19 ¹ Wanpela taim i kam bihain olsem Nahas, king bilong ol manmeri bilong Amon, i dai na i olsem pikinini man bilong em i kamap king na i kisim ples bilong papa bilong en. ² David i tok, "Mi bai soim gutpela pasin long Hanun pikinini man bilong Nahas, long wanem papa bilong em i soim gutpela pasin long mi." Olsem na Devit i salim man bilong kisim toktok long givim tingting long em bilong bihainim papa bilong em. Wokman bilong Devit i go long graun bilong ol Amon na kamap long Hanun, long givim strong long em. ³ Tasol ol pikinini bilong king long Amon i tokim Hanun, "Yu ting Devit i mekim gut long papa bilong yu long wanem em i salim ol man long mekim gut long yu? Yu no inap save olsem ol wokman bilong em kam long yu long luksave na painim aut long kantri bilong ol inap long kam na bagarapim yumi?" ⁴ Olsem na Hanun i holim pasim wokman bilong Devit, katim maus gras na katim sot ol klos bilong ol klostu long weist, i go antap long as mit bilong ol na salim ol i go bek. ⁵ Taim ol i go tokim Devit long ol dispela pasin, em salim tok i go long bungim ol, long wanem ol dispela man i sem nogut tru na hait. Na king i tok, "Stap long Jeriko inap ol maus gras i kamap bikpela, orait yupela i ken kam bek." ⁶ Taim ol Amon i lukim olsem ol i mekim na hatim bel bilong Devit, Hanun na ol Amon i salim 1,000 kilo silva mani i go long ol Aram long baim ol karis na ol man bilong sindaun long hos bilong Naharaim, Maka na Soba. ⁷ Ol i baim ol 32,000 karis na king bilong Maka na ol ami bilong em, olgeta i kam na wokim kem klostu long taun Medeba. Na ol Amon i bungim ol yet wantaim long biktaun bilong ol na kam aut long pait. ⁸ Taim Devit i harim tok long dispela, em i salim Joap na olgeta ami bilong em long bungim ol. ⁹ Ol man bilong Amon i kam autsait pinis na wokim lain bilong pait klostu long dua bilong biktaun, taim ol king husait i kam i stap ol yet long ples bilong pait. ¹⁰ Taim Joap i lukim lain bilong pait i wokim lain na putim pes i kam long em long fran na baksait tu, em i makim sampela ol gutpela man bilong pait bilong Israel na i makim ol long pait wantaim ol Aram. ¹¹ Tasol long olgeta ol arapela ami, em i larim i go long han bilong brata bilong en Abisai, na em stretim ol long redi na pait wantaim ol ami bilong Amon. ¹² Joap i pasim tok, "Sapos ol Aram i strong tumas long mi, bihain orait yu Abisai i mas kam na helpim mi. Tasol sapos ol ami bilong Amon i pait strong tru long yu, orait bai mi kam na helpim yu. ¹³ 'Sanap strong, na larim mipela soim mipela yet olsem mipela i gat strong bilong ol manmeri bilong mipela na long biktaun bilong God, olsem God Yawe inap wokim wanem i gutpela long ai bilong em." ¹⁴ Olsem na Joap na ol soldia long ami bilong em strong moa long pait wantaim ol Aram, long mekim ol i pret na ranawe long ami bilong Israel. ¹⁵ Taim ami bilong Amon i lukim olsem ol Aram i ranawe pinis, ol tu i ranawe long Abisai brata bilong Joap na i go bek insait long biktaun. Olsem na Joap i lusim ol lain bilong Amon na i go bek long Jerusalem. ¹⁶ Taim ol Aram i lukim olsem ol Israel i winim pait, ol i salim tok long sampela moa soldia i kam olsem long wara Yufretis, wantaim Sofak ofisa long ami bilong Hadatesa. ¹⁷ Taim ol i tokim Devit long dispela ol samting, em i bungim olgeta lain Israel i kam wantaim long brukim wara Jodan na ronim ol. Em i makim ol ami long pait wantaim ol lain Aram na ol i pait wantaim em. ¹⁸ Ol Aram i ranawe long ol Israel na Devit i kilim 7,000 Aram soldia bilong sindaun long karis na 40,000 soldia bilong wokabaut long graun. Em i kilim tu Sofak man i go pas long ami. ¹⁹ Taim olgeta arapela ol king husait i wokman bilong Hadatesa i lukim olsem ol Israel i winim pait, ol i kamapim wanbel wantaim Devit na helpim ol lain bilong en. Olsem na ol man bilong Aram i no moa laik long helpim ol Amon.