, bilong Persia, bilong Hivai na bilong Jebu em ol lain i no bilong Israel, ²¹ Ol lain tumbuna bilong ol, husait i stap long dispela graun, bai i no inap kisim bagarap long han bilong ol Israel olgeta. Solomon em i mekim ol i kamap wokboi, long dispela taim i kam inap long nau. ²² Olsem na Solomon i no givim strongpela wok long ol lain Israel, tasol ol i mekim wok olsem ami na wokman na opisa bilong ami na ol man bilong ronim hos na karis bilong em. ²³ Dispela ol lain tu em ol namba wan opisa i lukautim ol het wok bilong Solomon, olsem 550 lain i lukautim ol het wok na ol manmeri husait i mekim ol dispela wok. ²⁴ Pikinini meri bilong Fero i lusim taun bilong Davit na i go long haus bilong en we Solomon i bin wokim bilong em, na bihain Solomon i wokim Milo. ²⁵ Tripela taim long wanpela yia, Solomon i save givim ofa i gat gutpela smel long alta bilong God. Em i pinisim haus lotu na i lotu insait long en. ²⁶ King Solomon i wokim wanpela sip long Ison Gebe, em i klostu long Elat, arere long nambis bilong Retse long graun bilong Idom. ²⁷ Hiram i salim ol wokboi bilong em i go long ples bilong sip bilong Solomon, wantaim ol man bilong solwara na ol wokman bilong Solomon tu. ²⁸ Ol i go long Opi wantaim ol wokboi bilong Solomon na i kisim 420 gutpela gol bilong givim long king Solomon.