¹ Oraqueca gucua Pilatu Jesús ne gudiñebe la. ² Ca dxuu que bizaaca' ti la'pa de guiichi. Ne gulaquicabeni ique Jesús ne bigacucabe laabe ti lari muradu. ³ Beeda cabe ra nuube ne naa'cabe: ¡Viva, Rey xti ca Judiu!" ne gudapa cabe ruabe'. ⁴ Oraque, Pilatu biree xti bieque ne raabibe ca binni que': "Laguya, zeda nia laabe ra nuu tu ti gana dxiichi tu qui guidxela nin ti donda luguiábe. ⁵ Oraque, biree Jesús, nagu'íquebe la'pa de guichi que ne nacube lari muradu que. Ne oraque raabi Pilatu laacabe: "¡Laguya laabe!" ⁶ Ngue runi, ora ca Sacerdote gola ne ca gendarme biiya ca Jesús la'? Guníca resiu ne naaca: "¡Lagucaa laabe lu yaga cruz, lagucaa laabe lu yaga cruz!" Na Pilatu rabi laacabe: Laguicaa laabe laatu ne lagucaa laabe lu yaga cruz, ti naa, qui guidxela nin ti donda luguiábe. ⁷ Ca Judiu que bicaabica laabe: "Laadu napadu ti Ley, ne casi na Ley ca la'? Laabe napabe xhidee gatibe purti laca laabe guniibe nacabe Xhiñi Diuxi." ⁸ Ora Pilatu binadiaga ca diidxa que la'? jmárusi bidxibi, ⁹ ne guyuube ndani yo' láhui que xti bieque ne raabibe Jesús: "¿De padee zeedu pue?" Huaxha Jesús qui nucaabi di laabe. ¹⁰ Ngue runi Pilatu gudxi laabe:"¿Qui zucaabu naa la'? ¿Ñee qui ganu deque napa derechu para gundaa lii ne derechu para gucaa lii lu' yaga cruz la'?" ¹¹ Bicaabi Jesús laabe ne na':" Lii la qui gapu nin ti derechu luguiáya, pa cadi ni zeda de iba'. Nga runi, ni beda saana naa ra nuulu jmá napa donda." ¹² Ra binadiaga Pilatu ca diidxa que la'? gucala'dxi nundaa laabe, peru ca judiu bica'ca riidxi ne na' ca: "Pa' lii gundaalu laabe la'? cadi xhamigu diou César: Ne tuticasi guni laca la' ti xhaique la'? rinii de César." ¹³ Ora Pilatu binadiaga ca didxa di la'? guleebe Jesús de ndani yo' láhui que ne guriibe lu bangu xti tribunal ra ti nalate laa "Empedradu", lu' didxa hebreu la', "Gábata". ¹⁴ Biasipe dxiique cayuuchahuicabe ti ma zeda yanda nabaana, bia lu' xhopa xhigaba. Naa Pilatu rabi ca judíu: "¡Laguya, rarii nu Xhaique xtitu!" ¹⁵ Ne laaca bica'ca ridxi: "¡Qui racaladxididu laabe! ¡Quiracaladxididu laabe!" Ná Pilatu rabi laacabe:¿Ñee zucaa lu yaga cruz Xhaique xtitu la?" xhaique xti ca sacerdote bicaabi: "Qui gapadidu xti rey pa cadi César." ¹⁶ Oraque bidii Pilatu laacabe Jesús para gucaa cabe laa lu yaga cruz. ¹⁷ Oraque gunaaze cabe Jesús, ne biree, ndani yaga cruz que, zee ra ti nalate la "La Calavera", hebreu la lani "Gólgota." ¹⁸ Raquee bicaacabe Jesús lu yaga cruz, laabe la ne xhupa badunguiu, tobi ndiga ne xtobi biga ne Jesús galahui. ¹⁹ Ne laca bicaa Pilatu cadxi didxa lu tindaa yaga ne biquidibeni lu yaga cruz que. Lu quee gucua ca dxida di: "JESÚS DE NAZARET, XHAIQUE XTI CA JUDIU". ²⁰ Xtale de ca judiu binda ca ni caa lu tindaa yaga que, purti ra bicaacabe laabe lu yaga cruz que nuuni gaxha de guidxi que. Ca didxa que la gucua cani lu hebreo, latín la ne griego. ²¹ Raquee ná xhaique xti ca judiu que rabi Pilatu: "Cadi gucaadiou 'Xhaique xti ca judiu', ma galán guicáni sicarii: 'Laabe guniibe: 'Naa Nga Xhaique xti ca Judiu"" ²² Bicabi'ca Pilatu: "Ni ma bicaa la?, ma bicaa." ^{23 24} Biluxhe de bicaa si ca dxu' que Jesús lu yaga cruz que la? gucuacabe ca xhababe ne bi'ni cabe ni tapa ndaa; tindaa tindaca gucua ca dxu' que ne túnica xtibe que. Yana túnica que la? cadi diibadi'ni , de ti ndaga si ni. Raquee gunílisaa cabe: "Cadi guichezadinu'ni, jmá galàn cu' nuni