¹ Yeso maa suri u denge Asere, maa ra anyimo atanu anu manza ume me wa eh inu bezizi ume bibara-bara bi tidenge ti utarsa Asere. ² Ba ma kabirka we ma gu, "Vat ya ira tini? kadundure kani in boo shi, adi samarika apo age me ada ceki me nire a sesere anire ba." ³ Maa ciki a nipo nu zaitun anu manza ume me wa eh ahira ame wa gu, "Bukan duru, uya uwui uni adi wuzi anime? nyani idi bezi u aye uwe me? Nani umara unee?" ⁴ Ba yeso ma kabirka ma gu, 'wuza ni seke katti uye ma witi shi. ⁵ Barki anu wa di eh gbardang anyimo a niza num, wa gu 'we wa ni Asere, wa di witti anu gbardang. ⁶ I di kunna tize tini kono nan ukisa u nikono, wuza ni seke kati i kunna biyau, barki ya cukuno gbas timumu ticukuno ani me umara wa mu aye ba. ⁷ Anabu wa di hirza anabu, tigomo ti di hirza tigomo. Adi uzi ikomo nan uzuruno adizi ati hira sasas. ⁸ Ani me vat timumum tigino me utuba upazaza uyoo uni cas. ⁹ A' anime wa di witi shi, apatti shi wa kuri wa huzzi shi anu vat wa di nyare shi barki niza num. ¹⁰ A' anime anu wa di pilizo gbardang, wa ri inama ya cece wa nyari me acece. ¹¹ Anu kurzuzo u tize tima cuco wadi suri, warangizi anu gbardang. ¹² Barki Katuma kaburi kadi wu gbem, u hem umaro ma anu udi wu seke. ¹³ Adi buri desa ma tonno. ¹⁴ Adi wuzi tize ti tigomo tazeesere vat anyimo unee uge me abuki anabu, unee wa aye umara. ¹⁵ A' anime inki ya ira katuma ka zenzeng kaso, ka gebe sa Daniyel unu kurzuzo utize maa buki, maa tonno ahira a lau (Ca unu basa ma rusi). ¹⁶ ''Ca ande sa wa ra u Yahudiya wa sumi u hana apana. ¹⁷ Ca de sa ma tari azezere akura, kati ma tu u ziki ire imum anyimo akura ame me, ¹⁸ nan de sa ma ra uruu kati ma kuri akuri barki u zika udibi udandang ume ba. ¹⁹ Udee an desa wa cira vana nan anu a nihamza a tiye tigino me. ²⁰ Wuza ni bi ringara kati usum ushi me ucukuno uganiya u puturu nani uwui Asabar. ²¹ Uganiya ugino me adi wuzzi i jasi kang, usassana igibe sa amu wuza ba dati utuba unee u aye ukani, ada ka wuza me ba. ²² Bansa a kaska tiye tigino ba, ada'daa kem me de sa ma game ba. Barki anu zauka ugino me adi kaska tiye me. ²³ A' anime de sa ma gunna shi, ''Ira kiristi ma yene! nani, 'Monno abirko! kati i hem ba. ²⁴ Ande sa wa gusa we wani Kiristi nan ande sa gusa we wani anu kurzuzo u tize Asere wa di suri, wa bezi katuma kadandang ku bari, barki wa hunze ande sa azauka inki ya wunna. ²⁵ Ira ni, maa buki shi dibe. ²⁶ A' anime inki wa gunan shi, "monno anija" kati i suri ba inka wa guna, monno anyimo a tihira ti gunzine, kati i hem ba. ²⁷ Gusi umelme azeesere usuro naza u hana nadizi, ane ani u aye uvana unu udi zi. ²⁸ Vatt ahira sa amush arani, abini me ani magbulluk ma orzino ni. ²⁹ Ani usuro ijasi igino me, uwui udi wu mareu, upeu udaa nya masaa ma uni ba. iwirang idi rizizzi usuro asesere, nan ubari asesere udi zuruno. ³⁰ Uganiya ugino me uni u inko u'ira uvana unu udi eh asesere, vat alem unee adi wuzi tiyom. wa di iri vana unu ma ehze aniyimo a tiwiri, inu bari nan ninonzo gbem. ³¹ Ma di tumi ibeu i kadura kame me wa hure nihure na so kang, wa kuri wa orso me anu a tikira ka nazi, usuro nikira ni inde na sesere uhana a nire. ³² Manza ni ahira utiti upom, uke u zarika inki nikuzi na aye mamu u tiro. ³³ Ani me ani, inki ya ira adodu agino me ma aye mamu, ma ra anatukum. ³⁴ Kadure, in boo shi ucara uge me uda aka ba senke adodu agino me a wuza. ³⁵ Asesere nan na dizi adi mari, tize tum tida mara ba. ³⁶ A anime abanga uwui ugino me nani uganiya ugino uye ma da tame ba, nani ibeu i kadure ka Asere asesere, nani vana me, senke acoo cas. ³⁷ Gusi tiye ti Nuhu, ane ani idi cukuno u' aye uvana unu udi zi. ³⁸ Atiye tigino me agu uguna ure u Nuhu waa zi in are, inu siza tinya nan u nyinza u tinya, uhana uwui me sa Nuhu maa ribe u Zirgi, ³⁹ Wa taame imum ba senke sa ure u harika vatt- ane ani idi cukuno u ye u vana unu. ⁴⁰ A' anime adi iri ana ware uruu, a ziki unu inde a ceki unu inde. ⁴¹ Aneh ware wa di zi in tinanzu, a ziki unu inde a ceki u inde. ⁴² Barki ani me rusa ni, i taa shi inu uya uwui uni Ugomo Asere ashi me ma di eh. ⁴³ Anime rusa ni ige me, agi u nakura ma rusa uganiya sa ukari ma di eh, ma da cukuno ma be madi da ceki me apuri akura me aribe ni ba. ⁴⁴ A' anime cukuno ni inu rusa uganiya sa ita shi ba vana unu ma di eh. ⁴⁵ Aveni urere u hem nan ujinjing desa unu akura ame me ma wunna me utarsa ina akura barki ma nyinzi we imum yare uganiya? ⁴⁶ Unu rigirka mani urere ugino sa unu akura ume me madi kem inu wuza katuma kame uganiya sa ma zeh. ⁴⁷ Kadure in boo shi unu akura me madi tari me imum be sa ma zini. ⁴⁸ Inki urere ugino me unu buri mani, ma guna iriba ime una akura am ma game u aye dibe. ⁴⁹ Ba' ma tubi atira aroni a nirere, ma rizi masizi nan anu a bisizasiza; ⁵⁰ Una akura u rere ugino me ma di eh u wui me sa ma tame ba. ⁵¹ Una akura ame me ma di yorsi magitu u masirka ume me udi rep nan anu aburi, ahira sa ma di shi ma rumzi ahini.