¹ Sa Yeso nan anu manza ume me wa hana mamu nan u Urshalima wa eh agiro Ubetafaji, a nihoho ni matiti mu zaitun, ba Yeso ma tumi anu manza ume me ware. ² ma gun we, "Hanani anyimo agiro aje ashi me, idi iri atirza bizenki nan vana me i sopi i eh mini. ³ Ingi uye ma iko shi, igun me, 'Ugomo Asere mani ma nyara,' unu ugino me ma di tuburko shi nan ini debe debe." ⁴ Ya cukuno anime bati a myincika imum me sa unu ukurzo utize ta Asere ma gu. ⁵ Buka ni uca anu Sihiyona, 'Irani, Ugomo uwe me monno tantu aye, una nice ni sheu ma haka azesere akuzenki.''' ⁶ Anu tarsa ume me wa wuzi imum sa Yeso ma buka we. Wa ehn ku zenki me nan vana me wa tari turunga tuwe me azesere me, Yeso ma cukuno a bizenki me, ⁸ Maro ma nigura me wa nasa tirunga tuwe me una me, aye wa kuzi mava wa nasa una me. ⁹ Ba nigura me sa wa haki aje a Yeso nan anu tarsa ume wa yeze amirang wa gu," Hossana vana u Dauda! Ugongong mani de sa ma aye a niza ni Ugomo Asere! Hossana una ni nonzo kang!'' ¹⁰ Sa Yeso ma ribe Urshalima nipin ni gumurka inu gusa, Aveni ma zige me?" ¹¹ Nigura nanu ni kabirka, "Yeso u Nazarat u Galili mani unu kurzo utize ta Asere." ¹² Ba Yeso ma ribe anyimo udenge Asere. Ma gidi anu abiziza- ziza nan anu abi kpija -kpija anyimo udenge Asere, ma kuri ma tuburi matebur ma anu a kacuro ki kirfi nan ma kpanku ma anu ziza uma hurbe. ¹³ Ma gun we, "A nyetike, 'Adi titi akura am ahira a biringara,' shi be ya kurzo ani ahira ugunzune akari.'' ¹⁴ Ba arubo nan anu zatu tibuna wa eh ahira ame anyimo udenge Asere ma human we. ¹⁵ Uganiya sa anu adangdang akatuma ka Asere nan anu nyetike udungara u musa wa ira timum ti biyau sa ma wuza wa kunna ahana in tihunu anyimo udenge Asere me inu gusa, "Us an a ahira vana u Dauda,'' wa kunna iriba kang. ¹⁶ Wa gun me, ''Ukunna imum me sa anu ageme wa boo?'' Yeso ma gun we, ''Ee! Daki ya mu basa ba, Ira in gusa atinyo ta hana acicing nan anu hamza aka kem ni nonzo ni huma'?" ¹⁷ Abini me Yeso ma ceki we ma suri a nipin me ma dusa uhana u Batanya maka mura abini me. ¹⁸ Sa ma kuro a nipin me nisisizo ma kunna ikomo. ¹⁹ Sa ma ira utiti upom ani kira ni una, ma ha daki ma kem ire imum ni ba, senke mava. Ma gun uni, "Kati uka yoo ba,'' abini me utiti me uwa. ²⁰ Sa anu tarsa ume me wa ira, wa kunna biyau wa gu, "Awuza aneni utiti upom me wa wa ana me?'' ²¹ Yeso ma kabirka ma gun we, ''Kadundere in boo shi ingi izi inu hem sarki uhara iruba, idi wuzi imum sa iteki ige sa a wuza utiti upom, 'idi gu inu pana u hiri uka rizo uraba udandang,' idi cukuno anime. ²² Vat imum be sa ya iko in biringara, nan u hem idi kem ini.'' ²³ Sa Yeso ma ribe anyimo udenge Asere, anu adangdang akatuma nan ananu wa eh ahira ame wa gu, "In niya nikara nini uzin unu wuza timum tige me aveni ma nya we nikara me?" ²⁴ Yeso ma kabirka ma gun we, ''Mi cangi ndi iki shi imum inde. Ingi ya kabirka ni mi, in di