14 ¹ Yupela i mas bihainim pasin bilong laikim narapela na wok strong long ol presen bilong Holi Spirit. Yupela i mas lukluk moa long presen bilong autim tok olsem ol profet. ² Man husait i mekim tok long narapela tokples i no save givim tok long ol manmeri tasol em i save toktok long God, na nogat man i save long tok em i autim long wanem em i mekim ol tok hait long strong bilong Spirit. ³ Tasol man i autim tok profet i save toktok long strongim bilip bilong ol man na kirapim ol long mekim gutpela pasin na mekim orait bel bilong ol manmeri. ⁴ Man husait i mekim tok long narapela tokples i save strongim em yet, tasol man husait i autim tok profet i save strongim sios. ⁵ Mi laik bai yupela olgeta i mekim tok long narapela tokples, tasol i gutpela moa mi laik yupela i ken autim tok profet. Man husait i autim tok profet i winim tru man husait i mekim tok long kainkain tokples (orait i mas gat man i ken tanim tok), na bai ol manmeri bilong sios i ken kamap strong. ⁶ Tasol ol brata na ol susa, sapos mi kam long yupela na mekim tok long kainkain tokples, bai mi helpim yupela olsem wanem? Mi mas tokim yupela ol tokhait God i soim mi o givim yupela save o autim tok profet o skulim yupela. ⁷ Sapos ol samting i no gat laip olsem mambu o gita i no mekim ol kainkain krai bilong ol, olsem wanem bai man i save long wanem kain samting ol man i pilai? ⁸ Na sapos biugel i mekim narapela kain nois, bai man i redi long taim bilong pait olsem wanem? ⁹ Em i wankain long yupela. Sapos yupela mekim tok i no klia tru, bai man i save long tok bilong yupela olsem wanem? Yupela bai toktok na nogat man bai save long ol tok bilong yupela. ¹⁰ Tru, i gat planti kain kain tokples long graun na nogat wanpela bilong ol dispela tokples i nogat as. ¹¹ Tasol sapos mi no save long as bilong wanpela tokples, mi bai kamap olsem man bilong narapela ples long man i autim tok. Na man i autim tok bai kamap olsem man bilong narapela ples long mi. ¹² Wankain olsem long yupela. Yupela i save laikim tru olsem presen bilong Spirit i mas kamap ples klia, olsem na yupela i mas wok hat long strongim sios. ¹³ Olsem na man husait i mekim tok long narapela tokples, i mas prea olsem em i ken tanim dispela tok . ¹⁴ Sapos, mi i prea long narapela tokples, spirit bilong mi tu i prea, tasol tingting bilong mi i stap nating. ¹⁵ Olsem na bai mi mekim wanem? Bai mi prea long spirit bilong mi tasol o bai mi prea long tingting bilong mi tu. Mi bai singim song long spirit bilong mi na mi bai singim song long tingting bilong mi tu. ¹⁶ Sapos yu litimapim nem bilong God long spirit, olsem wanem bai narapela man i tok, "I tru" taim yu tok tenkyu, na sapos em i no save long wanem tok yu mekim? ¹⁷ Tru yu givim gutpela tok tenkyu tasol dispela i no strongim narapela man. ¹⁸ Mi tok tenkyu long God olsem, mi inap mekim tok long kain kain tokples moa long yupela olgeta. ¹⁹ Tasol long sios mi ting mi bai mekim 5-pela hap tok long tingting bilong mi, i nap long mi skulim ol narapela man na maski long 10,000 pela hap tok long narapela tokples. ²⁰ Ol brata na ol susa, yupela i no ken stap olsem ol pikinini long tingting bilong yupela. Long olgeta pasin nogut, yupela i mas stap olsem ol liklik pikinini. Tasol tingting bilong yupela i mas stap olsem tingting bilong bikpela manmeri. ²¹ Long lo bilong God ol i raitim ol tok olsem, "Mi bai toktok long ol manmeri bilong mi long narapela kain tokples na long maus bilong ol narapela lain. Tasol ol i no nap harim tok bilong mi," Bikpela em i tok. ²² Olsem na pasin bilong mekim tok long kain kain tokples, i olsem mak long soim ol man i no bilip..Tasol pasin bilong autim tok profet, i olsem mak bilong ol bilip manmeri na i no long ol man i no bilip. ²³ Na sapos olgeta bilip manmeri i kam bung wantaim na olgeta i mekim tok long ol kain kain tokples, na narapela lain na ol man i no bilip i kam insait, ating bai ol i no inap tok olsem yupela i longlong? ²⁴ Tasol sapos yupela olgeta i autim tok olsem profet na wanpela man i no bilip o narapela man i kam insait, olgeta tok em i harim bai sutim bel bilong em, na dispela ol tok bai skelim em. ²⁵ Na olgeta hait pasin bilong bel bilong em, bai kamap ples klia na em bai putim pes i go daun long lotu long God na em bai tokaut olsem, tru God i stap namel long yupela. ²⁶ Bihain long en wanem bai kamap, ol brata na ol susa? Taim yupela i kam bung wantaim, wanpela i gat song, wanpela i gat tok long skulim ol arapela, wanpela i gat tok God i tokim em, na wanpela i gat tok bilong narapela tokples, na wanpela i tanim ol dispela tok. Orait, yupela i mas mekim olgeta samting long strongim sios. ²⁷ Sapos wanpela man i mekim tok long narapela tokples, orait larim tupela o tripela i mas mekim dispela wok, wanpela i mas tok pastaim na narapela bihain long em na wanpela man i mas tanim tok bilong ol. ²⁸ Sapos i nogat man long tanim dispela tok, orait ol man i mekim tok long kain kain tokples i mas stap isi insait long sios. Ol i mas toktok long ol yet na long God. ²⁹ Larim tupela man o tripela man bilong autim tok profet i mekim tok na ol narapela i mas harim na skelim ol dispela tok. ³⁰ Tasol sapos, God i givim wanpela gutpela save long wanpela man husait i sindaun long lotu, orait larim man bilong autim tok profet i mas pasim maus. ³¹ Wanwan bilong yupela i nap autim tok profet long wanpela wanpela taim, na bai ol man i nap long kisim save na i nap kamap strong. ³² Ol spirit bilong ol profet i stap aninit long lukaut bilong ol profet. ³³ Long wanem, God i no save mekim ol samting i paul nabaut tasol em i pulap long bel isi. ³⁴ Wankain long sios bilong ol bilip manmeri, ol meri i mas stap isi insait long ol sios. Long wanem, ol i nogat tok orait bilong mekim tok, tasol ol i mas stap aninit olsem lo i tok tu. ³⁵ Sapos i gat wanpela samting ol i laik long kisim save long en, orait ol i mas askim ol man bilong ol long haus bilong ol. Long wanem, em i no gutpela pasin long meri i mekim toktok insait long sios. ³⁶ Ating tok bilong God i kam long yupela, a? Ating yupela tasol i kisim tok bilong God pastaim? ³⁷ Sapos wanpela man i ting olsem em i wanpela profet o strongpela kristen, em i mas luksave olsem ol samting mi raitim i kam long yupela, em tok Bikpela i givim long mi mekim. ³⁸ Tasol sapos wanpela man i no luksave long dispela orait, yupela i no ken luksave long em. ³⁹ Olsem na ol brata na susa, yupela i mas strong long kisim pasin bilong autim tok profet, na yupela i no ken tambuim wanpela man long mekim tok long ol kain kain tokples. ⁴⁰ Tasol yupela i mas bihainim stret ol gutpela pasin bilong lotu.