¹ Yaa cukuno uganiya sa yeso maa mari tize tigino me vat, ma ceki manyanga mu Galili, ma eh ibinani u Yahudiya sa ure u huru u manyanga mu Urdu. ² Ni ori ni anu gbardang ni tarsi me, ma humuzan in we abini me. ³ Are anu bezi rusa wa eh ahira me, wa bati me, wa gun me, "U inko utize tini unu ma gidi uneh ahira kondi iya imum?" ⁴ Yeso maa kabirka ma gu, "Daki ya bata uguna de sa maa bari inu tuba maa bari we vana nan u'eh? ⁵ De sa maa bari we ma kuri ma gu, 'Barki ani me unu ma di ceki a'ino nan kacoo ume, ma pattina nan uneh ume, we ware wa cukuno nipum ni inde? ⁶ Azo we ware wani ba, nipum inde ni ni. Barki ani me vat imum be sa Asere a patta, kati uye ma hari ba." ⁷ Ba wa gun me, "Nyani yaa wu Musa am wu duru ti anyettike a hu anya, ti kuri ti gidi me?" ⁸ Ma gun we, "Barki ugbas u muriba mushe muni ine ini yaa wu Musa ma hem shi i gidi aneh ashi me, utuba wa zi anime ba. ⁹ In boo shi vat desa ma gido uneh ume, inki daki ma wuza imum i madini mani ba, maka zika ure uneh sas ma wuza imum madini, debe sa ma zika uneh me sa a gido cangi ma wuza imum izenzeng." ¹⁰ Ba anu manza wa gun in Yeso, "Inki ane ani izi abanga urma nan uneh ume,ida rizi me a wuzi anya ba." ¹¹ Abini me Yeso ma gun we, "Azo konde aveni ma di kabi u dungara u gino ba, senke ande sa a hem we wa kabi tini. ¹² Aye wa rani ayozo we wa zo we anyimo ahana aruma ba, aye wa rani anabu wani wa kurzo we anime, aye wa kuri wa rani we wani wa kurzo ace awe ani me barki wa kem tigomo ta Asere. Vat debe sa ma dake ma kabi udungura uge me a ma kabi." ¹³ Ba a ehn me in ahana acincing batti ma tari we tari, ma wu we biringara, ba anu tarsa ume me wa kpadi we. ¹⁴ Ba Yeso ma gu, "Kini ahana a cincing wa eh ahira am, kati itarika we ba barki tigomo ta Asesere me tu sasana uwe tini.'' ¹⁵ Ma tari ahana me tari, ma ceki ahira me. ¹⁶ Ba ure unu, ma eh ahira a Yeso, ma gu, ''Unu dungara, nyani i huma indi wuzi bati in kem ivai izatu umarsa?" ¹⁷ Yeso ma gun me, '' "Nyanini ya wunna wa ikom imum i huma? Unu inde mani ma zi uhuma cas, inki u nyara uribe anyimo ivai, tarsa u inko utize me.'' ¹⁸ Unu me ma gun me, "Uya u inko utize?" Yeso ma gu, "Kati uhu unu ba, Kati u wuzi imum i madini ba, Kati uwuzi nikari ba, Kati u impi amaru amacico ba, ¹⁹ Hira acoo nan ka ino uwe me gongong, hem inu roni u tura uwe gusi nice nuwe me.'' ²⁰ Ba manyani me ma gun me, "Vat mamu tarsa tini. Nyani ya dem?" ²¹ Yeso ma gun me, "Ingi u nyara ucukuno unu myinca, hana, uka ziza vat imum be sa u zini u nya anu dira, udi kem ikem Asesere; u eh, u tarsum." ²² Sa manyani ma kunna imum be sa Yeso ma buka, ma kuri ina puru abit, barki me unu ukem mani. ²³ Yeso ma gun, ''In anu manza ume me, kadundure ma buka shi, i dizi inijasi unu kem ma ribe atigomo ta Asesere. ²⁴ Ma kuri ma buka shi, idi zi sheu uronkomi uribe ani hara na lira, inu guna unu kem ma ribe atigomo ta Asere.'' ²⁵ Anu manza ume me wa kunna ani me, biyau bi meki we wa gu, ''Inka anime ani aveni ma di kem ubura?" ²⁶ Ba Yeso ma iri we, ma gu, "Ahira anu daki imum i wunna ini ba, ahira Asere kondi nyani idake wu." ²⁷ Ba Bitrus ma kabirka ma gu, "Ira, ta ceki vat timum tiru ta tarsa we. Aname nyani tidi kem?" ²⁸ Yeso ma gun we, ''Kadundure im boo shi, uyo uso uganiya sa vana unu ma di cukuno ukpanku ugongong ume me, shi sa ya tarsam, idi kuri icukuno azesere ama kpanku ma alem ukirau in anare, ma u Isra'ila unu wesi utize ti nikubu. ²⁹ Vat desa ma ceki tikura, nan anu henu aruma, a'eh, acoo, a,ino, ahana,nani tiruu, barki niza num, ma di kem famama a'ino ukirau, ma kuri ma kem ivai uzati umarsa. ³⁰ Anu tuba gbardang wa di cukuno ana dumo anu adumo wa cukuno anu aje.