¹ Gazo e ang Paulus faun mug ngamul ge izinen nase, ge binek iduk kagin taoz Kristuslon - Nga faun binek iduk inan dal lon saen naoun tazetaze woi ang lengami lon, ge nga tiwog dangan saen naga ibinen map. ² Gazo e nga o ngesesenganongame me, saen nga ngemade map, nga so gazop tiwog dangan map sibeg stamanag oi, tea am kankan tea egin dibol oi. ³ O malik am tinin lon atoz, am ju lon tinin so uzi. ⁴ Am nama, ju dazuk me tan e inan tea, tea me didnen in tiwon Uz sala sala me dangan afup pitinganap azupa tan lak iduwoi. ⁵ Kagin salasala , nauknauk kubel Anut inan kagin dange ime me, kagin salasala me dangan angale Kristus naonen sibiana didu. ⁶ Nami dagom panek idusemap am abang tealak me dangan oi, wagaz aduwoi me nian inau lak me ienime. ⁷ Abang melami lak ienime me anasip, ta pani i Kristus inan, i siben mewoi faun kankan ngalewoi, i siben Kristus inan egin. ⁸ Nga ang sobolonoang oi, so sebazangoi, Anut gaten nauknen tiwon penemalak mewoi kin gauz ngaboltat, ge azu ngabol ngame mewoi mamai so funangai, ⁹ Tea me so itasawoi, saen nga gazek lon ngetezenganang map. ¹⁰ Ainta dibol i inan gazek me muzua, meg tiwon dangan, ge i inan tinin inan tiwon me so iduse, meg i inan azu me tiwon tea. ¹¹ Binip taimon i siben kankan inau, me azu lon, gazek lon, saen i so imade map me gauai. ¹² Mewoi am i mai so tenai tenai woi, i sebadin oi denaudime, me binip i sebadin nugnug tenae tenae, me i kankan gauai tea. ¹³ Am sebama bingima so ibisawoi, am ngagas so atoz oi, tea am nama geg me Anut lon. ¹⁴ Tea am sebama bisiamag latnen nuama, tea am oizinen Kristus inau azu lon ase. ¹⁵ Am at nadin uzat oi lama gauai, inan geg me nenazi. Ge am lama gauai angnami lamilon malik nen me itubime. Am name uzat ang lengami lon me itub ge ilaime. ¹⁶ Meginpe ang anganmi fatu muzuan nen mai total gamun ipidin, tat inan uzatlon get uzat naulak mewoi so aboloi. ¹⁷ Ta inan uzat oi fuzozime i Ujanzen lon fuzozoi. ¹⁸ Ta i siben gatimelak me so iduse, tea, Ujanzen igati-ime ngan i mon iduse.