buki shi in nikara na veni in zin katuma kage me. ²⁵ Ubatisima u Yuhana wa suri abani? wa suri asesere nani ahira anabu?'' Wa gamari ace awe inu gusa," ''Ingi ta guna asesere, ma di gun in haru 'Nya nini ya wunna daki ya hem in me ba?' ²⁶ Ingi ta guna, 'A hira anabu,' ti kunna biyau bini ori, barki wa zika Yuhana unu kurzo utize ta Asere mani.'' ²⁷ Wa kabirka wa gun Yeso, ''Ti tan duru ba.'' ma gu in we, ''Mi in da bukam shi nikara ni aveni in wuza timum tige me ba cangi. ²⁸ Ani nyanini ya ira? Uye ma zin na hana ware a ruma, ma ha a hira unu tuba me ma gu, "Usam, um hana ka wuza katuma ku ruu.' ²⁹ Vana me ma kabirka ma gu, Inda hanam ba,' usam me eh in adumo ma gamirka ma ha. ³⁰ Acoo me ma ha ahira unu kure me ma buki me ma gu, 'Indi ha, sakura,' ma game uhana me. ³¹ Anyimo ahana wa re me aveni ma wuza imum me sa acoo ume me ma nyara?'' Wa gu, "Unu tuba me." Yeso ma gun we, "Kadundere in boo shi, anu kabsa ikirfi ima nyanga nan anu ziza apum wadi agiza shi u ribe a tigomo ta Asere. ³² Yuhana maa ehn shi in iruba ibenki, ani me i ga shi uhem. Anu kabsa ikirfi i manyanga nan anu ziza apum, wa hem in me, abanna shi, vat ira ani me, daki ya hem ya bezi u siziki me nani I hem in me ba. ³³ Kunna ni tire tize ta anyimo. Ure unu ma rani, ma wuzi tibira uruu ume. Ma wuzi tibira, ma bari ugumbi, nan ahira upillo u myei ma matiti, wan udenge unu ubee uruu me. Ma nya a adi me ikirfi ma dusa a mare ma nyanga. ³⁴ Sa uganiya u oro iburi wa aye, ma tumi are arere ahira anu kaba uruu me wa ka nya me ime iburi me . ³⁵ Ani me anu tarsa inu uruu me wa meki arere me, wa tiri unu inde, wa hu unu you're me, wa kuri wa tizi uye. ³⁶ Unu uruu me ma kuri ma tumi aye sa wa teki anu tuba me, ana katuma uruu me wa kuri wa wuzi we kasi ana tuba me. ³⁷ Anime, unu ruu me ma kuri ma tumi vana ume me ahira awe me, unu guna, 'wa di kunna vana um. ' ³⁸ Sa anu a katuma ku ruu me wa ira vana me, wa gu 'Na cece, usam me mani ca ti hu me ti canti uruu me.' ³⁹ Abini me wa ziki me, wa suri anyimo uruu me wa ka huna me. ⁴⁰ Ana me ingi unu uruu me ma aye nya nini ma di wuzi ana katuma ku ruu me?'' ⁴¹ Wa gun me, ''Ma di hu anu aburi agino me una upazaza, ma kabi uruu me ma nya aye, sa wa di nya me ime unu ganiya u uro u bisana.'' ⁴² Yeso ma gun we, "Daki ya ira anyimo u nyetike utize ta Asere, 'Nipo me sa anu aso wa nyari me nine nini na cukuno ni huma, ige me ahira Asere ani ya suri ni, imum i biyau ini aje aru'? ⁴³ Barki anime in boo shi, tigomo ta Asere adi kabi ahira ashi a nya ande sa wa di yozo ahana. ⁴⁴ Desa ma rizo a nipo nige me ma di pussa magitu, desa nipo me na rizo ame nidi nyezirke me.'' ⁴⁵ Sa anu adangdang a katuma ka Asere nan anu bezi urusa wa kunna tize ti anyimo tume me, wa rusi ma boo ace awe me ani. ⁴⁶ Wa nyari umeki ume wa kunna biyau, bi ni'ori, barki anu wa zika me unu kurzo utize ta Asere mani.